فتنة الجزء الثالث

15

الحلقة 108 💎💎
manal9ach tafa3ol 3la kol 7ala9a .. 7ad ma 3ad y9oul habat
..كلمة قالها محمود من قلبو .. اما وجعت فتنة عالاخر .. كلمة مرتي فكرتها بآكا اليلة المشومة لي مشاو فيها لقصر الرايس عروس و عروسة .. كلمة فتنة ما حملتهاش جملة.. هي اصلها صارت حساسة عالاخر المدة هذي.. كلمة مرتي فكرتها بعذابها و كيفاه خلاها و مشا ملوحة بالسواري متاعها كيف الكلبة .. بقات يومين في الكلينك تستنا فيه توا تفكر انها مرتو !! .. ولا يخليها وقت لي يحب .. و يرجع يتفكر انها مرتو وقت لي يحب !!.. و في لحضة تفكرت من جديد كل كلمة قالهالها زياد ... كل كلمة جرحها بيها و ذلها بيها رجعت دارت في مخها من جديد .. قلها محمود ما يحبكش .. هوا فقط يحب يسيطر على الناس الكل و يملك كل شي .. انت مالك الا مرا طاغية الجمال استفزت رجولتو .. و حب يملكها لا اكثر و لا اقل .. يرميك وقت يحب و يرجعلك وقت لي يحس انك لغيرو ..قلبها عصر عليها مسكينة ... تبسمت بوجيعة كبيرة ... - كلمة مرتي رد بالك مازلت تنطقها على لسانك .. ما يشرفنيش نكون مرت واحد كيفك ..اكهو سي بون لحد لنا .. توا هيا تجاوزت جميع الحدود مع راجل معصاب لابعد لحدود .. جن بالحق. ..قرب منها يزرب .. كبس على يدها و تكلم و هوا ينزل على سنيه .. - شبيك تتصرف هكا .. شبيك جنيت ياخي !!.. ما تخراش فيه .. سكتت البارح صحيح .. اما مش ناسي لي عملتو .. و حسابك عليه كبير .. نطرتلو يدو و تكلمت بعصب ....- والله حاسب روحك قبل ما تحاسب الناس يا ولد الرايس .. مافماش عليه جاي تحاسب فيا فين نمشي ووفين نجي .. كلامك خليه محدود معايا ... و وجهك انا نحبش نراه ... انا كرهتك .. و كان تعمل مزية ترجع فين كنت .. اخرج من هوني .. تكبس بكلو من كلامها .. عرق رقبتو برز من الغش .. عيونو ڨدحت بالنار .. وصلت تهين فيه قدام امو و حفصية !! .. عاش عمرو الكل بقدرو .. مش باش تجي فرخة توا تطيحلو قدرو ولا تنقص من هيبتو .. و توا نقدر نقلكم انو صراع الكرامة حل ابوابو ما بين فتنة و محمود .. و هذا اخيب و اصعب صراع ما بين زوز .. صراع قادر يهدم كل شي .. صراع يتجردو فيه من كل احساس حلو بينهم .. القلب يحبس و فقط العقل هوا لي يسير العلاقة .. علاقة مرا كرامتها مجروحة صغيرة متجردة من التجارب .. براجل ناضج .. عندو هيبتو و قدرو خط احمر ... 😣بالحق عيونو ضلامت من كثر الغش .. حد ما تجرأ يتجاوز حدودو معاه .. رجال بوزنهم و ما عملوهاش .. و هي تطرد فيه جملة !! .. زاد قرب منها اكثر ..كبس على يدها اكثر .. حط عيونو في وسط عيونها .. و تكلم بصوت ثابت .. فيه بحة جامدة تخوف .. - الدار هذي لي واقفة توا تطرد فيا منها دار محمود الرايس .. الفيرمة هذي لي انت فيها ملك محمود الرايس .. الاراضي لي في المنطقة هذي الكل ترجع لمحمود الرايس .. الطريق لي انت باش تمشي منو لموعدك الشخصي عاملو محمود الرايس .. كل حاجة هوني ترجع ليا انا .. اعرف حدودك مليح مليح .. و اعرف شكون لي واقف توا قدامك ... و اذا ما تعرفنيش شكون الف واحد قادر يعرفك بيا ... قدري خط احمر .. ما نسمح لحد يتعداه او يقلل منو .. و لي يفكر يعملها نحبش نقلك اش نعمل فيه .. نرجع و نقلك اعرف انت شكون و لي واقف قدامك شكون .. كلامات قالهم و هوا راشق عيونو في وسط عيونهة .. كلمات هبطتو اللطف كيف السم عليها .. كل كلمة كان يقولها كانت تتغرس في قلبها كيف الخنجر الحافي .. مع كل كلمة قالها دمعة هبطت من عيونها .. لدرجة انها حست النفس شيتقطع عليها .. توا رجعها لحجمها الحقيقي .. توا خلاها تعرف بالحق هي شنيا في نضرو و هي شنيا تسوا ... جملة " اعرف انت شكون و لي قدامك شكون" بقات تدوي في وذنها .. كرشها وجعتها ... حابة تحبس دموعها و متوريش وجيعتها قدامو اما ما قدرتش .. بالعكس ... دموعها قوات و صوت شهقها تسمع ... توا فتنة عرفت بوضوخ كبييير هي شنيا بالنسبة ليه .. هو فقط حاقرها .. هوا محمود الرايس رجل اعمال من العيار الثقيل .. و هي وحدة يتيمة .. ترمات عندو و تحت ضلو .. عاشت هيا و راجلها من خيرو قبل .. و توا زادة عايشة في خيرو .. ميساج محمود وصلها بكل وضوح .. ما اخيبو اكا الاحساس .. حسسها بالذل بكلامة .. حسسها بالنقص ... #ريما 💋💋
hadha tafa3ol tawa !!!
