رواحل .و. أفتداء

ح ٢٣

حكاية * رواحل .و. أفتداء

بقلم * فراقد حسن علي

الحلقة * ٢٣ *
÷÷÷÷÷÷÷÷÷÷÷÷÷÷÷÷÷

بسم الله الرحمن الرحيم (وَبَشِّرِ الصَّابِرِينَ الَّذِينَ إِذَا أَصَابَتْهُمْ مُصِيبَةٌ قَالُوا إِنَّا لِلَّهِ وَإِنَّا إِلَيْهِ رَاجِعُونَ)

أفتداء :-

عباس صار ألنا حديث ساعه...

عباس صار ألأهم والمهم بيومنه وبحياتنه...

عباس فرح تعب السنوات واليوم حصدناه...

عباس أمنيه واليوم أتحققت...

عباس حلم وردي واليوم شرفنه وزارنه...

شكد ما متأذيه وموجعه
بس من أشوف لهفه أمي عليه...
وفرحة خالتي والبنات بجينه للبيت بسلامه..
أفرح أكثر وأكثر وهاي فرحتي تساعدني آنسه وجعي.

والحلو شهاب ويوسف متصالحين البارحه
أحلام وآمال جايات من مخابرتهن خالتي
وهي طالعه على شهاب مسلمه عليه
وهو الخاطرها مد أيد الصلح ليوسف
وقدم الطلي عربون ألمحبه والصفحة الجديده.

وهي خالتي من فرحتها ما تعرف شسوي
خلت عبس يمها...
وتوخر البنات والجهال عن العش النايم بي...

بس غليص اله نبضه زايده بكلبها خلته يكعد بصفها وكلساع يمد إيده يلزم وجهه
لو يحرك بطنه...لو يركز بوجهه...مستغربه
ضحك وكال :- شو هذا ما يبجي عليش نايم
يول شو أنت ماتحترم خطارك...
ماتكعد يول عيب عليك .

خالتي وخرت إيده من صدره وكالتله :- لا يمه بعده صغير...لا تصرخ بوجهة خطيه يجفل.

والحمد لله عدت الأيام علينه بفرح....

وزارتنه سنه ((((((((((٢٠١٣)))))))))))))

يوسف من يجي من شغله
شكد ما يجي ملهوف على شوفه عبس
بس يلزم نفسه ويشل غليص ويبوسه
يلا يجي على عبس...يكول :- ما أريده ينقهر
ويتكرضم من الغيره.

وهو صدك غليص بلش يغااااار ...
بس نغفل عنه يأذي عبس لو يسويله شغله...
وابسط ما عنده لو دفعه لو ضربه وهو بحظن أمي
لو بحظن خالتي.

ومن كل عقله من يشوفني أرضعه يكوم يبجي
تعاي سترى روحج عيب نباوع عليج
وحتى أني انطيهم ظهري...لو أشمر الشال عليه
بس هو يعرف كاعده أرضعه يشبع بجي.

من بدأ دوام المدارس راحت أمي سجلته
ويوم يداوم،،،ويومين غايب...
وبالأخص هاي الأيام مو شويه كسر الجو وبرد ..
ينقهرن أمي وخالتي عليه ما يكعد الصبح للمدرسه يبقه نايم ...

واني ومالي خلك دايخه ويه عبس
أقري شويه واتعب تطلع روحي
وهو يبدء يتحجج بس أبلش أقري
أريد أشرب مي...جوعان
رجلي خدرت...انجضع شويه...
اروح للتواليت...أيدي كامت توجعني ما أكتب
هذا الحرف ماأعرف اكتبه...