حكاية * رواحل .و. أفتداء
بقلم * فراقد حسن علي
الحلقة * ٢٨ *
÷÷÷÷÷÷÷÷÷÷÷÷÷÷÷÷÷
فَأَمَّا الْيَتِيمَ فَلَا تَقْهَرْ...
أفتداء :-
من صعدت فوك لغرفة نعلاء
وبعد ما شبعت قهر على الفرق الواضح بين غرفتها وغرفتي...أنتبهت اكو شي جوة ثكيل بنهايه الخبنه مال البرده.
نزلت طايره وكعدت خالتي وكتلها
:- يمكن نعلاء مخليه عمل بالبرده......
خالتي فزت مخروعه...وكفشتها كلهبرها بيضه
وعيونه جاحضة من الخرعة...عاطت بوجهي
:-قل أعوذ برب الفلق...ول يالمصكوعه وكع كلبي
شبلاج من عاب هل خلقه وبلا...
جاوبتها :- والحسين نعلاء مخليه عمل بالبرده
جاوبتني :- لو تصب العمل على رأس يوسف
ما يأثر عليه...ول أفهمي يوسف وعمامه والويلاد
محصنين...جدهم محصن ذريته من السحر
ودروب الشعوذه.
كتلها:-والحسين وروح غليص أكو عمل بالبرده
وشكد حاولت اطلعه واشوفه ما كدرت.
أمي كعدت من نومها وكالت:-انتي ليش صعدتي فوك
وشعندج اتفتشين بغرفة الناس...ولج يمه حرام
خالتي كالتلها:- ول دنهضي دحكي البرده
وخلنه أندحك تالي خبالات هل مصكوعه
ونلحك على الحرام...
أمي جاوبت خالتي :- يااا شجاج خديجة حتى أنتي صدكتي بسوالف غيره البنات.
خالتي كالتلها :- دنهضي يولي وفكي لجتها
هساع تلكيها تثكاله للبردة وهل مصكوعة اشلشتني
من صباح الله خير...
أمي كامت وصعدت ويايه من وره خشمها...
ركضت كدامها متلهفه ودليتها على مكان العمل
هي بقت تتلمس بهذا الشي الغريب...
ساعه بقت تكلب بي...تجيبه منا وترجعه منا
كالت :- هاي مو تثكاله،،،أستغفر الله يمكن صدك عمل
نزلت أمي ونزلت أركض وراها...
حجت ويه خالتي وكالتلها:- خديجة يمكن أستغفر الله هذا عمل...مو شكل ثكاله أبد ...
خالتي حجت بعصبيه :- يولي لا تجلطيني
عليش ادحكين بوجهي...اصعدي وطلعلي
و جيبي هين لا تفتحي غادي...
لا يأثر إسم الرحمن حافظنه.
صعدت أمي وإني أركض وراها
متلهفه عبالك لكيت كنز مو طيحان حظ
أمي هنا خوش فكرت...
وكالت :- ما أسحبه من هاي الجهه حتى لا ينكشف
واحد مطلعه وساحبه...
نزلت جابت موس وأبره وخيط...
وكعدت بكل هدوء فتكت الخياط من نهايه الطرف الثاني...وعلى كيفها حركت هذا العمل وسحبته منا ورجعت خيطت البرده خياط مدفون حتى لا ننكشف
أني خفت الزمه...
هو فد شي أسود بكبر نص جف الأيد
وملفوف بشريط لاصق عريض...
أمي جكته وشالته بالابره...وكالت:- أطلعي وكلشي رجعي مثل ما جان...
أنت تقرأ
رواحل .و. أفتداء
ChickLitعليك اتسودنت مو بس أخاف أعليك... أحل روحي و أكضّك خايف تحلّك.... و أغمَض من أشوفك و أخدر أعله الصوت.... غلطة أنته بحياتي و صعبه ما ازلّك.... چم إبليس أطرد من يوزني أعليك..... و چم شيطان أرجمه أبروحي و أكتلّك...... ما صيرن نبي بس راهب آنه أوياك..... ...
