"' ايي يبعد جوري ايي مصدكتج "'
باوعتلي ابتسمت و اني رديتلهه الابتسامه مر اليوم عادي و قبل ما جنت بلمطبخ طلعت اجيب ماي اخذته و صعدت شفت مروان طالع من الغرفه
سألته "' مروان ماكو اخبار "'
"' لا والله خويه كلت منا لباجر اذا ما بين اروح للبصره اشوفه لان حته ربعه ماكو ادكلهم مغلق "'
عفته و دخلت للغرفه صارت صورته بوجهي معلكه بكبرهه و صايره من ضمن البناء تأملتهه و نزلت دموعي شوكت ترجع و اكحل عيني بشوفتك حيان مو متت من الفراك فوك الشهر صارلك مبتعد عنه اشتاقيت لكلشي بيك حته لعصبيتك ولعكدة الحاجب وكل تفاصيلك
كمشت الفون دكيت على رقمه هم مغلق ظليت كاعده و دموعي بعيني ما غفيت لحد ما طر الفجر صليت و نمت يم نواره غفيت ما حسيت الا على بجي نواره كمت و جريتهه لحضني من شافتني كعدت بطلت بجي حطيت ايدهه على وجهي بست باطنهه و كمت غسلتلهه و بدلتلهه و نزلنه شفت البيت مخبوص
شفت جوري بلمطبخ وماما و حبوبه و وسن بلهول والاستقبال مسدود "' جوري شكوو '"
"' مادري منو اجه و مروان سد الباب وطلعهن وكلي ما اريد احد يدخل "'
نزلت نواره راحت يم ماما و اني و جوري ظلينه بعدهه كعدنه
"' جوري .... ولجج جوري "'
جانت تباوع وراي ضربتهه على ايدهه باوعت عليه "' شبيج خيه "'
"' عندج صور لـ حيان "'
رفعت حاجبهه و ضحكت "' اي عندي كثير شتردين '"
"' اريدهن كلهن "'
"' شتسوين بيهن عيني هذا اخوي ممنوع تشوفي "'
ضحكت "' عيني هذا زوجي وحبيبي ومشتاقتله واريد اكحل عيوني بشوفته "'
"' سوده عليه و تكحليهن بلصور عيونج "'
دنكت وخنكتني العبره "' اي لعد بيش اذا هو ماكو صارلي فوك الشهر لا شايفته ولا سامعه صوته مشتاقتله كثيرر "'
"' و ياهو الكلج ماكو "'
بأستغراب سألت "' وينه لعد شنو ضامي من عندي ؟ '"
ضحكت "' خيه صدي وراج وكحلي وجهج كله مو بس عينج "'
صفنت عليهه هاي شتحجي عاطت عليه "' صدي ولج صدي "'
صديت ولن شفت ذاك الطول الحلوو وعيونه الوساع السود المصوبهن عليه وشعره اللي اللي معدله بأهمال ولحيته الطولانه وهيبته و جماله المعتاد
بس رغم كل هذا جانت ملامحه تعبانه ابتسمت ونزلت دموعي بذيج الساعه اختلطت ابتسامتي بدموع الفرح رحت عليه حضنته حيل اويلي الله حبيبي حضنه حضن ابوي كله حب وامان بادلني الحضن وهمس بصوت يغلفه التعب و الوجع
"' شمعة بيتي مشتاقلج بكد الكون "'
بجيت واني دافنه راسي بركبته وهو متمسك بيه "' اني هم اشتاقيتلك بعد لا تروح وتعوفني "'
