رواحل .و. أفتداء

ح ٢٦

حكاية * رواحل .و. أفتداء

بقلم * فراقد حسن علي

الحلقة * ٢٦ *
÷÷÷÷÷÷÷÷÷÷÷÷÷÷÷÷÷

ولإن الـخيبـات قـطَّعَـت أحبــالنـا الصــوتيـة
نحن نصمت بدلا من أن نصرخ ..!؟
كل هذا الصمت ، صرخات في الأعماق .💔

أفتداء :-

ظلاااام بظلاااام...

ما أدري نمت...لو فقدت...جسمي بعد ما أحس بي.

أحس أكو صوت يروح ورجع شلون من يرجع صدى رن الحديد بمكان فارغ...

كلبي أحسه أنعصر ومن قوة العصره حسيته تمزق...

هذا الظلام شكد ما خوفني شكد ما حسيت بي لذة غريبه...سحبني لمكان عميق...مثل كومة رصاص
وشمروها بنص بحر وبسرعة هبطت للكاع.

حسيت نغزه بيدي...نزيت منها...
ورجع سحبني هذا الظلام اللذيذ...

دماغي وجسمي أحسه يصحه...بس عيوني ثكيله
يعني جفني ما عندي قوة ارفعه.

ما أدري شيصير ويايه...ما أعرف شنو حالتي
يمكن نايمه...يمكن فاقده...ما أدري
حسيت بصدري ينغزني وصوت عبس أجه بذاني.

أيد دافيه تمسد على راسي...وصوت صارلي سنين وسنين ما سامعته...أنطبعت بوسه دافيه على كصتي
وكالت:-عفيه بالحبابه ،،،عفيه بالبنيه .

يلا بيبي كومي شووو شوفيني طولج الحلو...

هذا ثوبج الجديد كلش حلو...منو خيطة الج..؟؟؟

ماشاء الله صايره مرأه عين الحاره بارده عليج...

يلا بيبي كوومي جبتلج علاكه عنب صوغة بس الج أعرفج تحبينه...خلي بس ألج....وأعذريني أجيتج متأخره...وهاي صوغة الحبايب خرنوب...
حسيت ضمت شي بصدري جوة هدومي.

ما ادري شوكت أنام لو شوكت أصحه...
فاقده السيطره على روحي وجسمي بالكامل
فتحت عيوني جفوني ثكيلات...
نظري مغوش شكد بقيت أرمش يلا وضح عندي الشوف...ألساني مخشب...
أيدي ما عندي قوة أشيلها...
أريد التفت ما أكدر راسي صاير عباره عن صجمة جبيره يرج مخي من الصداع.

باوعت منا..التفت منا هاي مستشفى وردهة نساء
وماكو لا أمي ولا وحدة من النسوان اقربائي يمي.
حسيت بغربة...بوحشه...بخوفة.

أريد اسأل هذني النسوان الغربة النايمات يمي
لساني مخشب...

باوعت على الحماله الأستيل الطبيه شكد معلك بيها
قوارير شي فارغه...وشي بعدها...وقاروه واصله بيدي.

اجتني مرأه غريبه من السرير المقابيلي
كالت :- هااا خيه صحيتي الحمد لله على السلامة
خيه شمالج هيج روحج رخصة عندج وسلمتيها تراب