سامر: جدي في تاكسي برا جاية فيها مراة
جدي خذي المنشف و مسح ايديه وفمه: ما عرفتهاش مني؟!
سامر بحركة من اكتافه: لا والله
ناصر ساعد جدي يوقف: خليك يا بوي و نمشي انا نشوف مني؟!
جدي بإصرار: لا نمشي انا وياك وأنتو كملوا غداكم
احني كلنا وقفنا اكل
حناي: ترا نوضي انت وياها قيموه الغذاء بكل مرات المراة اللي جاية بتخش اهني
انا : تغدي يا حناي ولو جاية اهني ندخلوها لصالة الضيوف عادي
حناي رفعت ايديها: لا يا بنتي حلاص كلا انا ما عاد عندي نية قيمي
ياسمين : خلاص يا بنات قيموا الصفر
جميلة: اي قيموا و خلاص
وقفت انا و سماهر و ميرا
نقيموا في الماعين
بس محمد و مؤيد و سامر رجعوا ياكلوا
بدينا في غسل الماعين و نستنوا نعرفوا من جي
لعند لما سمعت
: I wanna meet my daughter نبي نشوف بنتي
انا جسمي فشل و راسي داخ عرفت صوتها غمضت عيوني و دورت ع اقرب شي ليا ع شان ننسند عليه لان كتف بابا خلاص مش موجود و في الاخر القيت ايد عمتي جميلة
جميلة مرعوبة عليا: بِسْم الله الرحمن الرحيم !! دوجة بنتي خيرك ؟!
انا بديت نبكي: علاش جت بس علاش ؟!!
جميلة تشوف لياسمين و باقي البنات و مش فاهمة : ع مني تحكي انت؟
قاطعهم صوت عمي ناصر اللي كان واضح راقيله: خديجة امك جت برا و تبي تشوفك
انا حركت راسي بأسف و غمضت عيوني متمنية نكون نحلم : الله المستعان حاضر يا عمي جاية معاك عن اذنكم
جميلة : للدرجة هادي مش حابة تشوفها!! امها في النهاية مهما يكون
سماهر شافت لامها بنظرة فهمتها كويس بمعنى قدامك حالتنا خير دليل
ياسمين قعمزت ع الكرسي : ربي يكون في عونها البنت زي ما تشوفوا فيها ملتزمة و محافظة و كوّن امها مش مسلمة ممكن مسبب فجوة كبيرة بيناتهم و مرات خايفتها تاخذها معاها
ميرا شهقت: هي ان شاء الله لا والله يا ماما تعودنا ع وجودها و كأنها متربية معانا من سنين
سماهر بدت تبكي بدون صوت
جت حناي دوب ما تمشي : اسم الله اللطف خيركم شن جاكم ؟!
وقفت ياسمين و جابتها لين قعمزت ع الكرسي: غير ارتاحي يا عمتي
قعمزت حناي و عيونها مليانة أسئلة : هاني قعمزت اتكلموا شن في؟
