شفت قبالتي وجه ملثم
وبعدها ماعاد وعيت ع شي
روح طه من صلاة الجمعة فتح الباب و بدّي ينادي: دوجة حبيبي ،
دوجة
مشي باتجاه دار النوم و ينادي عليا : دوجة
بدّي قلبه يدق بقوة من الخوف : دوجة ما تخوفيني عليك و فكينا من المقالب
قدم بخطواته باتجاه المطبخ و شافني طايحة ع الآرض قلبه رجف من الخوف جري عليا و طبس قامني بين ايديه : دوجة حبيبتي
حطني ع الصالون و حول ملاية الصلاة من عليا و يمسح ع شعري بحنية
بعدها وقف و مشي لدار النوم و خذي برفاني و جابه بخ منه ع ايديا و ع ايده شويا وحطها ع انفي: هيا حبيبي فيقي و ما تخوفيني
انا بديت نفتح في عيوني وحاسة راسي دايخ و ثقيل واول ما شفته حضنته بقوة و بديت نبكي: معش تسيبني طه
طه حس بخوفي و حضني بقوة : حاضر بس قوليلي علاش خايفة هكي
انا شفت جهة روشن المطبخ و غمضت عيوني بقوة و تشبثت فيه بكل قوتي من الخوف و تكلمت بصوت يرعش : شف... شف .. شفت
طه شدلي وجهي بأيديه الاثنين : بِسْم الله الرحمن الرحيم هدي روحك و اذكري الله قبل و بعدين احكي
انا بديت نذكر في الله في سري لعند صوتي بدّي يعلى شوي شوي: لا اله الا الله لا اله الا الله
طه وقف وانا شديته بقوة : وين ماشي؟
طه: نجيبلك اميا بس
انا وقفت معاه : نمشوا جميع
طه مات خوف عليا : حاضر يا قلبي تعالي معاي جابلي اميا و شربت و مازلت نرجف بين ايديه
طه حط ايده ع راسي و بدّي يقرا عليا في قران لعند هديت : احسن توا
انا براحة : الحمدلله
طه : باهي طمني قلبي و احكيلي شن صار معاك؟
انا غمضت عيوني : حسّيت بخوف اول ما مشيت انت قريت قران بعدين مشيت للمطبخ حبيت نطمن ان اللي شفته الفجر مجرد خيال حطيت صوابعي بين فتحات السرانتي ع شان نشوف قابلني واحد ملثم يخوف واقف جنب الروشن بعدها معش نندري بشي لعند شفتك
طه : وشني اللي شفتيه الفجر؟
انا بخوف: لمحت حد يجري جنب الهنجر اللي سألتك عليه
طه استغرب : متاكدة دوجة ؟! يعني مرات من الخوف تهيالك بس
انا : لو اللي شفته الفجر كنت شاكة فيه لكن اللي توا متاكدة زي ما نشبح فيك ، طه خلينا نمشوا من اهني
طه : اكيد حنمشوا بس مش قبل ما نتأكد من كلامك لو في حد اهني لازم نعرف مني و نحط حد للقصة هاذي
