فتنة الجزء الثالث

7

الحلقة 100💎💎
attachez vos ceintures 😈😈
- دللتها يا خديجة والله دللتها ...تلفتتلها للا خديجة تتبسم .. حطت يدها في حزامها و بدات تحكي بيدها لخرا لي شادة فيها المغرف اللوح ... - ووووووه ... المرا بين روحين و تتوحم .. كيفاش تحبني ماندلهاش ؟عوجت فمها ... مش عاجبها الكلام ... ستوات روحها على البنك لي في الكوجينة .. ههههه ... حفصية قصيرة أما عسسسسل ... سويقاتها مش خالطين للقاعة ... حطت عكازها بجنبها و عطتها ڨحرة عذاب هههه ... - مممممم ... الدلال يخلف الهبال ... كل ليلة و للا طالعتلنا بطلعة ... و قيد على الوحم ... - هههههه ... فكرتني بروحي يا حفصية كيف كنت نتوحم بأكا مكبوب السعد .. ما خليت ماشتهيت هههههه ... و شهواتي بكلهم بعد نصف الليل هههههه....حفصية شدت أكا السبحة تستغفر و تسبح .. وتدوح في راسها مش عاجبها الكلام .. - اكا مكبوب السعد توا يكبلنا لينا أحنا سعودنا ... هوا قالب الدنيا عليها و هي متخبية في دارو و راقدة في بيتو و كل ليلة تعنق في مخدتو ... و تتوحم عليه من فوق ... توا ترا شنوا يعمل .. ولدك هذاكا عصبانة .. مربت و ماسط و معڨد في مخو .. كلمتين خوات مل يحملهمش ... كل مرة و هوا بعثلي شيفور يقلي قلك سي محمود فتنة وين ... وليت عقاب عمري مرعوبة من فرخ كان يجري بين ساقيا ...خديجة تكبست من كلامها .. اما باقي محافضة على اكا الابتسامة .. ههههههه كيف تضحك يبانو حفر الزين ... و تبان بنوتة صغرونة ... اصل عندها زين و شارم مش عاديين ... - فهمني بربي شنوا كنت نجم نعمل انا !! ... قلي تره .. حفصية زادت ستوات روحها .. حطت اكا الكوفيرتة على سقيها و حلت البلازما لي معلقة في الكوجينة ... وبدت تحكي .. - ممممممم ... انا نقلك أبدا حضر في اكا الكليمات لي باش تقولهم قدام محمود وقت لي يبدا يغصور فينا .. خديجة تنهدت .. رخت شفايفها و مشت قعدت بحذا حفصية ... - يا حفصية بالله اش عندي نعمل انا !! ... فما حل اخر و انا ماعملتوش ؟؟؟ .... تي دخلت عليها نلقاها تبدل في دبشها و خارجة ... نلقاها تبكي بالغصة ... تشهق و ترعش بكلها ... حالها كيف حال العصفور المجروح. .. تي بالله العضيم حممتلي قلبي ... واكا مكبوب السعد زياد الله لا تربحو سكنلها في مخها ... عمرها على محمود .. قلها راهو لعب بيك و انت حصلت كيف الضبعة ... وطت صوتها و كملت كلامها ...- تي هوا لي حطلها فكرة الخروج من الكلينيك في مخها .. كان معمل يهزها .. قلها ايجا معايا و انسا محمود .. تي خلاها تحضر في روحها على أساس يريقل الاوراق و يرجعلها ... و أنا دخلت بالصدفة ... اصل تصدمت كيف راتني ... و حتى كيف حاولت نهديها و نقلها محمود يحبك و زياد هوا لي يكذب ... زادت فحمت بالبكا .. قتلي نموت ولا نزيد دقيقة معاه .. محمود هوا لي يكذب ... ههههههه .. و اكا حفصية كيف عادتها ... وين تسمع سيرت زياد و لي عملو تشعل و تبدا تدعي بيه ههههه .. - الله لا تربحو .. ناوي يشوي قليب وليدي ... يكب سعدو اكثر ماهو مكبوب .. اصحاب آخر زمان ... من نساوين ربي الكل .. حط عينو على مرت صاحب .. يعطيه كية ... يعطيه فقصة فيهم .. يكبو .. يكبو .. يكبو .. هههههه - انا والله تصدمت .. صحيح هوا من لول حاطط عينو عليها... اما ماتوقعتوش يعملها و يخلوض بيناتهم .. - توقع منو كل شي اكا المنزوس (هههههههه) ... لفتت راسها تثبت في الباب لا تدخل فتنة و مايفيقوش بيها ... ماتحبش تجبد سيرت محمود قدامها ... بين روحين و العصب مش ياهي ليها .. اصل هي وين تسمع سيرتو تهيج و تعمل فيهم .. يمكن من الوحم و يمكن من الوحش ... اما الاكيد انو زادة من غلها عليه ... - انا وقت لي دخل عليا مراد محملها و هي دايخة بين يديه ركايبي تخلخلو ...مشيتلها نجري ... نلحلح بيه نقلو يا وليدي فهمني شنوا صاير ... و هوا لا عطاني لا صرف و لا حرف ... حطها فوق الفرش و دور خارج ... قتلو على القليلة قلي شبيها دايخة ولا راقدة ولا ميتة .. قلي لا لباس .. تاعبة شويا .. رقدت في الطريق ... مدلي ساشي متع دوايات و قلي امي جاية في الطريق توا تفهمك .. زدت حرت .. قلت خديجة مش من عوايدها تجي من غير ما تعلم .. و كيف زدت سألتو على سي مختار اذا جاي حتى هوا ... قلي لا و طلع في كرهبتو و خلاني نغلي وحدي ...خديجة كيف نفكرت اكا النهار... حطت يدها على فمها و صارت تضحك بالشويا ههههه ...- ووووووه ... ملا نخليها لزياد .. و نخليه يحرق قلب ولدي هههههههه .... لا وألف لا ... كلمت مراد قتلو ايجاني توا اما مش بكرهبتك و فهمتو شنوا صار ... يجعل منو وليدي جاني طاير ... هوا زادة غاضو حال خوه .. قتلو خرجها و اسبق لحفصية و توا انا نلحق ... و لنا حفصية زادة بدت تضحك ههههه .. اصل هذي مش اول مرة حفصية و خديجة يحطو الراس على الراس و يعملو بعمالهم .. - اووووه .. يا نهارت لي يفيق بينا محمود هههههههه(مساكن ما يعرفوش انو مودي توا في طريق الفيرمة .. سويعة و يوصل 😈..يوصل هوا وخبزت القطو قد قد... اهوكا بعثتهولهم .. قولو ريما خايبة هههههه)
هههههه .. حتى انا خايفة والله هههههه ... حايرة شنوا اي باش يصيى توا يا حفصية ... و اكا حفصية زاد شدها الضحك .. خديجة بهتت تضحك معاها و مش فاهمة السبب .. - وووه ضحكني معاك يا وخيتي .. - ههههه .. نضحك على اكا المعبونة مرت مراد .. كيفاش تطلب فيا في التليفون و تتيتم ... ههههههه .. خايفة مرعوبة من محمود .. قلتي يا امي حفصية والله لوكان يفيق بيا نمثل عليه نهار الكلينيك ترا اش يعمل فيا ... - ههههههه ... اييييييه .. انت ماريتهاش يا حفصية نهارتها ... شعرة ولا تفضحني هههههه ... مسكينة قليلة و قلبها طيب و تحب محمود .. قتلي هوا بو بنتي هههههه .. - انا اخر تليفون عملت فيها .. قلتلها شد راجلك و اسكت ههههه ...و أووووب .. هما هكاكا ... و تدخل للات الزين و العين ... فتنة 😍.... اااااااعععععع ... زادت حلت و زيانت و ولت تهاااااااااااااابل ... لابسة روبة فضفاضة متع نوم بيضة و فوق الركبة ... مصور فيها la reine de neige متع اكا الصور المتحركة ... شعرها لي كيف الليل مفرود على طولو ... قسمتو في ثنين و سابلتو على صدرها ... و واصل حتى لأخر كرشها ... اكا الكريشة صحيح صغرونة أما بدات تدور و تتكعبر وتبان شويا ... و لابسة في صقيها صباط متع دار على شكل قطوسة بيضة عويناتها