عمي خليفة : يسعدني نقول ان هالمركز واللي اختارناله اسم السلام للتعليم و التدريب هدفه بالأساس تعليمي بحث و مش ربح مادي حنشتغلوا كعائلة وحدة للوصول لهدف واحد وهو الارتقاء بالمستوى العلمي و الثقافي لكل من يقصدنا للمساعدة رسوم التسجيل حيراعى فيها اي حد ما عنداش القدرة في الدفع و حنشتغلوا بنظام التكافل و التعاون يعني لو انا ما عندي قدرة ندفع لكورس الطب ع سبيل المثال بس متفًوق في الرياضيات و نقدر ندرس السنوات الاولى و نعطي تقوية فحندفع الرسوم اللي عليا باني ندرس هالطلبة بالمجان نتمنى تكون الفكرة وصلت
ثاني شي حنتكلم ع التخصصات الموجودة
عندنا اللغات إنجليزي و فرنساوي و ألماني و إيطالي
و عندنا كورسات الطب بمختلف موادها
و كورس للحرف زي تصليح الهواتف و الكهربائيات و الميكانيكا
و الطبخ
و تحفيظ القران و الأحاديث الشريفة
و كورسات منهجية
و كورسات كمبيوتر
و اخيرا و ليس آخراً وهو برنامج كفالة اليتيم باسم سالم ال##### وهو حيتكفل بتعليم الأيتام وتأسيسهم في مختلف المواد و التخصصات و اكيد حيكون مجاني و نتمنى منكم تلاوة سورة الفاتحة ع المرحوم اللي تم تأسيس البرنامج ع اسمه و صدقة جارية ع روحه و اكيد اي حد حاب يتبرع للقسم هذا حنكونوا ممنونين ليه و يقع أجره ع الله تعالى و شكرًا
جدي مختار شافلي بنظرة حلوة كلها امتنان و شكر و انا ابتسمت مع عيون مليانة دموع
و أمينة جرت عليا و حضنتني و بكت بقوة : بارك الله فيك دوجة ع فكرتك هادي
انا مسحت دموعي : ما درتش هكي باش تشكروني انا بس نبيكم ترتاحوا ان المرحوم في مكان افضل و بادن الله هالصدقة تكون حجة ليه لا عليه و تنفعه يوم لا ينفع الا العمل الصالح
امينة من وسط قلبها: ياااااارب
جدي مختار : يا محمد بنت ولدك هادي زادتني حسرة ع خسارة ولدي لو كانت مرته و جابتله صغار كيف حتكون حياته قداش بيكون سعيد و مرتاح معاها اااااه يا سالم ربي يتقبلك يا ولدي برحمته
جدي : امين و بعدين معش تقول هكي يا خوي و تضيع الأجر بالعكس لازم تفرح و تشارك فيه الأجر هذا ع شان يوصل ولدك في دار الحق اللي كلنا ليها و ما حد عارف امتى يكون يومه
انا مشيت لجدي مختار: شني يا جدي تمشي معاي تشوف القسم اللي درناه باسم المرحوم
جدي مختار بصوت مخنوق : هيا
سامر و سماهر: حتى احنى
امينة: و انا معاكم
انا ابتسمت: هيا
مشينا مع بعض
وصلنا في القسم و كان ليه بابا كبير لونه ابيض و عليه لافتة قسم ابي سالم للتعليم
الفاتحة للمرحوم
جدي مختار قري اللافتة و بدّي يبكي و يقرا في الفاتحة
جدي دمعوا عيونه و بدّي يقرا في الفاتحة و كلنا ع نفس الحال
