كسرة قلبي

50

"' ولكمممم هذا شكد بايع المستحه والخجل حيان هذا اخيك طالعه عينه هواي ويريدله واحد يردهه "'

ضحك حيان "' ولا يهمج حبوبه اني ردادهه مروان استجن واكعد راحه لا تضوج غاليتنه "'

"' حيان اخذ حذرك مسمعت حبوبه تكول الرجال ملهوف وميستحي ويطلع عين اطفاله من صغرهم فيا خوي من هسه خلي لنور غرفه وحد هاي احد اجراءات السلامه والامان واهم شي غرفه حبوبه متكدر توصللهه متذكرهه شلون مره جفتت على عماد وخزته كدام الناس ببداية زواجه "'

"' ولكمم هدووني عليه خل اكوم اعلمه الأدب اي هو هاي تاليتك اعرفك مثل هذاك الاغم تاليتك يولد اني من جفتت عليه كل شوي نادهه جاهل يروح يصيحه العالم تارسه المضيم وتريد تباركله وهو مختلي بست الحسن وناسي الرجال الناطرته بره "'

ضحك حيان بقوه و ضرب مروان بكوشة التخم "' لكك بسك حجي اسكت "'

ضحك مروان ورد يالله ميكدر اذا ميداهر حبوبه "' على بختج حبوبه الصوج مو بيج الصوج بذاك الاغم على كولتج من خله الباب مفتوح وما قفله ويدري بربعنه كلهم حراسه ويشتغلون وفق الاصدار والترصد "'

هدت وكالت '" ايي صحح هو اغم اول مره تحجي حجايه بيهه خير يمروان شصابك بيك شي "'

"' لا حبوبه سلامتج بس خفت عليج لا يصعد الضغط والسكر ويصير بيج شي وشيخلصني من محسن العاشق الولهان "'

غافلتنه وتناوشت عصاة جدو وضربته بيهه وهو صااح "' بييش ادعيلج حبوبه على هالضربه عساج بظره تجنن تخلي محسن ولهان ويعوفج ويركض وراهه "'

كامت ورا "' فال الله ولا فالك يالملسون يالماتستحي "' عافهه وركض لغرفته واحنه بس نضحك عليهم

"' ولج جويره ام الفواين عليمن تضحكين "'

"' لا حبوبه حشااج صدك جذب اني اضحك عليج امداني شبيه ناقصة عقل اضحك عليج هوه انتي اليشوفج يعشكج علي حجاياتج المعسوله وشكلج ليش اضحك عليج بعد '"

"' ريتج بعد كلبي ام الفواين "'

ضاجت نواره وكامت تبجي اخذتهه وصعدتهه فوك نامت من التعب

مشه اليوم بين الحجي والضحك اجه الليل وره ما تعللنه بليل جان حيان طالع كلمن راح لغرفته بقيت بس اني ونواره كملت تريب شلتهه وسوده عليه نامت بحضني نعست صعدت نومتهه بفراشهه غسلت وبدلت مشطت شعري باوعت بلغرفه ماكو ماي خليت الشال على راسي فتحت الباب وصار حيان بوجهي هستوه صعد الدرج كمل بخطواته وكام يتقرب عليه كلت راح تنعاد الكَره مال الظهر

صديت وجهي ودا ارجع ادخل للغرفه ما حسيت الا جرني عليه تصادمت بي ونضربت بجسمه حضني بقوه ودفن راسه بركبتي يشم بيهه جسمي كله رجف لهل حركه واحس بداخلي فراشات ترفرف وشعور ما اعرف شلون اوصفه كلش حلو بادلته الحظن ودموعي جانت بطرف عيني ما اعرف ليش اجاني شعور اريد ابجي وافضي شكو قهر وهم عندي بحظنه اللي حسيت بي بلأمان والراحه چنه حظن ابوي