حكاية * رواحل .و. أفتداء
بقلم * فراقد حسن علي
الحلقة * ٣ *
÷÷÷÷÷÷÷÷÷÷÷÷÷÷÷÷÷
يوسف :- السلام عليكم ورحمه الله وبركاته
اسمي :- يوسف حمود العامري
مواليد:- ١٩٨٤
من سكان :- قضاء أبو غريب...
قضاء تابع المحافظة بغداد...
يعني أحنه من سكان أطراف بغداد...وديرتنا تربط بين بغداد والأنبار .
أحنه أباً عن جد...يعني أكثر من ٩٠ سنه ساكنين هين.
أعرف قضاء أبو غريب شبخ شبخ
أعرف كل قريه بي ...
أعرف أغلب أبناء العشاير من سكان ديرتنا ...
ومنهم ربعي ورفجاني من عشائر زوبع ... والشعار ... والهيتاوين ...والجبور... والمسارة ... والدليم...
البو علوان....والكرابلة...والمحامدة...وبني تميم....
وبعد جثير من عشايرنا ألمتألفين بعيشتهم البسيطة والطيبه تحت خيمة ديرتنا وخيراتها ....
أبوي من ألبو عامر......( أخوة علية )
يعني هو وعمامي مولودين هين ......
جدي عكاب من بداية العشرينات نازح من الكوفة
هو وأخوانه يعني (باقي عمامي الكبار )ومستوطن هين وتزوجوا من نسوان الديره وتصاهروا مع دليم
البو سودة ... والمحامده ... و زوبع
وما شاء الله عمامي اخوان أبوي ٦،واولادهم خير وبركه
كل واحدهم منهم عنده ٢ نسوان وثلاثة...
وكل وحده مخلفه درزن جهال...
يعني صبحنا اليوم عشيرة ....
ابوي مرته الاوليه متوفيه الله يرحمها
ضاربها ابو دمغه ( الضغط ) وكاتلها بمكانها
يسولفون عنها جانت أتحصد...وتموز شمسه تلهب
واكعه باللوح ( الكاع ) بين ماشايلينها و زاتيها
لمشفي الفلوجة العام متوفيه غادي.
جدتي من مغسلتها أحلفت وكالت :- بحجل رجلها
سنون عربيد ( ذكر الافعى ) يعني ملدوغه
وتوفت المسكينه ، الاطباء كالوا جلطه من الضغط
وجدتي كالت :- ما عرفولها ماتت ملدوغه .
المسكينه تركت وراها ٣ بنات
كلهن مواليد سبعينيات...
عاد أبوي بقى سنه وره وفاتها بدون زواج
وعنده صديق جان وياه بالجيش ...
الي هو خالي حميد أبو أحسان..صديقه الروح بالروح.
مسولفله عن قهر على بنواته الصغار
وشلون مقهور عليهن صح جدتهن مداريتهن
بس مو مثل باقي البنوات...
دوم أيدحكهن وسخات...وشعرهن معثك
وهو ما يعرف يداريهن...وحاله بالضيم من ينزل مجاز
خالي شاير عليه يتزوج ....
أبوي ما راضي لأنه يخاف عليهن من مرته الجديده
لا تأذيهن وهن يتامه خطيه ....
عاد كايله خالي :- اني انطيك رضيعتي تخاف الله بيك وبيهن ...
ابوي ساكت لان يعرف خالي حميد زلمه صاحب دين
واكيد رضيعته لازم تكون خيره ....
وصارت قسمة أبوي أمي .
أنت تقرأ
رواحل .و. أفتداء
ChickLitعليك اتسودنت مو بس أخاف أعليك... أحل روحي و أكضّك خايف تحلّك.... و أغمَض من أشوفك و أخدر أعله الصوت.... غلطة أنته بحياتي و صعبه ما ازلّك.... چم إبليس أطرد من يوزني أعليك..... و چم شيطان أرجمه أبروحي و أكتلّك...... ما صيرن نبي بس راهب آنه أوياك..... ...
