#ثلاث دمعات
الكاتبة :- ســندريلا ||𝐒𝐀𝐑𝐀𝐇 ♡.
البارت - 3 -
ما ميت كبل بس شايف التابوت
لان كل ما انام احلم بنعشي
انه مبلل رموش بدمعة المعتاز
انه دموع الفرح ما وصلت الرمشي
وكت الخير عشنه وما شفت بي خير
صاحولي ملك بس ما شفت عرشي
عندي عيون بس محسوب عل عميان
انه مفتح ولكن ما شفت كلشي
احلم بالفرح واترس الضلمه احجار
ضل هواي ليش نكول ما ضل شي🖤
أمنية...
نصدمنا بخبر حملها وما حجينا شي
بس بداخلنا شعور حلو مفرح
يا ترىٰ راح يجينا أخ لو تجينا أخت
دعيت من كل گلبي الي بأحشاء
حمدية يكون ولد ما يكون بنت...
ماردت تجي بنية وتتعذب وينشلع گلبها
ماريد الحمل يزيد ونصير أربعة !!!!
بنات لا حول ولا قوة...!!
من أجة أبوي ودرة طار طار من الفرح
بهالخبر... وحمدية تگولة أن شاء الله ولد
يرد بلهفة ان شاء الله
من حبلت حمدية كل ضني جان راح تلتهي عنا
وتخلينا نتنفس شوي... بس الي صار
خيب كل ضنوني !!
كأنها جانت قبل ملتهية وهسا تفرغتلنة..
حملتنا كل مسؤولية البيت...
ليلها ونهارها متمددة بغرفتها ع ضهرها
طبخ متطبخ... ولا أحنة النعرف نطبخ
يصير وكت الأكل تبقى تعيط
"وين صار الأكل"
أحير شسوي أروح اسألها هذا شلون يصير
وهذا شلون !!!
تعلمني أحفظ كل كلمة تگولها
وأحاول أطبقها بضبط شبعت چويات
وبمرة من المرات... طبخت المرگ
وشلت الجدر بأطراف رداناتي...
ما سيطرت ووگع الجدر من أيديني
المرگ كلها صارت ع رجلي
حسيت جلدي نصلخ صحت بعلات صوتي : اخخخخ
طلعت طفوف تركض... تقدمت ناحيتي
بخوف :- شبيج شصاير
بجيت وگلت :- رجلي أحترگت بالمرگ...
شهكت طفوف وبجت :- عزا عزا گومي بسرعة
باوعتلها دموعي عشرة عشرة
گتلها بألم : وين؟؟!!
گومتني من أيدي وگالت :- نشوف أي واحد
بالشارع يودينا للمستشفى...
گمت وياها وعقلي ما يفكر بشي
الألم موتني گوة وصلتني طفوف لباب الشارع!!
گعدت بالباب وشهگت مو گادرة أتحمل الوجع
شفت طفوف تقدمت لرجال وأگف يم
بيت الشيخ... أحس صاير غواش ع عيوني
من البجي مسحت دموعي وباوعت زين
هذا الرجال هو الشيخ الشيخ مهران !!!
جان يحجي بالموبايل ومنطي ظهرة لـطفوف
هي عين علية وعين عليه تباوع مبرطمة
ودموعها تكت... كمل مكالمتة وألتفت عليها
تفاجأ بوگفتها ورا...
صفن بوجها هي بجت وگالتله وهي تأشر علية بأيدها :- عمووو فدوة أختي احترگت رجلها
وديها للمستشفى عفية الله يخليك
باوع بأتجاهي بسرعة هز راسة بأي
وگال بهمة :- تعالو عمو انة أوديكم !!!
هو گال هيج أجتني طفوف تركض سحبتني
من أيدي ووگفتني...
شغل سيارتة وجابها يمنا فت..
چنت أظن مراح يهتم ويفشلنة بس فاجأني
بموقفة ووگفتة هذي !!!
أنت تقرأ
ثلاث دمعات
ChickLitثلاث شقيقات.. يتخبطن في دهاليز الحياة وغياهب الاقدار لتكون لكل منهن حكاية.. رحلة مع الدمعات الثلاث فهل سوف تجف دموعهن ام ينهطل سيلاً منها...!! "ثلاث دمعات" # سندريَلا
