ثلاث دمعات

بارت 53

#ثلاث دمعات
الكاتبة :- ســندريلا ||𝐒𝐀𝐑𝐀𝐇 ♡.
البارت -53-

حاجيني بنظراتك وافتهم شتريد
وخلي رموش عينك هيه تسألني
بس حرك رمش وانة اعرف المقصود
وسولف بالتريدة عنك وعني
صوتك من تسولف حقي اذوبن بيه
ماجنك تسولف جنك تغني
نظراتك طلاسم مالهن عراف
ساعة أرتخي بيهم وساعة تكتلني 🖤

طفوف... متمددة ع السرير وتليفوني بايدي وبس ادعي ودموعي تنزل مخليت دعاء مقريته مضلت
اية قرآنية حافضتها مقريتها اليوم عملية أمنية
وناصر ع اتصال دائمي بغمار وقبل شوية دارين كالت
دخلوها للعمليات الخوف والترقب اكلني اكل احس
الساعة معاندة متمشي بطلعان الروح تمر الدقيقة..

أتدمرت اعصابي ساعة ابجي ساعة ادعي سودة عليه
أمنية شوكت ترتاح ما أدري ياربي تطلعها سالمة غانمة وترجعها النا بصحة وعافية غمضت عيوني
ولزمت راسي مااتحملت سحبت الموبايل واتصلت
بدارين

دارين :- ها طفوف
طفوف :- بشري يمعودة گلبي خلص ناصر ماخابر
غمار
دارين :- خابر قبل شوية لساتها بالعملية تطول
يگول لان بالراس ومكان خطير اقل شي ٤ ساعات
طفوف :- غطيت وجهي بأيدي وبجيت ولج شيصبرني ٤ ساعات القلق والخوف موتني

دارين :- حالي مو أحسن من حالج شنسوي مبيدنا غير ندعي
طفوف :- بس يصير شي اتصلي عليه وخلي الموبايل يمج خاف اتصل دارين مو تخليني بقلق
دارين :- ان شاء الله وكافي تبجين ادعيلها
طفوف :- اكيد ليش لساني وكف عن الدعاء

دارين :- ديلا عيني ان شاء الله ترجعلنا بصحة
وسلامة وتنجح العملية لتنسين همة ضمنو نجاح
العملية
طفوف :- اي صح بس مو بيدي نار مشتعلة بگلبي
ومتطفا الا يكلولي طلعت من العملية ونجحت
دارين :- اي والله حقج حاسة بنفس شعورج
الله كريم صدگيني أمنية عانت وتعبت هوايه واجة
الوكت ترتاح اكيد ربي راح يعافيها ويعوضها بصحتها
وغمار

طفوف :- ونعم بالله امين يارب العالمين
سديتة من دارين وكمت رايحة جاية ولازمة ظهري
حملي حيل تعبان وكل يوم لو نزف لو وجع
واروح للدكتورة تكولي لازم راحة تامة وجنان عدها
دراسة التكدر عليه تسوي واني حتى اذا اشتغل اشتغل شوية وارتاح شوية مع انه مهران ميقبل اتحرك وراد يجيب وحدة تشتغل عدنا بس موافقت

ماعدنا شي قوي بس طبخ وتنضيف وخبز وحدة
تخبزلنا همة يعرفوها واني وجنان نتساعد وعائلتنا
صغيرة ولا طفل ولا شي بس المشكلة بحملي حيل
ضعيف ومأذيني ولسة عندي وحام اي شي اشمة
تلعب نفسي اغلب الاكل مااكدر اكلة وللديوان
جاب گهوجي مدري جايجي مدري شسمة المهم
هو هذا

و مهران ببداية حملي كمت اموت منة مااتحمل
من يتقرب مني احس روحي تريد تطلع وهو خطية
ياخذ فراشة وينزل ينام جوا واني اطگ من البجي
اشتاقلة واريدة ومن يجي مااتحمل قربة بس هسه
شوية احسن..