رواحل .و. أفتداء

ح ٦

حكاية * رواحل .و. أفتداء

بقلم * فراقد حسن علي

الحلقة * ٦ *
÷÷÷÷÷÷÷÷÷÷÷÷÷÷÷÷÷

أفتداء:-

من خلصت العشه جوة بيت خالي ألسبع وصعدت...
لكيت أمي تخابر بخالتي خديجة أم يوسف وتبجي ...
والله هي سكرها وضغطها معلكات...
من قهر خالي ألسبع دفعها ...
وسواله هوسه من رجعنه من الزيارة ...
سوة نفسه ما يدري بروحتنه ...
وأنوب أجاها قهر خالتي ...
الله يساعدها على ما بلاها بيها البشر .....

كلساع وكالت :- يمه شو اتصلي على بيت خالتج
اتصل الها على رقم يوسف ...
بس يرن أنطي الها ...تحاجيها أحلام ...
ومرات يجاوبها يوسف...

يالله متنه من القهر ...من عرفته عبدو الطفل الصغير مشنوق ومشمور على الشارع ...

أمي فرفحت...تريد تروح تواسي خالتي على مصابها
خالي ألسبع منعها كاللها :- بس يلكفوج شيعيه
يذبحوج ويشمروج بالمزبله ...ما عدهم حرمه للمراه
يشفونج كافره ....

والله أجتنه خالتي ختام ...
وياها بناتها.. وولدها ...
ورحنه نصبنه عزة بيت خالي يعقوب على ضيم خالتي
يعني بيناتنه أمي وخالتي ... ونسوان خوالي
كاعدات ونقرأ قران للطفل ... وسوله صينيه ...
ووزعنه ثواب على روحه ...
وبقت أمي تقرأ قرآن دفعه بلاء عن بيت خالتي

ويمكن ثالث يوم ألعصر وتدخل أحلام علينه
باب بيت جدي الرئيسي وعاطت:-يخوووووالي أجيتكم مسبيه ....

خلت طفارنه بفلس....خوالي فزعوا على صوتها
ونسوان خوالي تلكنها ...
أمي وخالتي تخبلن من شافن خالتي هي والميته سويه ... نايمه بالتكسي

خالي حميد حاسب أبو التكسي
بس هو خطيه ما قبل ياخذ كروه ...
وهو بنفسه أخذ خالاتي وأمي وطلع بيهن للمستشفي
يكول :- أني هم خال الحرمه ....
وأنوب لحكوهن خوالي وإحسان ...

أني ونسوان خوالي كابلنه احلام
وهي المسكينه ملخت نفسها ...
تلطم على أبوها خطيه كاتلينه وشامرينه بالشارع ...
وتبجي على أخوها الطفل المسكين ...
وتبجي على حظها رجلها مطلكها ...
وأنوب منطيها الجهال ما يريدهم ....

بعدنه بهوستنه ويه أحلام...
أجانه خالي ألسبع وياه جماعته
والله جماعته خيريين حرامات يمشونه وياهم...
كال :- خابرني ابو عبدالله ( عم يوسف )
جايبين ألمرحوم أبو يوسف لهنا ....
وباقي عمام يوسف هم طلعوا من هذيج المنطقه
ألحمد لله كلهم سالمين وكلهم جايين علينه...
نقيم العزاء بيت أبوي...

وبعدها... اسم الله هوسه الفاتحة
وخبصه الناس ... وبنات خالتي يكسرن الخاطر
يلطمن على أبوهن ... وأخوهن .. وامهن
الله يساعد كل واحد ينسلب منه شخص عزيز على كلبه ....

خالتي المسكينه أنجلطت ونشلت نصفي ....
أمي بقت وياها...بكل أيام الفاتحة.
هتاف مرت خالي حميد راحت تساعدها
لان خالتي ختام رجعت علمود بنات خالتي توكف وياهن بالعزة ..