روايتنا ابطالها من عائلة الحاج محمد يسكن في ضواحي طرابلس في مزرعة كبيرة و أولاده و كل احفاده معاه في نفس المزرعة
الحاج محمد عمره 75 سنة لكن ماشاء الله شاد صحته و قايم روحه و لبسه ديما متناسق و منظم لين تعطيه اصغر من عمره
زوجته الحاجة سالمة يا كبدي حتى هي نفس نظامه الشيب عمره ما تشوفه في شعرها ديما هديكا القصة الحمراء اللي تلمع ع الشمس و عيونها السود المكحلات و خدودها بيطربق منهم الدم رغم العمر و عمايله بس مازالت زي القمر و خاصة في عيون شيبانيها
عندهم ثلاث اولاد و بنت واحدة
نبدوا بالكبير والكبير الله
جمال مواليد 1968 .. يشتغل في مصنع ألبان للعيلة هوا اللي ماسكه و من يومه اناني نفسي و بس و بعدين صار همه نفسه و مرته و صغاره و ما يتحمل حد يوصل فيهم حتى لو كانوا غالطين
و زوجته نجوى مواليد 1973 نفس نظام راجلها ربة بيت و كل همها نفسها و راجلها و صغارها ظالمين أو مظلومين ما يهمش
اولادهم و بناتهم
طه مواليد 1988 انسان ملتزم و شخصيته قوية هلبة و كلمته ما تكونش اثنين في العيلة هو مهندس و يشتغل في شركة اجنبية و في نفس الوقت يدرس في قران في الخلوة في العشية جميل و انيق خاطب بنت جيرانهم و امها وأمه صاحبات هلبة
طارق مواليد 1989 خريج طب و شاد قرايته و خدمته و بس انيق و جميل في حاله ما يحبش يدخل في مشاكل العيلة المهم خدمته و قرايته و بس
طيف مواليد 1993 بنت كيوت و حلوة و جذابة تقرا اخر سنة في كلية التقنية الطبية تموت في عيلتها و خوتها و طه بالذات كبيدتها
طلال مواليد 1994 يقرا في سنة ثانية اقتصاد جوه حلو و بصايري يحب عيلته و عيونه خوه طه و لا يمكن يتحمل فيه دقة الشوكة
نجو للولد الثاني
اسمه عبدالمهيمن مواليد 1970 و لسبب مش معروف لمعظم العيلة مهاجر لبريطانيا و عايش غادي متزوج بأجنبية و عنده راس بنت و ليه سنين طويلة ما جاهمش زيارة .. هوا دكتور بيطري حاشاكم بس عنده مطعم عربي في مانشستر وين ما عايش و حالته ممتازة و يملك شقة في مانشستر
زوجته ليزا مواليد 1974 جميلة و شقراء و مازال محتفظة بجمالها و كأنها بنت العشرين سنة تشتغل دكتورة تجميل مسيحية مش مسلمة
بنته اسمها خديجة مسميها ع اسم السيدة خديجة رضي الله عنها زوجة الرسول صَلِّى الله عليه وسلم ، رغم انها تربت في الغربة بس ملتزمة بدينها اخر التزام وحافظة القران مواليد 1994 تقرا في اخر سنة كلية الهندسة تخصصها هندسة زراعية تحب النباتات و تصميم الحدائق تعشق حاجة اسماها ليبيا و ياما تحايلت ع بوها يجوها زيارة بس ديما كان يرفض و بشكل قطعي .. علاقتها ببوها مميزة
اما امها فعلاقتهم العكس تماما
الولد الاخير للحاج محمد اسمه ناصر مواليد 1975 يشتغل في نفس المصنع مع خوه جمال مهندس ميكانيكا و آلات شخصيته هادي و محبوب في العيلة لان طيب و فزاع في نفس الوقت اي حد تصير معاه مشكلة يعرض المساعدة اللي يقدر عليها بكل حب .. زوجته ياسمين مواليد 1980 معلمة رياضيات في مدرسة ابتدائية طيبة و متفاهمة شخصيتها قوية في الحق و ما تخافش علاقتها بعزوزتها حلوة عكس سلفتها نجوى بالرغم ان نجوى تكون بنت اخت سالمة .. المهم عندهم ثلاث صغار
محمد مواليد 1999 يقرا سنة اولى هندسة
ميرا مواليد 2001 سنة ثانية ثانوي
مؤيد مواليد 2003 صف تاسع
اخر العنقود هي بنت الحاج محمد و مدللته اسمها جميلة مواليد 1983 تشتغل معلمة لغة عربية في الثانوية شخصيتها قوية و اجتماعية هلبة الوحيدة اللي تتواصل مع خوها عبدالمهيمن بدون علم اَهلها متزوجة من صابر ولد عمها مواليد 1978 دكتور أطفال شخصيته عصبي و جاف معاها و زواجهم تقليدي بدون اي مشاعر عندهم ولد و بنت
البنت اسمها سماهر مواليد 2003 صف تاسع
الولد اسمه سامر مواليد 2005 صف سابع
و بهكي نكونوا اعطينا مقدمة كاملة ع الأبطال الأساسين في الرواية و عيلة الحاج محمد .. طبعا في شخصيات ثانية مهمة في الرواية حنقدمهم ع حسب ظهورهم و دورهم في القصة ..
نتمنى تكون فكرتها جديدة و حلوة و تعجبكم
اي نقد اي ملاحظة نستقبلها برحابة صدر
❤️❤️❤️❤️❤️❤️
يتبع
