رواحل .و. أفتداء

ح ٢٧

حكاية * رواحل .و. أفتداء

بقلم * فراقد حسن علي

الحلقة * ٢٧ *
÷÷÷÷÷÷÷÷÷÷÷÷÷÷÷÷÷

على اتفاقنه مو٠٠٠ ما مراجعه الحلقه نغلس مو 😁

حبيتك شجاني
وما حسبت احساب
خيعونك عليه ... مو انة خيعوني

أفتداء :-

أحس نفسي تندمت لان تجاوزت عليه
وشبهته باللكمه المعلوسه...
لا وأنوب واكعه من حلك غيري...

هسه أني شجاني وحجيت هيجي...
منين جبت طوله اللسان...

والله من حركة كلبي كمت اشخبط وما أعرف أحجي.

أندفعت الباب ودخلت أمي
تدفع خالتي بكرسيها..
وعبس كاعد بحظن خالتي....

أباوع أمي عيونها صايرت جبدة حمره
ودموعها تمطر بقهر على وجهه
ما أدري ليش هنا صرت قاسيه وما انقهرت عليها.

كالت :- يمه كلبج ينطيج تفوتين وتتعديني
وما تسلمين عليه.

ولكم يا بشر...يا عالم...يا ناس...الرحمة حلوه
والله أحس بروحي بيوم وليله صرت عباره عن كومة قش واجتها لهبة نار وحركتها...

عطت على أمي وكتلها :- انتي أم انتي
ترى كلمة يمه مو سهله...وعوض كلمه يمه الجنه..

انتي بيش عوضتيني...من صغري ذليتيني...

الدنيا رمتلج بصغرج حالج حال آلالاف من نسوان العالم...حرمتي نفسج من الزواج مره ثانيه
شي راجع الج ويخصج...

كعدتي بيت اهلج وحصرتينه بكبر أني والمرحوم والله تخافين من البشر والدنيا...

صدام حسين عوضج عن كل هاي الخساره
انطاج سيارة بعدها بكريزها...
انطاج كاع...
أنطاج راتب أبويه وحوله باأسمج...
انطاج مبلغ محترم جان تكدرين تبنين بي الكاع ...
جان تكدرين بهذني كلهن تجمعيهن وتشترين بيهن بيت يلمنه بصغرنه وبكبرنه...

بس أنتي شسويتي سلمتي حالج ومالج
لأخوج السبع وأمنتي بي...
وهو أكلج من هل الفج لهل فج
اخذ حكنه أحنه اليتامه وأخذ حك أبويه الشهيد
وعود بكل نهايه شهر ينكط عليج بالقطاره...

يمه ذلتيني من حصرتيني بكبر بيت اهلج
ورجعتي حصرتيني بكبر بيت أخوج
وفوك الذل بطلتيني من المدرسه...
وبقيت أشتغل خدامه بيت أخوج...
والله الامريكان يخوطون بالشوارع...
الامريكان يعرفون بس فدوى المصخمه ويجون عليها
ويعوفون باقي بنات بغداد...

يمه أااخ يا يمه بس كليلي كلبج هسه مرتاح
من تشوفيني اتلوع والوج من القهر...

ولج يمه اتوسل بيج بس خلي نطلع ونهج
ما أكدر اتحمل أشوف وحدة دايحة تاخذ رجلي مني
وفوك قهري هو شاريها وميت عليها...
واني باعني بسعر التراب...