حيان مشتاقلهه روحي تريدهه يمهه '"
'" الله يساعدك وعلي ما الومك يبعد اخوك ما الومك مابيدي شي عليك بس الدعاء الله يريح بالك ويقويك ويقوي كلبك ويرده لحيله مروان خويه هذا قدر الله كاتبه ولا اعتراض عليه مروان خويي قوي وميسوي هيج ويعذب محبوبته بكبرهه من تشوفك متعذب ومتلوع هي هم راح تتلوع وتتأذه وانت متريد اذاهه لهذا قوي نفسك يبعد حيان واترحملهه '"
'" الله يرحمهه خويه الله يرحمهه '"
باوعت على نورسين الدمعه تلالي بعينهه شافتني اباوعلهه ابتسمت وترخصت تصعد لغرفتهه
بعدهه الكل ترخصو واحنه هم دخلنه للغرفه نواره نامت بحظني حطيتهه بفراشهه تمدد حيان وهو مقهور على مروان بدلت و رحت يمه سحبني لحظنه '" حبيبي هونهه وتهون حسبة وكت ان شاء الله ويصير زين ويكمل حياته هو صح ماراح يكدر ينسى بس الحياة تخلي يتناسى ويكمل حياته '"
سكت وباس راسي ودفن راسه بركبتي شمهه ظلينه هيج لحد ما غفينه ثنيه
مَـرت الايام لحد ما خلص شهر والروتين نفسه بهالشهر كمل البناء ورجعنه فوك والتصميم اللي مصممه حيان و مـروان حيل حلو صاير الصاله والغرفه نورسين ردت جوه و جوري و مروان بلطابق الثالث واني دخلت بلشهر السادس من حملي بس بعدني مماخذه سونار ومادري شنو جنس الجنين
حيان جان رايح لاربيل صارله اربعة ايام اول يوم نزل من الدوام راح هو ومنتظر واني مشتاقتله حيل حته مالحكت اشوفه اول ما اجه من الدوام بدل و طلع حته مالحك يرتاح هو لحد البارحه فض عرس صديقه كله بس سالفة عمه لحد الان ما اعرف شسوه بيهه
كاعده بغرفة نواره الجديده اللي مرتبهه حيان ترتيب حيل حلو قسمهه بناتي و فراشهه والعابهه وكنتورهه و والجدار بلون هادئ وعليه لوحاتهه بأكثر من تصميم مسوي رف كامل بصورهه تدرجاتهه من عمرهه شهر صوره ومن عمرهه ستة اشهر ومن عمرهه سنه صوره ومن عمرهه سنتين هو كله صورهه وبمقدمتهه صوره حاظنيهه اني و حيان وعدهه وي مروان و وي ماما وجوري و نورسين الرف الثاني اللي فوك هتدئ وبي نشره حلوه واما القسم الاكبر لألعابهه لعاباتهه مرتبات والباقي وكل شويه ناثرتهن سودنتني
والقسم الثاني من الغرفه بقه فارغ لاولادنه القادمين ان شاء الله رتبت العابهه وعدلت غرفتهه و طلعت من الغرفه مالتنه صارت بوجهي الصاله تصميمهه مثل الغرفه حيل حلو قسمين كأنو حجر وبناء عادي وبيهه تخم و بلازما وباقي الرتيبات العاديه
شفت فوني ع التخم دكيت على حيان مغلق يا الله وينه طلعت منهه باوعت ع الدرج اصعد لمروان بس ما اكدر مابيه حيل دكيت عليه رأساً جاوب
'" خويه حيان شو ادك عليه يطلع مغلق ماتعرف شي ترا بالي ظل يمه '"
'" ماكو شي بعد اخوج تعالي جوه يمنه '"
