رواحل .و. أفتداء

ح ١١

حكاية * رواحل .و. أفتداء

بقلم * فراقد حسن علي

الحلقة * ١١ *
÷÷÷÷÷÷÷÷÷÷÷÷÷÷÷÷÷

💐صباحي يبدأ ( ببسم الله،، والحمد لله ) 💐
💐والصلاة والسلام على سيدنا 💐وحبيبنا💐 ونبينا 💐وشفيعنا💐 أبو القاسم محمد💐 وعلى آله 💐وصحبه وسلم💐

أفتداء:-

ماأجذب وأكول أني مرتاحه ونسيت نظرات الاعجاب
ألوهميه...ألجانت مغشوشه وكلها دغش على كولت بيبي ألله يرحمها...الوهمني بيها أحسان أبن خالي الكذاب...

بس والنبي محمد نظراته كانت تسولف وتشرح
عن ألحب والإعجاب ألبداخله أكثر من لسانه...

بس حاولت أقوي روحي...واشجع نفسي
وأكول:- الله يسعده ويهني
وان شاء الله ربي يرزقني بنصيب أحسن من عنده.

هو يسمع كلام أمه وميكدر يتخذ قرار مصيري بحياته
ما يفيدني...وباجر عكبه مااكدر أعتبره سند
لأن ثبتلي هو خرخاشه حاجيه تاخذه وكلمه ترجعه

عدت ألايام ولتهينه بزواج أحلام
خطيه أحسها خايفه ومتوتره وقلقه
وشايله هم جهالها اكثر من هم روحها
تكول:- من أتزوجت وأني بنيه ما قلقني التفكير
بكثر هساع...مشتت فكري على جهالي
وعلى حياتي شلون حتراهم ويه حريم شهاب الباقيات.

ماشاء الله بيوم ألاجوي عمامها يقرون فاتحتها
ويعقدولها وياخذوها هي وجهالها وياهم...
سياراتهم سدت ألشارع...هم بس عمامها ولدهم
و نسوانهم صاروا زفه...ومنا خوالي ونسوانهم وخالاتي...ألبيت أحسه صار هلكدوته ما يكفي الموجودين...

ويوسف شنو طلع كشخه وهيبه
قبل بيوم راح للحلاق وعدل روحه
وهي أحلام كوتله دشداشته البيضه وحضرتله البشت
وغتره حمره جديده وعكال...طلع بيهن غير شكل

وخالي السبع تكول أخوه مو خاله
كومتهم وكعدتهم سويه...أحسهم وأحد يسند الثاني

والحلو هو متصدر الكعده يسولف ويشرط على عمامه
وعلى شهاب...أعتبر نفسه هو ولي امر العروس
ويحاجيهم بنتر جنهم غربه مو عمامه
ولا يخاف منهم يحجي بزود وصوت عالي...

وهي ألعروس ( أحلام ) كعدت يم خالاتي وعماتها
وباقي ألنسوان بالهول...لابسه كوستم كريمي
وحجاب مشجر بورده ناعمه...
وحتى مكياج مرتب وقليل...
حسيتها وحده كاشخه ورايحه لمناسبه
مو عروس ومتكلفه بكشختها...

ومن قروا فاتحتها...
وبعدين صديق خالي حميد عقدلهم...
أجى شهاب كعد يمها لبسها بس الحلقة بيدها اليسرى وهي هم لبسته حلقته ...
وباقي ذهبها بقى بالعلبه موجود كدامها على الطبله
وماكو هاي سالفه كص الكيك وشرب الشربت...
كعده عاديه وبسيطه...

أباوع مرته ألجبيره لعبت طوبه بالهوسات والهلاهل
بس الثانيه لا بقت كاعده وساكته
وحتى شكلها مكلوب...مبينه حزينه ومقهوره...