خديجة و حفصية حتى وحدة فيهم ما تجرأت انها تنطق كلمة .. يعرفوه كيف يتسكر .. ما يفهم شي .. تقدرو تقولو انو تكبر .. جباروت .. قوة .. لكن هذا هوا محمود الرايس .. مستحيل يقبل حد يطيحلو قدرو ... و فتنة مسكينة قلبها تحرق حرق من كلامو .. دموعها ولا حبو يكفو .. الصمت ملا الدنيا .. كان شهقتها تتسمع .. تبلع في غصتها بالسيف ... و من غير ما تشعر هزت يدها .. دزتو باقواى جهدها .. و تكلمت بصوت مقطع من البكاء يوجع القلب ... - ما.. ما ..ما غلطش زياد كيف قال عليك اناني .. قال عليك اناني ... تحب كان روحك .. و تحب تملك الناس .. عارفة روحي مليح شنيا ... جرد وحدة كانت و مازالت عايشة في خيرك .. تبكي و تمسح في دموعها بكف يدها .. هوكا شنخليهالك فيرمة متاعك و أرضك. .. و كل شي ... .. بالحق محمود جرحها و مسلها كرامتها .. الفقر عمرو ما كان عيب .. و ضروفها مش هيا لي ختارتهم ... و الغريبة في الامر انو محمود عمرو ما كان طبقي او يفكر بالطريقة هذي !! .. اما يمكن غيرتو و حبو و وحشو ليها خلاه يتسرع و يقول هكا .. جملة شتتكلفلو غالية باااارشا .. تلفتت لخديجة ... ترعش بكلها و تحكي بصوت كلو وجيعة ... - يا ريتني خذيت راي زياد .. يا ريتني مشيت معاه و لا نتذل من جديد ... دزتو بالقوي من صدرو مرة اخرا .. و خرجت تزرب باتجاه الباب ...و محمود زاد هبل و جن جنونو .. زاد هاج من كلامها.. كانت شتمشي مع زياد !! .. و تتحصر عليه من فوق ؟؟ ... هي حلت باب الفيلا البلار قد قد و هوا يخطفها من يدها .. يضرب الباب بساقو يصكرو بالقوي .. جابو بكلو مدشدش في القاعة .. شاددها من يدها شويا لا يكسرهالها ... عروق رقبتو نفرو من كثر العصب .. يحكي و ينزل على سنيه .. كان يتسيب عليها ياكلها ماكلة .. اما باقي متحكم في روحو شويا.. يحكي و يسأل فيها بعيونو ..- فين ماشيا !! فين ماشيا نحكي معاك جاوب ز...-خارجة و مخليتلك املاكك افرح بيهم ..كبس على زندها اكثر و اكثر .. - دخول الحمام مش كيف خروجو .. اكيد مش باش نخلي ولدي ليك تربيه .. ولا يربيه صاحبك المصون لي تتحسر عليه .. و هي .. هي مسكينة حست روحها تخنقت من كلامو .. النفس ضاع عليها .. مش قادرة تتحمل وجيعة اكثر من هكا ... تحاول تتنفس بصعوبة .. نحات اكا الfoulard من رقبتها باش تتنفس .. كبست روحها و نطقت بالسيف .. - ش .. ش .. شتقصد... ثبت شويا فيها .. في عيونها لي يوجعو القلب ... في دموعها لي لاقين طريقهم على خدودها و على شفايفها ... في نضرت القهرة لي في وسط اكا اللون القري ... للحضة ترهوج .. للحضة وجعتو .. حسها صغيرة و ضعيفة و الكلام لي قالو قاصي عليها .. لكن كل شي ولا كرامتو .. لصقها في الحيط ... و زاد لصق فيها ببدنو .. عدا يدو على كريشتها المكعبرة .. و للحضة رعش .. هذا اول كنتاكت بينو و بين البيبي .. هذي اول مرة يحس فيها بوجودو .. الاثنين ترهوجو في نفس الوقت .. فتنة لي كرشها وجعتها من لمستو .. و قلبها وجعها من كلامو .. حست انو البيبي لي في كرشها حس بلمست بوه و فرح بيها .. هي ام و تحس .. حست لولدها من قبضت كرشها ..و محمود ماكانش احسن منها حال .. قلبو رعش اول ما حط يدو كرشها .. حس باحساس غريييب اما بنين .. حس بولدو و بوجودو في الدنيا هذي .. احساس قوي عالاخر خلا عيونو تتملا بالدموع ...فتنة غمضت عيونها من قوة الاحساس ... الصغير لي بينهم خلا احساس غرييييب يتملكهم ... احساس قوي خلا دموعهم هي لي تحكي .. قلوبهم تضرب بنفس القوة .. و الاثنين حاسين بوجود آكا القطعة الصغرونة لي تربطهم ... عدا يديه بحنيه على كرشها .. غمض عيونو من غير ما يشعر ... صوتو هرب عليه في اللحضة هذي .. حاول يحكي .. اما صوتو بالحق خانو .. كبس روحو اكثر .. كبس بيدو شويا على كرشها و حكا بصوت كلو بحة .. بحة مخلطة برجولة تقهر .. - هذا متاعي يا فتنة .. متاعي انا .. وين انا وين هوا .. حد ما يقدر يبعدو عليا .. تحب تبعد ابعد .. اما هذا متاعي انا .. و طول ما هوا مزروع فيك .. انت تحت سلطي ..