طه: جدي بتقوللها خديجة ع الكلام اللي قالهولك خوك؟
جدي بقسوة : اكيد طبعا اماله مندسه عليها
طه بصوت يرجف: جدي ما تقوللهاش اجل الموضوع أرجوك مرات مرات
جدي بحدة : مرات شنو؟ انت معش تتحشم شكلك ! والا خلاص حتى ثوب الدين تخلصت منه زي ما حولت ثوب العادات والبيتية لما سيبت بنت عمك بدون ما تعطينا علم ! انا يومها نبهتك و حذرتك يا طه خديجة ما ليكش علاقة بيها و خليك في مراتك و رد بالك تظلمها زي ما ظلمت خديجة لان كسرة الخاطر واعرة واعرة هلبة
طه والعبرة متمكنة منه و مفترساته: مش قادر مش قادر ايه غلطت و فرطت فيها بس كنت مصدوم بالكلام اللي سمعته وتوا نبي
جدي بحدة : شن تبي يا طه ؟ تبي بنت عمك ؟ بتخطبها ؟ باهي شن رايك نمشي نقوللها الكلام هذا ، طه خطبك و سالم خطبك وانت اختاري !! شن رايك من بتختار؟
طه بتوسل: مش توا يا جدي ! خليها تهدا الأوضاع وانا بنفسي نفهمها اللي صار و متاكد انها لما تسمعني حتعطيني فرصة
جدي بصوت عالي: طه !طه ! ولدي شن جاك؟ وين طه اللي يخاف ربي في الصغيرة قبل الكبيرة يا ولدي انت قاري فاتحة في بنت ناس و بكامل إرادتك كوّن امك ورطاتك بنت الناس ما ليهاش ذنب تبهدلها معاك و بعدين انا ناس جوني فيها حتى لو ما كانش خوي ما نقدرش نلف و ندور عليهم لعند انت تحل مشاكلك لللي مش حتنتهي عارف ليش؟! لان امك مش حتخليها في حالها خديجة لو وافقت عليك و سامحاتك اللي داراته امك يخليني نفكر مليون مرة قبل نخليها تكون في مكان واحد مع نجوى مش نعطيهالك وانت متزوج غيرها هالشي مستحيل زيد احسبها و فكر تلقاني واقف معاك مش ضدك
طه حس بالعجز لا قادر ينسى و يمشي الموضوع عادي و لا قادر يقنع جدي ان ياجل موضوع سالم لعند تهدا الامور
كل اللي داره انسحب و شغل سيارته و قرر يلتجأ اللي لا ملجا منه الا اليه
اتجه للمسجد طول ع شان يشكي همه و حزنه و حيرته لله سبحانه و تعالى
اما جدي تنهد و خش داخل جنبنا
انا كنت انشف في ايدي و طالعة من المطبخ نضحك انا و ياسمين و جميلة لان الكل اتجه لمدرسته و جامعته وعمله
مشينا جنب جدي
انا لجدي : جدي انا وقت عليا منمشي للمزرعة شني تسايرني والا ما خاطركش
جدي عدل جلسته : لا وين ما خاطريش منشوف خليفة و نهدرز عليه و منشوفك وانت تخدمي
انا : اي اليوم منشتغل ع شجر الزيتون يبي تنظيف وعناية خاصة نبي نحضره للموسم الجاي و جاي الجرار حتى هوا ع شان الارض اللي منديروا فيها خضرة و هذا غير الحديقة اللي منديرها باش نهتم بالورد النادر اللي بيبعثلي غرسه عمو ممدوح يوصل الاسبوع الجاي هلبة خدمة ضروري أتم اليوم
