حكاية * رواحل .و. أفتداء
بقلم * فراقد حسن علي
الحلقة * ٤ *
÷÷÷÷÷÷÷÷÷÷÷÷÷÷÷÷÷
يوسف:-
أدحك شلون ابوي كاضب أمي
ومسلهم عيونه عليها ... وهي توزع ابتسامات ...
يالله لطفك.... ناااار وشعلت بجوفي ....
ما أعرف شصار بحالي....
مشيت للغرفة الجوه وانطمرت على وسادتي
ولفيت راسي أريد بس عيوني تغفى وتأخذ نوم
ظليت الوج مثل السمجة المزوهره ....
أني بهذا عمري ماعندي اي فكره عن علاقه الأزواج
المتكون براسي...الزلمة يتوسد طول حرمته بليل
غيرها ما عندي أي شي براسي...
حاير أفكر بالشغل... والعيشة...
يعني فكري بسيط على كد حالي ...
وحت رفجاني .... وبالاخص الفتره الاخيره ...
تقلصت علاقتي بيهم ظلوا جم نفرد ينعدون على الاصابع...وما نعرف نسولف بمواضيع أكبر من عمرنه عفنه لعب الشارع... ولتهينه بضيم العيشه
من تخيلت أبوي هسه حاظن أمي
ومتوسد طولها ...
ونايم يمها بدالي...وهم يغطي وجه بشيلتها ...
تخبلت عكل ما ظل براسي....
كمت من فراشي شايط
من غضبي ما دحكت هم حت غرفه وحدهم ماعدهم
وخواتي نايمات يمهم.....رحت دكيت باب الغرفة
طلعتلي أختي الجبيره عيونها طافيه من النعاس
كالت :- حدر ابوي نشد عنك وين غطيت ...
دخلت جوة خواتي الباقيات يشوخرن ...
وأمي نايمه بمكانها ....
وأبوي متوسد فراشه نايم على غير جهه....
وهاي أختي راحت نامت بفراشها ...
أني نكزت وتوسدت طول امي...وغطيت وجهي بشيلتها وشبكتها بقوة يلا نمت مرتاح ....
الصبح حاجتني أختي الجبيره أحلام
كالتلي:- بعد عيب تتوسد أمي وتنام...
أنت صرت أزلمه باجر نزفك ...
وبعد أبوي موجود ترى ياخذ على خاطره منك
شكو نايم بطولها وحارم أبوي من عدها
من الليله كلنه أنام بالغرفة الغادونيه ....
ونبقي هاي الغرفة الهم عيب علينه ...
لازم نحترم خصوصيتهم ... .
سمعت كلامها وأمري لله
وكمت انام ويه خواتي بغرفة
وامي وابوي بغرفة....
ابوي يوم على يوم تستعدل حالته
راح للحلاق ... سبح ولبس هدوم جديده...
وكلساع غاطينه وجبة زلم من ديرتنه يسلمون عليه
وهو يكعد يسولفلهم من ساعه التأسر بيها...
لحد ما رد للديره .... وكل وجبه يذكرلهم شي شكل
من الاحداث الصارت وياه ويه ربعه
احسه يسولف الهم قصص مو قصه
ما عدا هذا اليعزمه على غده... وذاك على عشه
ويظل يتعلل الوكت متأخر ويه خطاره ....
هاي ما عده النسوان يجن يباركن لامي
بكرت عينها عن ردت ابوي سالم البيته وعياله
ويجيبن وياهن صوغات ما يجن ايدهن فارغه
والله شبعت كيك وكليجة ....
واكو جم مراه جابن وياهن صور تخص زلمهن
الي زلمتها... والي اخوها ... والي ابوها ....
لو واحد من كرابتها ... بلكت أبوي يتعرف عليه
ويطلع عايش غادي بعده...ويرد بعدين سالم لأهله
بس أبوي ماعرف وأحد بيهم ....
كال :- أحنه كل كم معزول عن الكم البسده
ما أعرف بس ربعي العايشين وياي بنفس الكم ....
أنت تقرأ
رواحل .و. أفتداء
ChickLitعليك اتسودنت مو بس أخاف أعليك... أحل روحي و أكضّك خايف تحلّك.... و أغمَض من أشوفك و أخدر أعله الصوت.... غلطة أنته بحياتي و صعبه ما ازلّك.... چم إبليس أطرد من يوزني أعليك..... و چم شيطان أرجمه أبروحي و أكتلّك...... ما صيرن نبي بس راهب آنه أوياك..... ...
