ضميت الورقه و نجضعت أو مددت عالفراش و ببالي نوارتي شتاقيتلهه لكلشي بلبيت اشتاقيت لـ حيان اي اشتاقيتله بگد الگون على كولته اشتاقيت لگلشي بي اشتاقيت لحجاياته لهمساته للـ چا من يكولهه لعصبيته ولنفاذ صبره من يكول ' يا صبر ايوب ' ويكررهه ثلاث مرات اشتاقيت اسمع صوته من يذكر الله وعلي بگلشي اشتاقيت لشگله اشتاقيت لصوته وللبحه اللي بي وجماله من يقره قرايات على اهل البيت ( عليهم السلام) اشتاقيتله من يلاعب نواره وتركضله وتصيحله بابا اشتاقيتله من يصلي و ورا صلاته يكعد يقره ويجود و يرتل بلقران الكريم اشتاقيت لكل حركه ان كانت صغيره او گبيره منه لكل حدث يسوي لكل حجايه لطوله لهيبته حته لعكدة حاجبه اشتاقيت كلهن هذن احبهن وعاشكتهن ومدمنه عليهن ما جنت اتصور بيوم راح افاركهن
بس رغم كل هذني اذاني حيل ... نزلت دموعي واني افكر شلون هسه وسن راح يجيبهه يمهم شلون راح يلمسهه يحضنهه يسوي هالأشياء كدامهه يحاجيهه يداهرهه اتسودن بمجرد التفكير بهذن اتسودن والله عقل ميظل براسي
ظليت اتكلب لحد الفجر كمت صليت وطلعت لكيت عمو و مرت عمو كاعدين كعدت يمهم و ابتسم واضحك وياهم على سوالفهم
لحد العصر اجتي فطوم جنت كاعده گبل سحبتني للغرفه '" ها ها فطوم شبيج '"
حطت بأيدي تحليل حمل منزلي باوعت عليه وفتحت عيوني '" شنو هذا شسوي بي '"
'" باع الفطيره شنو شتسوين بي امشي حللي والله اني شاگه بيج انتي حامل والاعراض الدتصير اللي البارحه شفتهن مال حمل الدوخه و اللعبان نفس '"
اني تسودنت شنو حمل شلون صار من اول مره قابل يصير حمل هي بس مره وحده بعدهه التهينه بهذن الاحداث دوامه و مروان وبعدين تعبه و ضوجته و المداهره والعركات الصارت وما صار بعد هالمره من هذن الظروف شلون صرت حامل
'" فطومه ترا فقر دم حاد يجوز ما اتوقع حامل '"
'" دمشي حبوبه امشي يمه امشي خيتي حللي هسه شخسرانه '"
ضحكت عليهه و دخلت للحمام حللت و طلعت النتيجه بس ما عرفتلهه وديته الهه كتلهه '" هااا شنو النتيجه مالت التحليل '"
باوعتله وضحكت وطفرت عليه '" ايجااابي خيه ايجااابي الف مبرووك يوم الولد ان شاء الله '"
اني صفنت شنو ايجابي شلون هالشي حامل يعني اني هسه نرسمت ضحكه على وجهي و نزلت دموعي بنفس الوقت حطيت ايدي على بطني يعني بداخلي روح هسه مسحت دموعي
'" فاطمه لعد شو بطني مو جبيره '"
'" ولج يمه بعدج بلاشهر الاولى كرش صغير عندج بس ترحين للدكتوره شلون جبتي بنيتج مادري '"
سكتت وباوعت على جسمي و ضحكت شنو كرش راح يصير عندي كرش كمت اتخايل نفسي من بطني راح تكبر حيل والملابس تكوم تضيك عليه
بس من تذكرت حيان و الموقف اللي بي احنه هسه نزلت دموعي بس مسحتهن وخفيتهن من دخلو الكل يباركولي
