ثلاث دمعات

بارت 48

#ثلاث دمعات
الكاتبة :- ســندريلا ||𝐒𝐀𝐑𝐀𝐇 ♡.
البارت -48-

ليش الموت مايرضى الا بينا
مامرت سنة الا ويجينا
مو اي واحد الي يريد يختار
ياخذ وين ابو روح الحنينة 💔

زينب :- تحجي وتبجي روحها مفرفحة كالت الساعة
بستة الصبح اجوي ٤ زلم عسكرية اخذو امير بأمر القاء القبض وهمه طلعو للشارع ما نسمع الا صوت طلقة اثير يگول صوبو برجلة وامي، سمعت هيج وگعت علينا وحلگها مال لا تحرك ايد ولا رجل
واحنا وحدنا وماادري شسوي...؟!

أمنية :- لزمت راسي اريد استوعب كمية الصدمات الانهالت عليه حجيت ببالغ الخوف والصدمة
عمتي شبيها زينب
زينب :- وگعت ماتحرك ايد ولا رجل واثير كسر
الباب ع بيت جيرانة ما يطلعون وخابرت بيت عمي
وانتضرهم يوصلون أمنية امي راح تروح من بين ادينا گالت وشهگت بقهر..

أمنية :- اهدي اهدي مابيها شي ان شاء الله بس
خلي يدخللها هوا وترتاح لتسوون خبصة يمها
ابجيكم وهسه يوصلون بيت عمج اهدي ان شاء الله مابيها شي ..
زينب :- ماحجت بس تبجي
واني گلبي نغزني عرفت انجلطت شدعي عليك يا أمير گلبت حياتنا گلب حسبي الله ونعم الوكيل بيك.

بقت زينب فاتحة ويايه اتصال وماسمع بس صوت بجيها وتتوسل بعمتي تگولها يمة فدوه گعدي
والله أضيع من بعدج ما بقالي غيرج لتخليني وتروحين ..

شوية وصارت هوسه عرفت بيت عمها وصلو
زينب :- رايحين للمستشفى احنا أمنية عفيه
تعالي عليه
أمنية :- اجي والله اجي بس صيري قويه وديري بالج ع نفسج وع اخوج
زينب :- شهگت وگالت ان شاء الله والله أحاول
أمنية :- عفيه عليج
سديته منها وگمت بسرعة ودموعي تمطر مطر ع عمتي ياربي من عمري ع عمرها..

فتحت الكنتور وطلعت صاية البسها بهالاثناء
گعدت دارين
دارين :- شكووو وين رايحة بهالصبح؟
أمنية :- حجيتلها كولشي
دارين :- لطمت ع وجهه وگالت عزا العززاني كون
وهسه؟
أمنية :- وهسه لازم اروح عفيه خابري ناصر خلي ياخذني ماعندي احد يوديني
دارين :- ناصر طلع من الفجر عدهم انذار اليوم

أمنية :- خرررب بالحظ وهسه شراح اسوي
دارين :- روحي وحدج أمنية لتعوفين عمتي
بهيج شدة
أمنية :- طبعا مااعوفها وهسه رايحة اگول لشاكر
وأروح بس انتو فدوه ادعولها مايصيرلها شي
دارين :- شلون ما ندعيلها وهي الوحيدة الحنينة
علينا وتحبنا ياربي فدوه لتلوع كلوبنا عليها.

أمنية :- اني رايحة
دارين :- اخذيني وياج
أمنية :- لا ابقي مو زين طريق طويل وانتي حامل بعدين احير بيج رايحة وحدي وشيصير خلي يصير
گلتها ولفيت شالي واخذت جنطتي خليت بيها موبايل وفلوس اتحرك ودموعي تصب خفت حيل
خفت افقد امي الما جابتني خفت افقد الحضن الدافي الاحتواني.. هالفكره خلتني أنهار

رحت لغرفة ابوية وحمدية دگيتها صاحت حمدية
ادخل.. فتحت الباب ودخلت شفت ابويه نايم
حمدية :- خيرج
أمنية :- حجيتلها مختصر وگتلها رايحة الهم
وعفتها ورحت حتى مانتضرتها تحجي
اني طلعت لزمتني دارين :- عفيه طمنينا عنها
أمنية :- ان شاء الله والله بس خل اروح انتبهي ع نفسج يلا رايحة