حكاية * رواحل .و. أفتداء
بقلم * فراقد حسن علي
الحلقة * ٢ *
÷÷÷÷÷÷÷÷÷÷÷÷÷÷÷÷÷
أني أبويه الله يرحمه هو مسميني أفتداء
من الوطنيه الزايده الكآبه بروحة ....
عود ينطي روحه فدوه للوطن.....وهل تحقق حلمة وراح شهيد دفاعاً عن الوطن ....
بس محد يصيحلي أفتداء...كل ناس يصحولي فدوى
او فدوه...وأني اتخبل من اسمي....
وبالذات من واسمع واحد يكول :-فدوه لله ...
لو فدوه للنبي .... لو فدوه للعباس...
لو شي ينكسر وصاحوا فدووه..عبالي يصيحون عليه
لو يذبحون طلي لو ديج....ويكولون هذا فدوه عن صحه فلان لو عمر فلان ....
من الاخير احس نفسي نفر زايد على الشعب العراقي
وعلى ياساعه يقدموني فدوه لشي زين
او لشي تافه .....
اني عندي أعمام .... وعمات خير من الله
عندي ٥ أعمام ... و ٨ عمات ...
لان جدي متزوج أثنين نسوان....
بس اكو بيناتنه حواجز ومشاحنات ....
هسه اسولفلكم حياة أمي...
قسمه أمي صارت لأبويه عن طريق الصدفه ....
امي تسولفلي تكول:-بيوم رحت اني وبيبيتج للخياطة
اتكدر العبايه على طولي حتى تخبنها اليه ....
وهناك شفنه خالة الخياطة جايتهم خطار ....
وهي شافتني وعجبتها... وجنت صغيرة ...
عمري يادوب ١٦ سنه ....
امي حلوة بشبابها...بالصور القديمه من أشوفها
اكلها :-همزين أبويه ما حبسج بهذاك الوكت حقه يخاف على هذا الجمال .....
اي و صاير حجي نسوان....
ومحاجيتها المرأه خالة الخياطة تخطبها لحماها
(هو أبوية ) يدوروله بت حلال ...
وبسرعة ... بسرعه صارت قسمة امي وأبويه....
يعني ما مطوله هوسه عرسهم شهر ...
وصاير عدها أحمد بسرعة حبلانه بي ....
وره سنتين جابتني....
يعني زواج أمي وأبويه فترته كلش قليله
يمكن أربع سنوات واستشهد أبوية....
وأمي جانت بعز شبابها ....
هستوها داخله بالعشرينات وترملت .....
عمي سليمان هذا أكبر من أبويه
رايد يتزوج أمي ....
من باب منريد جهال اخونه يبتعدون عنه ...
ومن باب يكسر خشم مرته لأن ما متفاهمين
ودومهم متعاركين....
أمي صاحبت مبدأ كالت كلمتها ونفذتها ...
كالت للكل:- أني زوجة علي وبس ...
علي رجلي بالدنيا وان شاء الله بالآخرة ..
علي أبو أحمد وفدوى هو أبو جهالي وبس ....
وهو الوحيد التوسد طولي....
هو الوحيد الشافني وتكشف عليه وغمضت عيونه ...
من بعد عيون علي وطوله...يحلم أي رجال يلجح طرف ذيالي ....
وصدكت أمي بكلامها...ما قبلت لا بعمي سليمان.....
ولا باي قسمة أجتها ....
رجعت عاشت ويه بيت جدي ( أهلها )
وخلصت عمرها...وكسرت ظهرها...على تربيتي أني واخويه المرحوم .
من رجعت أمي ألبيت أهلها.....
جان خالي سعد متزوج وطالع ...
بس ساكن بيت نسابته .... يعني أكعيدي .
أنت تقرأ
رواحل .و. أفتداء
ChickLitعليك اتسودنت مو بس أخاف أعليك... أحل روحي و أكضّك خايف تحلّك.... و أغمَض من أشوفك و أخدر أعله الصوت.... غلطة أنته بحياتي و صعبه ما ازلّك.... چم إبليس أطرد من يوزني أعليك..... و چم شيطان أرجمه أبروحي و أكتلّك...... ما صيرن نبي بس راهب آنه أوياك..... ...
