نا نشدت و سالت بس للاسف انت ما جاوبت؟!!
للعين انت شنو؟
انت سرها .. انت جهرها
و للروح انت شنو؟
انت سحرها .. انت بحرها
و لبنتك انت شنو؟!
انت ظهرها وانت طُهرها
انت فرحها .. وانت ترحها
ايه اليوم انت ترحها
اااااه يا بوي انت بوي
للعين انت ضيها
وعيني بيك
من هو زيها؟!!
بس اليوم .. العين خسرت ضيها
و اليوم .. البنت فقدت اوبيها
والروح خلاص عدا سحرها
و غرقت في احزان بحرها
و ماعاد حد يحفظ سرها
الله يرحمك يا ضيها يا اوبيها 💔💔💔💔 كلماتي
فقدان الأب كسر ظهر لا يجبر طول العمر
باهي لما يجيك تيليفون و بكل بساطة يقولك
ان عيلتك كل عيلتك في خطر في العناية
تصارع في الموت و يا عالم تتجاوز هالمحنة او لا
هذا التيليفون اللي جاني و بلغني ان بابا في المستشفى و حالته خطيرة بعد تعرض لحادث ، وانا بابا هو كل عيلتي ماعندي حد و ما نعرف حد غيره
انا : yes it is me how can I help you نعم هذه انا كيف أساعدك ؟
الطرف الثاني: I am sorry for telling you that your dad had an accident and now he is at ..... hospital يوسفني اخبارك ان والدك تعرض لحادث وهو حاليا في مستشفى ال####
انا حسّيت الدنيا وقفت كل شي وقف ما عدا دقات قلبي اللي زادوا حطيت ايدي عليه و حاولت نذكر الله بصعوبة وقتها كنت في نقطة بعيدة عن كل شي : اللهم أجرني في مصيبتي !! اللهم أجرني في مصيبتي واخلفلي خيرا منها
مشيت بخطوات مش متوازنة لعند موقف التاكسيات و ما نندريش ع روحي بعدها لعند القيتني في المستشفى قدام العناية مقعمزة و نستنى ندعي و ندعي و متمنية من الله يمد في عمره
كانت ساعات مرعبة و طويلة انتظار المجهول و تكون بروحك اتصلت بماما اكثر من مرة بس ما تردش
تمنيت في هاللحظة لو كنت في ليبيا ممكن كانوا حيكون معاي أقارب و عيلة بابا
طلعوا الدكاترة من عنده
وقفت و انا خايفة من الكلام اللي حيقولوه مش قادرة نسال اصلا نشبحلهم و خلاص
الدكتور تقدم مني : الباين حضرتك عربية ؟!المريض اي يقربلك؟
انا مسحت دموعي بقوة : اي انا من ليبيا طمني دكتور وهذا يكون بابا
الدكتور: انا متأسف كنت متمني اطمنك بس الوالد وضعه حرج جدا الحادثة اللي حصلتله كانت كبيرة و زيادة الباين كان عنده بداية تجلط ع القلب قبل الحادثة احنا عملنا اللي نقدر عليه و الباقي ع ربنا
انا بديت نبكي بهيستيريا : دكتور بالله عليك خليني نشوفه
الدكتور : حاضر تعالي معايا حضرتك ( الدكتور كان فاهم وضع بابا ان شبه منتهي)
مشيت وراه الممرضة تلبس فيا و انا في عالم ثاني خشيت عليه كانوا الأجهزة تقريبا في كل جزء من جسمه ، الجسم اللي ياما حماني و تعب ع خاطري اليوم منهك و ضعيف
شفت لأيده مش قادر يحركها نفس الايد اللي ياما مسحت ع شعري و ياما وكلني بيها
