ثلاث دمعات

بارت 20

#ثلاث دمعات
الكاتبة :- ســندريلا ||𝐒𝐀𝐑𝐀𝐇 ♡.
بارت - 20 -

بس وياك.
أخضر وانعشك وأنشم وأذبلَ
ويه غيرك ماصرت بستان....
أصيرن طين واتلثم....... 🖤

امنية... رفعت راسي وهنا جانت الصدمة
من شفتة واگف گدامي اي هو نفسه
نفس السوة ويانة الحادث... دنگت
بسرعة وگمت الم بالأوراق ومغتاضة
بنفس الوقت من اسلوبة ومتعجبة من
هالصدفة...
فززتني عيطتة من گال :- فضيهااا

لميتهن بسرعة وانطيتهن اله بهالاثناء
أجتي بنية تركض وگفت يمنا تلاهث
باوعتلنا وگالت بصوت ناصي الة
:- متگلي شبيك تصيح هو اني صوچي
خابرتك تجيني امداني كون ع هالدگة
راد يحچي لزمت ايدة وگالتله :- غمار أبوس
ايدك روح للسيارة وجاية وراك
باوعلها بطرف عينه معاجبة الحچي
هز ايدة ومشة..

التفتتلي البنيه بسرعة وگالت :- يحياتي
اني آسفة بالنيابة عن ابن عمي فدوهه
لا تتضايقين ترا هو هيچ دومة اعصابة
بخشمة وجرتني وباستني
وگالت :- مرة ثانية اسفة
أمنية :- لا حبيبتي عادي
ردت بأستعجال :- انتي تدرسين هنا مو
أمنية :- اي طبعاً
أمنية :- ان شاء الله نلتقي وياچ سما
أمنية :- واني أمنية
سما :- عاشت الاسامي يلا اني رايحة
قبل ما انسحل خخخ بيباي
مشت ولوحتلي بيدها واني هماتين

راحت واني لسه مدهوشة من هالصدفة
بس هو الظاهر معرفني لان من سوينا
الحادث جنت ورة عمتي واگفة لذلك
ما شافني واصلا هو حتى بخلقة أمير
يمكن ما باوع أبتسمت ع سما أول مرة
أصادف هيچ انسانة تذب ميانة بسرعة

تذكرت عمتي تنتظرني غميت نفسي
صارلي ساعة اطگ صفنات وشاتلة
المرة دتنتظرني وچان اطگها بركضة
لبوابة الجامعة شفت عمتي سلمت
عليها واخذنا تاكسي ورجعنا للبيت..

أول مرجعت ماشفت احد بوجهي رحت سبحت
ورحت للغرفة فرشت السجادة وصليت
باوعت ع زينب نايمة بعمق والغرفة باردة
وضلام وهي متدثرة بالبطانية راودتني
رغبة جبيرة للنوم كملت ولفيت سجادتي
ورحت نمت حتى ما تغديت نعسانة وتعبانة

گعدت العصر ع صوت عمتي
وهي تگعدنا :- كومن كومن بس مال نوم
كومن ادرسن اكلن شهالنوم شگد تنامن مكافي عاد
گعدت بالگوة ولا ما بودي أگوم بس أستحي
من عمتي باوعت لزينب فاكة حلگها ونايمة
ولا حست اصلا فاقدة كلش..

گالت عمتي :- صح النوم گومي يمة غسلي
وأكلي ولزمي كتابچ انتي جامعة ودراستج
أكيد صعبة
تثائبت وگتلها :- اي عمة هسة
طلعت نزلت رجليني من الچرباية
ومطفية بقيت گاعده وصافنة لو كل
شوية اغفة وارجع افز..

بالاخير گمت اجر بروحي جر غسلت
وشوية صحصحت ونزلت جوا طبعا
شالي ابد ما اذبة حتى من أنام أخاف
أمير ينسى ويدخل ع زينب فجأة..

شافتني عمتي گالت :- الأكل بالثلاجة طلعي احمي واكلي
أمنية :- تمام
رحت طلعت الاكل ما حميتة هو اني
احبة بارد صبيت وگعدت أكل بالمطبخ