رواحل .و. أفتداء

ح ٢١

حكاية * رواحل .و. أفتداء

بقلم * فراقد حسن علي

الحلقة * ٢١ *
÷÷÷÷÷÷÷÷÷÷÷÷÷÷÷÷÷

(وَلَسَوْفَ يُعْطِيكَ رَبُّكَ فَتَرْضَى)

أفتداء :-

أباوع للدنيا شكد حلوه بعين أهلها ...

أحلام الف الحمد لله والشكر استقرت بيتها
جهالها بحظنها...ورجلها يروح ويرجع عليها
وهي شاطره وأم بيت...سوت بيت يخبل من الماكو
تجيب وتحط وتشتري وتعدل وترتب...

وشهاب ميت عليها...
والله أتعجب عليه عنده كلب لو كوستر
يكول أحب نسواني ثلاثتهن...

وخابرت خالتي ما شاء الله رجعت حبلت
وهو فد خايف عليها...تكول حتى يساعدني بشغل البيت...بس بالبسكوت ويوصي بالجهال كون ما يحجون...

وأمال عايشه بسبع نعمات هي ورجلها وجهالها
رجلها مشكور سبع وشاغول...
ومسوي سلف بمكان شغله..
ومشتري كاع أهله مايدرون بي...يريد يبني ويطلع عنهم...

وإيمان يوميه بليل تخابرنه على الخدمة
أني ويوسف ما نسهر أنام من وكت ...
خالتي وأمي يحجن وياها...
والصبح أسمع الاخبار التازه منهن...

رجلها قادر كلش خلوق وخوش رجال
وكلش يحترم أهلها ويريد خاطرهم.

أني احلف خالتي تسألي بس على بكر
أمووت عليه...مدبدب وشعره سرح
يمه أيده أموووت عليها هيجي سمينه ومدبدبه واصابعة صغار وسمان...ويضحك للهوا...

ويوسف ما شاء الله أرتبط بسلفه
وخوش مفكر بموضوع جديد
كال :-أمال هسه محتاجة للفلس علمود البناء
وتريد تطلع من بيت عمتي وتستقر بيت وحدها
أجمع جم فلس...وعلى قبضه السلفه أنطيها المبلغ...
ولازم يكون بكد مبلغ حصة أحلام
وتتنازلي بحصتها بهذا البيت.

خالتي كلش مكيفه على هذا التفكير
وهم سوت سلفه ويه خالي يعقوب
هو مشترك ويه أصحاب المحلات الوياه بالسوك
وخالتي نامت بركبته واشتركت وياهم.

والدنيا عد أهلها حلوه...
بس عندي وبذات بيوم سمعت شذى
حبلت مره ثانيه وعلى الأربعين كلش أنقهرت ونغثيت
تزوجت ورايه وبحظنها ولد...وهسه حبلت من جديد.

مااعرف ليش كمت أقيس فرحي وحزني
وسعادتي وتعاستي بموضوع الحمل
صار الحمل،، وفكرة الحمل هو شغلي الشاغل
وكل أمنيتي الاريدها من الدنيا...

وزينب هم بدت تشوف الدنيا سوده
السيد خوش ضبها...
وبده يطلع دلال خالتي من خشمها...

كل شهر تروح لبيت أهلها مره وحده وتبات يمهم
بس خميس وجمعه...

لبسها بوشيه غصبن عنها وعن إعتراض أبوها
كايللها :- بعد أنتي محسوبه علينه
وحالج من حال خواتي والجناين.