#كسرة قلب
حيان
جنت احسب يوم يوم حته تنتهي اجازتي واطلع للدوام يخنكني البيت احس ياكلني اكل وجودهه بوحده بغرفة اخوي احسه خناجر وتضرب بكلبي
قصص وروايات عراقية كرار صلاح
مرت مشكلة احمد وعدت وخلاني الفقد اعصابي بيومهه واذاني بحجيه من نطه بينه كدام هالحثاله وطلع من البيت
بس رغم كل السوا ماعفته اخووي وما اتركه لكطع النفس تجي احيان واوقات لازم توكع لأخوك لان من تطيح بضيج وتوكع الوكعه وتحتاج احد يلزمك ويشد نفسه حزام عليك متلكه احد كلهه تشرد بس اخوك
واني اكبر منه مو معناته اتفرعن عليه وما اوكعله وما اوكف ويا ومن اول زله اعوفه واكرهه وابغضه لا يبقه اخوي ورابين سوه وماكلين سوه واب واحد وام وحده ربتنه وكبرتنه وكدام عيني كبر مو من اول خطأ ولا من اول حجايه ابتعد عنه واعوفه
ادرك خطئه ورجع ندمان ورايد يرجع يعيش بسدنه ما رفضنا واحتوينا لان دنيانه غبره تاكل بشر وتيهه وتذله اذا ضاع بيهه وصار بدون اهل ومو اخويه الينذل واني اشم الهوه
دخلت لغرفتي بليلتهه واني منا روحي طافره شلعتلي كلبي برعشتهه من الضلمه كبل بيوم واليوم جنت مرتاح برجوع احمد ماريد عائلتي تتشتت والحمدلله من هدا ودلا بطريقه الصحيح
شكد ما كابرت شكد حاولت انسه ما كدرت بس تناسيتهه كدرت اتعايش وابنيلهه صوره هيه واخوي ببالي وحاولت ألئم جرح كلبي بس هدمته كله ورجعت لنقطة الصفر من سمعتهه كال ' احبك ' هاي الكلمه جانت كافله تفتح اكبر جرح بروحي وبكلبي وتأذي
شكد جنت متمنيهه اسمعهه منهه واكضي الليل كله اتخايلهه وهي تنطقهه ويا محلاهه تطلع منهه بس الي مو لغيري
طلعنه اني واحمد ومروان وطول هالطلعه الكشره اني ما مرتاح لحد ما رجعنه دخلت للبيت اختنكت
دخلت لغرفتي شفت جنطتي محضرتهه باوعت ع الساعه ب 2 بليل شفت نفسي طاير النوم من بين عيوني هہ يا نووم باقي لزمت الجنطه نزلت بهدوء لان نايمين
دخلت لغرفة امي جانت نايمه رويحتي بست راسه وأيدهه دا اطلع المصرف من جيبي والمفاتيح اللي بحزامي طلعت صوت وحست فتحت عيونهه وشافتني
ام حيان "' هاا يمه خيرك شو كاعد بهليل "'
"' سلامتج يالذهب بس طالع اني للبصره لدوامي "'
ام حيان "' الله وياك يبعد امك يحفظك الله ويخليك ويردك سالم ان شاء الله "'
حطيت المصرف بأديهه وطلعت صعدت سيارتي وصعدت الجنطه مشيت وحازه بكلبي جوريه كل مره من اطلع هي تودعني ومن اجي تتلكاني بنيتي يا الله على ايدي ربت ما قصرت وياهه بنص التعب واروح اجيبلهه ورداتهه تاليهه هيج تطلع لسانهه عليه وتوكف ضدي علمود صديقتهه وتحملني منيه