زرق و فيها papillon روز كبيرة ... اش يستنا فيك يا مودي ههههههه .... انوثة لا تقاوم ... وجها إدور وزاد حلا اكثر ... اكا الفيم الصغرون شفايفو روز يشهو .. واكا العيون الڨري مع انهم ذابلين بالنوم اما باقين يقتلو .. واكا الشفار المبرومين الكحل تذبيلتهم تذبح .. ههههههه... دخلت تتكسل ... اما اول ما شمت ريحت القطو عيونها تحلو على وسعهم ... تشم في الريحة .... تقرب للفور .. تصفق ... و تحكي بلهفة ... - ياااااااااااا .. امي خديجة الله لا ينحيك عليا ... ياااااااااااا ... ربي يفضلك .. ربي يفضلك .... ههههههههه .. والله هي .. خبزت قطو بالليم .. هههههه .. ياااااااا ... - ايه يا للا ... عمتلك خبزت القطو لي شاهيتها ... اه مالا ... نخليو البيبي بشهوتو ؟ ... حفصية عوجت فمها مش عاجبها ... فتنة تدلل عليهم ياسر هالايامات ... و فتنة عوجت راسها تتبسم ... - امي خديجة ... عندك نوتيلا ؟؟ .. خديجة ضيقت عيونها .. عارفتها باش تطلع بطلعة .. - ايه عنا بنيتي .. هههه ... فتنة ضحكت ... - ايه عبيها بكلها بالنوتيلا من فوق .. غمضت عيونها ... ولحست شفتها ... و رمان امي خديجة .. اعمللها النوتيلا ... و فوق النوتيلا ... عبيها بالرمان ... ڨدمت شفتها بطريقة ياسر سكسي ... شهيتو عالاخر... ههههههه ... و لنا خديجة و حفصية تفجعو و تصدمو و يبسو و قلوبهم طاحت ... هههههه ... ليها مدو مشيبتلهم رييوسهم ...خزرو لبعضهم و تكلمو فرد وقت .. - رماااااااان ؟؟؟ فتنة استغربت من فجعتهم ههههه... هزت اكتافها بكل أرياحية و تكلمت ..- ايه رمان .. عادي شفيها ... حفصية ڨحرتلها ... وتكلمت بصوت مكبوس .. - منين نجيبوهولك احنا الرمان توا ؟؟؟ ... اعمل ربي في بالك موسم الرمان وفاء .. و زيد نصف الليل توا ... منين باش نجيبوه احنا منين ... ههههههه ... ( ايجا نقلكم فازا ... فتنة من لي حبلت تعلمت الخبث و التسكبين ههه )مشت تجري بحذا حفصية .. نحات صباطها و طلعت ركشت بجنبها فوق البنك ... دخلت تحت الكوفيرتة و عنقتها بالقوي .. - والله شاهيتو .. ريحتو باش تنقبلي مخي ... عدت يدها على كرشها كأنها تقلها شوف ... رققت صوتها كأنو صوت بيبي .. وبدت تحكي ...- ميمة حفصية ... باس (باش ) تخليني زيعن (جيعان ) .. من غير رمانة بنينة ! هههه .. حفصية تنهدت ... - يا بنيتي .. الصباح رباح .. منين باش نجيبو انا توا ! .. فتنة عيونها لمعت بفرحة .. - شوفتو .. انا شفتو عند عم علي عساس الليل .. مخبيه في بيتو ... برا قلو .. عندو والله عندو .. تهز في الكوفيرتة و توقف في حفصية .. برا برا ... والله عندو ... توا تلقاووه حاطو ورا الباب في شكارة خيش كبيرة ... اصل عم علي يسهر ما يرقدش توا ... برا خالتي حفصية و انت زادة امي خديجة برا معاها .. توا انا نحضر النوتيلا .. هههههههه ... خديجة و حفصية سلمو أمرهم لربي ... وخرجو في اكا الليل يدهكلو في الضلام .. ماشين لعم علي .. هذا عساس الليل لي عملو محمود على الفيلا .. راجل فلاح فقير .. تلقاو عندو الغلة بأنواعها .. يصبرها و يخبيها .. يسكن في بيت في الجنينة في مدخل الفيلا .. ههههههه ... دقدقت عليه حفصية الباب .. خرجلها يتثاوب .. اول ما راهم ...فد .. عقد جبينو و تكلم بطريقة منرفزة .. - لا حولا ولا قوة إلا بالله .. خديجة ضحكت خاطر عارفتو فادد منهم .. وحفصية ما عجبهاش كلامو .. شراتلو عركة .. - شنيا هذي لا حولا ولا قوة إلا بالله .. ناكر و نكير ترا فينا قدامك ! .. #ريما 💋
