رواحل .و. أفتداء

ح ٥

حكاية * رواحل .و. أفتداء

بقلم * فراقد حسن علي

الحلقة * ٥ *
÷÷÷÷÷÷÷÷÷÷÷÷÷÷÷÷÷

يوسف :-

بالبدايه مااهتمينه للتهديد ...كلنه واحدهم يعوي ...
وحسد عيشه ...

بس من انخطف ابن عمي مو صغير بالثاني متوسط ...
ما خلينه مكان ما نبشانه عليه ... ماكو أختفي
ألولد فص ملح وذاب ....

ويومين ويجيبه النه أبن عمي فلاح...
هذا من أنظم لل..... صار وهابي سلفي أصلي ...
لحيته واصله لصدره ...
دشداشته قصيرة ...جوها السروال ...
والعرقجين البيضه ما تنزل من راسه ...
ويصلي وياهم بالجامع...وكله عنده حرام ولا يجوز ...

وعقله حشاه طين ...
☆من اقتنع بفكره خبط الخيار والطماطه حرام
ولازم ما ينجمعون بنفس الماعون ...

☆من اقتنع بفكر شرب المي البارد بالصيف حرام
لان بعهد النبي مجان أكو ثلج ....

☆من اقتنع بشرب الجكاير حرام
لان بعهد ألنبي ماكو جكاير ....

☆من اقتنع بزيان الحفر حرام...لان يتشبه بالكفار.

☆من اقتنع بفكره السني لازم يطلك مرته الشيعيه حت يوقفون تصاهر بين المذاهب ...

هذا فلاح سوه بس شغله زينه بحياته ...
من رد ألولد لحظن أمه ...

هو جاهل بعده هساع ناجح لثاني متوسط ...
شابعي طن كتل...وكارضين أذنه...ومعلكي فلقه ...
وذابحينه من الجوع والعطش ...
رد بس النفس يصعد وينزل من الرعب والخوف والجوع ...

عمي ما صدك بس رد وليده سالم
الكف حرمتك...وجهالك...وشكو شغله ثمينه عدهم
خلاهن بسيارته ... وشرد البابل ... يم أهل حرمته
كال :-البيت والحلال يجن...بس جهالي ما يتعوضون.

ويوم على يوم تكثر مشاكلنه على سالفه المذهب
وأنتم من يا مله ...

وتصبح أختي ألجبيره أحلام...لأخذها أبن شيخ الجامع تبجي وتنوح باب حوشنه ...
هااا ... شكو ... ؟؟؟؟؟
مطلكها رجلها ... !!!!!!
ولاكح جهالها وياها بنيه ،،، وصبي صغار ...
يكلها :-أنغشيت بيكم طلعتم روافض
حسبالي بس جدتكم شروكيه ...
مانعرف بيكم أنتم شروكيه متخفين بعبايتنه ...

أني دمي فار على أختي أحلام ...
وادحكها شلون مكسوره ... وأهجسها أنذلت
أخذت أصخريه ( توثيه او مكوار ) وهديت على زلمتها ... وشيصر خل يصير ...

دكيت باب بيتهم طلعتلي أمه ...
عدت وصفت عليه لحد ما ملت لان هاد عليهم ...
تلعلع بالشارع تصيح:-أنوب علينه الشروكيه الانجاس يالمجوس الله يلعنكم بالدنيا والآخرة .

ما حاجيتها حرمه شريد أسويلها
اذا أريد اذلها أهد عليها جاهل يمعشها
أني أريد نسيبي النذل أريد أشرب من دمه ...