رواحل .و. أفتداء

ح ١

حكاية * رواحل .و. أفتداء

بقلم * فراقد حسن علي

الحلقة * ١ *
÷÷÷÷÷÷÷÷÷÷÷÷÷÷÷÷÷

سبحان الله العظيم وبحمده ....
سبحانه من إله ما اقدره ....
وسبحانه من قدير ما اعظمه ....
وسبحانه من عظيم ما اجله .......
وسبحانه من جليل ما امجده ....
وسبحانه من ماجد ما ارأفه....
وسبحانه من رؤوفٍ ما اعزه ....
وسبحانه من عزيز ما اكبره .......(( دعاء جبرائيل ))

-أني متعودة بعد صلاة المغرب لأزم أقرأ دعاء
او كم صفحة من القرآن ...

- صوت مرأه يلعلع ويسمعه سابع جار
:- فدووووى ومررررض وينج

- زفرت نفس بضوجة
وذبيت حسره من صدري شلعت حياطين هاي المهجومة .

كلت بصوت ناصي ويه روحي أبعد غضب الشيطان عني
:-أستغفر الله العظيم من كل ذنب عظيم ....

-طبكت كتيب الدعاء وبقيت لازمته بقوة
صارلي يومين من أشتريته...
من رحنه زياره للنجف أني وأمي ...
زرنه أبو الحسنين علي ....
ومناك زرنه الناموا بالكبور وعافونه للذله .....

-وهم صارت مشكله علمود الزيارة...

-خالي السبع ( بس براسي وبراس امي ) ويم مرته
دجاجه مال شركة ....
سوالنه هوسه / شلون تروحن للزياره وما كتلي ؟!

-هو جذاب عندة علم
وهم أمي وصته جابلها لحم مثروم سوت بي كبه اخذناها ويانه ثواب

-ويعرف كلش زين احنا كل خميس و جمعة
نروح ويه أم هادي صاحبة الحملة للزيارات
بس حجة شلون مرته السعلوه ما راحت
حشمته علينه ....

-رجعت صاحت أبتسام مرت خالي صوتها صوت رجال
:-فدووووى كون الطرش مو صار ساعة أصيح عليج

-عصرت الكتيب بين جفوفي بقوة...
وهن شلون جفوف يلعبن ستين نفس من الشغل والكراب...ايدين العجايز أحسن من أيديه.
بقيت أعصر بالكتيب من القهر ....
حسيت أصابعي نبتت بالورق .

-أبودي أنزل أكطع أبتسام تكطع ....
بس اااخ كله من أمي هي الوصلتنا الهاي الذلة .....

-باوعت على أمي تون ....
وشاده راسها بالربطة ونايمة ... مريضه ومالها خلك .
خالي ألسبع دفعها...وصيح عليها من رجعنه
وهي كلش أنهضمت...وعلك ضغطها وسكرها

-وهم محموسه بالقهر على ضيم خالتي....!!!!!

-هي أشرتلي بيدها كومي بدون ما تحجي شي ...
صوت أبتسام يلعلع جوة.

-نزعت أحرام الصلاة بسرعة ... وقهر ... وغضب
ولفيته هو والكتيب والتربه والسبحة بداخل المصلايه وخليتهن على الطبله .....

-لبست شيله على راسي وطلعت من المهجومة...
والله أستاذ مهتدي دخل ثالث متوسط
ولازم ألبس من يمه حجاب .
لك مو من انت تبول بالحظينه نايم بحظني
واني أغسل... واشطف ...وابدل ...وأوكل ...وأشرب
هسه من صار طولك شبر لأزم ألبس منك حجاب ...