فتنة الجزء الثالث

43

الحلقة 135

فتنة دوب ماشدت روحها ولات تحب شهر عسل للمالديف و معها منى الي حرنت تحب تمشي
تعدي أيام غادي كررت معاها سليم
مودي : اكهو هذا اش نقصني كان سليم الماسط وين نمشي شاد جرتي ياخويا اعتقني
سليم : انا خاطيني اختك هي الي كرت عليك
مودي : باهي يا منى لحكاية هذي تو نتفاهمو فاها

الأشهر متع حبالة فتنة جات صعيبة تعبتها و تعبت جماعة معاها و زيد حبلة بتلاثة تعدات ليامات بحلوها و مرها هام تعاركو هام تصالحو
لين شدها الحس العايلة الموسعة في بالها فتنة ولدت في سابع لكن هي تسعة شهر كي عرست كانت داخل في الشهر الثاني لكن كان كعبتين و كعبة في بالهم بالحكاية
ولدت جات زوز ولاد سامهم بوهم على اسم اولادو الي ماتو ليث و أمير و بنية سامتها امها فاتن خاطر جات تشبهالها راهم محلاهم يتقرمشو
بولادتهم و الفرحة الي دخلت في قلب محمود  ولا انسان آخر يا حسرة عل محمود القديدة الي تقولو هذا كان مصعاب يكذبك و لا يفذلك و الضحكة ماتفارقوش  خاطر وجيعتو اوفات بولادة صغارو نواراتو اش خلى محمود يتصالح مع بوه
مودي : بابا الغالي نعرف روحي قسيت عليك ياسر لكن مش مني من اوجعتي لكبيرة تو نحس اولادي رجعولي و رجعت فيا الروح ديما كنت نحسهم الي هوما معايا مافرقونيش و لو لحضة و تو هام رجعو و مارجعوش وحدهم رجعو و اختهم معاهم
مختار : اعز حاجة عندي اني نراك فرحان
مودي : نعرف يابابا و انا طالع كلي ليك في كل شي نسخ منك قد ماحولت نبعد عليك  نلقي روحي ديما في ظهرك و نحامي عليك انت راك بابا عمري ماننسا فضلك و تعبك و اشقاك بش كبرتني قد ما قسيت عليك كل مانغزر في عينيك ما نلقى فيهم كان الحب و الدفء قد ما قتلك كلام يوجع قلبك كان معبي بشوق ليا انا كنت نفهم احساسك رغم اوجعتي لانو احساس الابوية مايعرفو كان الي جربو و عاشو و انا عشتو و نعرف اش معناها ولدك يبعد عليك و انت ليل نهار في كل لحضة في كل غمضة في كل ثانية تتمني تشوف ولدك بين حضنك تضمو الصدرك تشبع بريحتو و عمرك ماتشبع انا قد مانحكي مانجمش نعبر عل الفرحة الي نحس فاها كل ما نجي نتكلم لساني يخذلني مانلقاش الكلمات الي بش نوصف بهم الاحساس الي انا نحس فيه تو نحس في قلبي بش يخرج من صدري من كثر الفرحة  مانحكيلكمش عل كمية المشاعر الي بيناتهم محمود كان يكلم و صوتو كلو بحة و حنية و شوق عينيه تعبات بدموع كيف كيف بوه
عنق بوه و فرحة ملية عينيهم تقول عندهم برشا ماروش بعضهم صحيح هوما يراو في بعضهم كل يوم اما كانو متفرقين محمود الي يتظاهر بالقوة قداش كان متوحش حضن بوه لحنين مزال فيه اك الطفل الصغير قد ماكبر يشتقلو  و بوه قداه كان متوحش ولدو بين يديه مشهد ما يتوصفش يتعاش

كانو جماعة كلهم ملمومين فرحانين  حتا مريم كي سمعت الي فتنة ولدت جات اما ما جاتش وحدها رغم الاجواء لمكهربة بينها و بين محمود لكن يقعدو ولاد عم رغم كل شي
مريم : نقدملك هذا يوسف تعرفت عليه في فرنسا و هو جا معايا عندو مايقلكم
يوسف : مرحبا تشرفت بمعرفتكم حبيت نقلكم انا جاي بش نطلب يد مريم من عمها او بوها الي رباها
مختار : الي فيه الخير ربي يكتبو بنتي المهم انتي فرحانة و اهم حاجة أنو يكونو اولادي الكل فرحانين
مريم: و زيد ان شاءالله عن قريب نحل مشروع قاعدة نحضرو
مختار : ايا مبروك مشروع متع شنوة
مريم : شريكة مركا متع حوايج
مختار : ايا باهي كي ألقيت حظك في الدنيا خفت لا يطلع معندكش حظ
مريم : حظي جا مع يوسف الي عوني بش ناقف على ساقي
يوسف : لا حظك جاك كي عرفت قيمة روحك كل شي عملتو انت الخدمة خدمتك انتي الي تعبت و نلت 
الديفيلي عملت انتي انا ماعملت غير التصوير
منى : عملت ديفيلي و ماتقولش
مريم: ايي و اخيرا عملت ديفيلي بعد تعب ليل و نهار و ان شاءالله مزلت بش نعمل ديفيلي في تونس نهار افتيتاح الشريكة
منى : اكهو الي يتعب ينال
مريم : و الفضل ال يوسف الي آمن بيا و اوقف معايا
و ماخلانيش
يوسف : لا مانخليكش و نعاود نقلك كل شي عملتو انتي انا فقط شجعتك
مريم : انتي حليتلي افاق عرفت بيا و بخدمتي راهو كلو فضلو هو ماتصدقوهش يوسف هذا فوتوغراف يخدم مع ارقي المجلات
يوسف: قتلك ماتبلغش
مختار : المهم وصلتو للي حبيتو عليه ان شاءالله كل شي بإتمامو كنت فرحان خاطر مهيب عرسو عن قريب تو فرحتي ولات فرحتين و ان شاء الله ديما ملمومين
مريم : مهيب بش يعرس بشكون؟
مختار: بطبيبة فتنة طفلة ماشاءالله علاها
○○○○○○○○○○○○○○○○○○

الفيلا المهجورة رجعت ازين ملي كانت البيسين ولا كوفارت قول رجعت ازين من قبل جنينة واسعة كلها ورد منين ادور ترا كان الخضار و ماتسمع كان صوت الضحكة صوت صغار يلعبو في الجنينة في الدراجح هو صوت اصغار بركا لحظة لحظة هو ثما صوت واحد غرمول كبير ههههه ايي هذا محمود حاطت فاتن على اكتافو و يجري ليث و امير يجرو اوراه  تلاثة سنين و هو على الحالة مدللهم ماخلا ماعمللهم كل مايروح مل الخدمة يجبلهم حاجة في يديه و يدخل دراكت يسلم عليهم بتعنيق و البوس و كيف الصباح كي يجي ماشي فتنة و منى  قاعدين في  كراسي عل لحشيش يترشفو في القهاوي و ميرال و جاد اولاد منى يلعبو قدامهم

و هكا توفا حكايتنا ماحبيتش انطول ياسر على ماهي طويلة ان شاءالله تكون عجبتكم و ان شاء الله تكون وصلت الفكرة الي حبت توصلها الكاتبة مع اني انا زدتها رسايل اخرين و اعطوني رايكم