رواحل .و. أفتداء

ح ٩

حكاية * رواحل .و. أفتداء

بقلم * فراقد حسن علي

الحلقة * ٩ *
÷÷÷÷÷÷÷÷÷÷÷÷÷÷÷÷÷

أفتداء :-

أني وأمي رحنه ويه خالي يعقوب لبيتهم...
كلش أحبه...أموت عليه وعلى مرته خاله فريال
أموت على بناته... اضحك على اسمائهن
كلهن بحرف ر ( رشا ،،رنا،، رغد )
وهن هم حلوات وصغار وحده على راس الثانيه.

خطيه خاله فريال مريضه...طالع عدها بالتحاليل
حمى مالطه أسم الله...
الدكتور يكلها :-هاي العدوه تصير من أكل جبن العرب
وهي المسكينه منتهيه من الصخونه القويه...
وجع عظامها...وعدها هبوط من كثر العرك
اتعجبت مصخنه وعركانه بنفس الوكت.

أمي دارتها واهتمت بيها...
أني أستحي أدخل وياها للحمام ...
أمي عادي عدها تدخل تساعدها تسبح،،،لو تبرد روحها.

اني أهتميت بالبنات،،وبالبيت
أني كلش شاطره بشغل ألبيت
كلشي أعرف أسوي،،،أمي علمتني على كلشي
بس بطيئه بالشغل ،،،وليش بطيئه لان أشتغل من ضميري اخلي روحي بالشغله،،،ما أعرف اشتغل شلون ما جان...

وأمي وخوالي يحبون طبخي
أخذت شمرت أمي بالطبخ...هي أمي تعلمت على أيد بيبي ألله يرحمها...

بس عندي شغله أضوج منها...
كون أني يفروني بالغساله ولا وأحد يكلي غسلي الهدوم لو سفطيهن من ينشفن...
أتخبل من شي أسمه غسل الهدوم...
مستعده أنظف البيت كله...واشتغل ليل نهار
ولا اغسل قطعه هدوم وحده ...
لو أكو بديل.....
مثلا هدوم تلبس مره وحده بس،،،
نلبس القطعه منا،، ومن ننزعها نشمرها منا...
ياالله يسون عليه فضل لو يلكون اختراع لهاي أمنيتي...ابقى أدعيلهم طول عمري.

أني أشتغل وافتر...وعيني على خالي يعقوب
شلون مخبوص وخايف ويرجف على مرته
حتى لشغله ما راح...مكابلها وكاعد
وكلساع يسألها شلون صرتي ،،هاا أخذج للطبيب
لو كل شويه يطفر يشوفها مصخنه لو لا
يسأل أكلت لو شربت لو بعدها
يسندها ويوصلها للحمام ويه أمي
بليل خلاها تنام يمنه بالهول كلنه نمنه بنفس المكان
حتى أمي عينها عليها...

وأني كامت صفنه تاخذني وصفنه تجيبني
وصار بداخلي شعور حلو،،،وأحلام ورديه
هم باجر عكبه أحسان هيجي يحبني ويهتم بيه
هم هيجي يداريني ويخاف عليه .

وثاني يوم اجتنه خاله هتاف
أجتي شافت خاله فريال وشويه وراحت...
كالت جدري علنار...اجيت أسلم عليكم واشوفكم
خو ما محتاجين شي ...

وأنوب أجى أحسان جان جاي من شغله...
هو تخرج من الكليه بس ما حصل تعيين
وهسه يشتغل بمحل لبيع ملابس مال أطفال
بس شريك مو كل المحل إله...

بقى كاعد ويسولف ويسأل عن حال خاله فريال
بس كلساع يبوك نظره ويباوعلي...
أمي انتبهت عليه...وخافت خالي يعقوب يحس أكو شي لان يسولف وياه وهو يبوك عيونه عليه...
كالتله:-دكوم عمه غسل وأرتاح
وتعال هنا أتغده فدوى خوش مسويه باميا وتمن عنبر.