ثلاث دمعات

بارت 49

#ثلاث دمعات
الكاتبة :- ســندريلا ||𝐒𝐀𝐑𝐀𝐇 ♡.
البارت - 49 -

شلونكم يا اهل الگلوب الدافية
شلون حال گلوبكم ماغافية
ماتنام جروحكم
وبالفراگ شلونكم
هم تنام عيونكم؟؟
وهم تظل حسبات عدكم صافية
بالله جينا ببالكم؟؟
ومن ذكرتو شحالكم
هم بعدنه احنه لجرحكم عافية؟؟
ادري وشصبر هَواكم
والوجع يخدش هِواكم
الشوگ يزرف بالگلب
آخ يا شوگ اليحب
وشيحننلك گلوب الجافية
چن گبل ينشد علينه
وشجرى وسكت انينه
شگد يمر بيكم حنين
شگد تمر بيكم سنين
وعالدرب ماتغفه عين
عدها امل يمكن يرد للعاشگينه
جروح ماتبقى بنظرته الشافيه..🖤

أمنية :- أحس الدنيا دتاخذ حيفها مني متحلفتلي
والقدر شاد حزامة عليه ويتوعدلي بأيام قاسية
مرة أمر من العلقم وأشد .. كلما أتذكر عمتي ووصيتها
أنهار لأن أشوف نفسي عاجزة اخلص أولادها من جحيم
بيت عمهم واگعة بين جحيمين...

غمار وشراح اگلة وشلون اوگف بوجهة وانطقها
واگلة طلع أمير .. شنو حتكون ردة فعلة
گمت من مكاني صارت المرايا بوجهي باوعت شلون
صايرة جلد ع لحم الهالات السوداء تحت عيوني
ووجهي شاحب مابيه حياة..

مشطت شعري واباوعلة شلون خصل خصل كاملة
توگع وتوگع دموعي وياااه .. گلبي يوجعني
ويأذيني حيل گمت من مكاني وابالي شي واحد
اخلص اثير وزينب من بيت عمهم وبس..

لفيت شالي ولبست صايتي وحذائي شبت جنطتي
وطلعت گلت لشاكر اريد اروحلهم ماقبل وتعارك
ويايه اخير شي اخذت جنطتي وعفتة ومشيت وبقة
يصيح وراية بس مااهتميتلة مسوي روحة يخاف علينا
من تالي وكت من گد مانهمة ع الاساس.

رحت بطريقي ولليل يلا وصلت باوعت الساعة ب ٩ بليل واني ابغداد ووحدي ماأدري وين انطي وجهي .. فد أنهضمت طلعت موبايلي من جنطتي وگعدت ع الرصيف اتصلت بسما
شوية وردت
سما :- هلا والله منور موبايلي أسمج

أمنية :- هلا بيج سوسو أگلج سما اني ابغداد
سما :- لا والله صدگ
أمنية :- اي والله
سما :- ووينج هسه
أمنية :- گاعده ع الرصيف
سما :- سودة بوجهي صديقتج موجودة وبيتها مفتوحلج بكل وقت وانتي گاعدة بالشوارع بهالبرد انطيني عنوانج

أمنية :- وصفتلها العنوان وضليت كاعده انتضرها
اباوع للعالم والشوارع والهوا خفيف يضرب بوجهي
نزلت دموعي بحرارة ولسعت خدي.. يا الله بس انت
تعرف شحالي وشداحس بهاللحظة.

دگ موبايلي سما وصفتلها بيا فرع والمكان
بعده الموبايل بأيدي وطبگت سيارة گدامي
بوكتها الله ذب عليه بجي الدنيا كلة اريد اهدأ ماكو
رفعت راسي والدموع مالية وجهي والهوا يطير بشالي
وشفتة هو وسما ينزلون من السيارة..

گمت من مكاني وامسح بعيوني الذبلانة من البجي
ولزمتني رجفة من فوگ ليجوة جنت متوقعة سما
حتجيبة وتجي گلبي يضرب بصدري بقوة ثار بشوفة
حضرتة اجوي يمي بسرعة حضنتني سما ولزمت وجهي
وگالت بقلق وخوف
سما :- شبيج حبيبتي ليش هالبجي، شصاير وياج