حكاية * رواحل .و. أفتداء
بقلم * فراقد حسن علي
الحلقة * ٣٣ *
÷÷÷÷÷÷÷÷÷÷÷÷÷÷÷÷÷
للغباء جناحا نسر،،،،وعينا بومة
حميت الجاي من جديد ليوسف...
ورجعت بسرعه كعدت كباله....
أريد أسمع كلشي يسولف بي عن نعلاء
:- يلا يوسف باشا سولف....
جاوبني :- يولي والله ماكو شي جديد
نفس ما حجيتلج كبل...وهساع اسولفلج من جديد
وره الكونه الصارت ويه النذل السايق الجان يشتغل وياي بنفس الكراج...وتعده على النسوان.
يمكن وره يومين ثلاثه ما أذكر
أجتني رساله من رقم غريب وعرفته يخص بنيه
كاتبه أشكرك ورحم الله والديك على موقفك.
ما اهتميت...ولا رديت
الصدك ما عرفت هي على شنو تقصد..
أنتي مو تعرفين جنت جثير أساعد بنوات خطي
وهن جثير معتمدات عليه
ودوم اسولفلج عنهن وهن خوش بنوات
أني حاسبهن خواتي وهن يحسبني أخوهن.
دك النذل دكته ناقصه وحرك كلبي بالمرحوم
لأن فزعت للنسوان أني وباقي السواق
وسبب دكة النذل نابعه عن حقده وحسد العيشه
الله شاهد ورقيب...أني ما عندي شي وياه...
وهو من أول ما بلشت بدوام ألخط ما تكبلني...
وهو اصلا قديم بالشغل ولازم الخطوط من سنين...
أنتي مو تعرفين طبعي أتخبل من زلمه يتعرض المرأه
لو يصجمها...لو يعترض طريقها
لو بي خير ورايدها من صدك يدك بابها عليش يلوص بسمعته وسمعتها.
المهم هو عليش يتخبل مني وما يكبلني
تعرفين بطبعي أحرص على بنوات خطي...
أنزلهن قريب باب الجامعه ما انزلهن بالكراج
والظهر أكف الهن باب الكراج و اوصلهن للخط...
وهاي أظل اروح وارد من الباب للسياره لحد ما يتجمعن...أخاف عليهن غادي بلاوي وصكعات تصير .
هو جانت عاجبته وحده من بنوات خطي
زعم عاجبته أخلاقها ويريد يخطبها لإبن أخوه
أني جنت جديد وبعدني ما عرف كل الزواغير
سألت زلمه خير عنه وهو صدك يريد يسعى بحلال الله...جاوبني:- هذا نذل يدور صيدات
ويعشم البنيه بحجة الحب والزواج وبعدين ما ياخذها...
واذا كالك أريدها لفلان أحسبه هذا متراهن وياه وشوف شكد يكسب من الرهن.
دير بالك من يمه على الامانه العندك يقصد على بنوات خطي...ترى هذا النذل كاسر اثنين بنات وقشمر عليهن وما أخذهن...وهو يتفاخر بين باقي السواق بفعلته النكسه يكول:- هي غبيه وصدكت
شبيه أتزوج وحده مثلها بايعه روحها...
أني من يوم ما سمعت هذا الحجي الجايف
حرصت أكثر على الأمانه العندي...
واتفقت وياهن انزلهن الصبح سويه باب الجامعه
والظهر يتجمعن باب الجامعه واشيلهن سويه.
أنت تقرأ
رواحل .و. أفتداء
ChickLitعليك اتسودنت مو بس أخاف أعليك... أحل روحي و أكضّك خايف تحلّك.... و أغمَض من أشوفك و أخدر أعله الصوت.... غلطة أنته بحياتي و صعبه ما ازلّك.... چم إبليس أطرد من يوزني أعليك..... و چم شيطان أرجمه أبروحي و أكتلّك...... ما صيرن نبي بس راهب آنه أوياك..... ...