- شنيا هذي لا حولا ولا قوة إلا بالله .. ناكر و نكير ترا فينا قدامك ! .. ههههه ... عم علي غلغل عليهم .. كل ليلة مفيقينو من اعز نومة ... اما سكت .. حشم من للا خديجة .. - تفضل حفصية فاش نعاونك !!.. حطت يدها غي حزامهاربتلو راسها و حكت بصيغة الامر .. - جيبلي رمان .. ولنا عم علي غلغل بالحق .. سايي توا معادش فيها .. لازم يتكلم .. - شنيا غلبتك انت .. تضهرشي تتوحم !! ... كل ليلة و انت طالعتلي بطلعة ؟؟هههه .. خديجة نازلة كان على الضحك و حفصية شعلت فيه ... - حشمتشي على روحك توا !!.. - ربي يثبت علينا العقل و الدين .. - ايه آمين .. آجماعين .. برا جيب الرمان .. هههه .. عم علي حقرها و دخل يجيب في الرمان ... هوما هكاكا ويسمعو كان صوت موتور قوي ... باش يزلزل الأرض اصل عمال يقرب منهم .. وضو كرهبة متجها للفيلا .. كرهبة كل وين تقرب منهم تزيد تضهر أكثر ... BMW.. بيضة و صقفها بلار أكحل .. خديجة وحفصية يبسو و جمدو في مكانهم ... ههههه ... من قوة الصدمة خديجة نطقت من غير ما تشعر ... - محمود !! .. ايجا نهربو ..(هههه مودي وصل 😈)وقف كرهبتو قدام باب الفيلا وبدا يزمر .... و عم علي خرح يجري حلو الباب و يمرحب بيه .. و محمود اول ما راهم عقد حواجبو ... شنيا يعملو في نصف الليل لبرا ؟ .. هز يدو يثبت في الوقت في المنقالة .. زاد ستغرب توا الماضي ساعة متع الليل غير ثلث .. حل باب الكرهبة ... هبطوخلاه محلول ... حط يدو في مكتوبو و بدا يقربلهم مستغرب ... يمشي بكل وهرة ... و كيف العادة ريحتو سابقتو ... قرب منهم بقا يثبت في وجوهم .. باينين مربوثين عالاخر .. ويهربو في عيونهم عليه .. هههه(الخوف يعمل ههه)..كبس روحو و سأل بصوت ثابت و قوي ما يعبر على شي .. زاد دخلهم في حيط و ربثهم اكثر .. - اش فما !! .. شبيكم البرا ... خديجة عيونها تحلو من الفجعة .. كبست على يد حفصية بالقوي و سكتت .. و حفصية عملت فيها مغششة منو و باش تحقرو .. اما من داخل حتى هي مفجوعة والله ههه .. و هوا زاد فد ... عدا يدو على وجهو بعصب و تكلم ...- تي شنيا توا .. وحدة فيكم تجاوبني ! .. ههعهعهه .. بخروج عم علي .. في يدو 4 رمانات و يدوح في راسو ... مد يدو لحفصية باش يعطيهملها وبدا يحكي .. - وليدي هاك كيما ترا ... كل ليلة جايتني عقاب الليل و طالعتلي بطلعة .. عم علي يحكي و مغشش عالاخر ... لدرجة انو ولا يضحك... - هاو فراز .. هاو توت ... هاو بمباز (فرمبواز ههه ) ... هاو كيكي ولا كيكو ولا شسم عزاه (كيوي ههه )... و الليلة جاتني جلدية ... قتلي رمان ... هاذا عالاقل مقدور عليه ....علي يحكي ... و خديجة و حفصية مطبسين ريووسهم في القاعة و يتغصورو ... و محمود مركز معاهم عالاخر .. عاقد عرنينو لدرجت انو اكا الخط لي في وسطو بان ... شد روحو .. شد روحو .. وبعد نطق... - تتوحم حفصية ؟؟؟