طه : منتزوج لكن مش بنت صاحبتك ، توا تتصلي و تنهي كل شي معاهم
نجوى شهقت و حطت ايدها ع قلبها: هييي تي شن تقول انت هبلت رابط البنت اكثر من سنة وتوا تجي بتفسخ ! علاش ؟! تكلم
طه معصب ع الاخر: اللي ما تسمعش كلامي ما تلزمنيش و لا نديرها مراة واللي تكذب عليا ما نحطها في حوشي
نجوى : تي شن تقول انت فهمني يا طه !! كيف ما سمعتش كلامك و بعدين انت اصلا وين شفتها او كلمتها
طه مسح ع شعره بغل: مش اتصلت امها بيك وين قاتلك بنتها ماشية؟
نجوى: قالت ماشية مع بنت خالتها لحوشها جايينها صاحبتها
طه بنفاذ صبر: وانا القيتها طالعة تهيج في مطعم تغني و ترقص و بلبس استغفر الله العظيم يا امي انا ما نبيش لا نتكلم عليها ولا نخوض في عرضها النتيجة اني مستحيل مازال نكمل معاها و تم الموضوع تمشي انت تنهيه بالحسنى احسن ما نمشي انا و نتعارك مع ولدهم
نجوى انصدمت و قعمزت بحيل مهدود لان اللي قداش ليها تخططله ما صارش منه
اما طه خش لداره و طلع توتة من الدولاب و خش للحمام يدوش
بالنسبة لرويدة كسرت و خبطت في دار بنت خالتها و في الاخير فشلت من العياط و أعطتها مودة منوم خلاها ترقد
مودة سكرت الباب بالشوية و تنهدت براحة بعدها اتصلت بخالتها: ايوا خالتي كيف حالك توا
مفيدة: الحمدلله كيف حالك انت وامك
مودة مرتبكة : الحمدلله قلتلك خالتي رويدة نبيها تبات عندي اليوم بالله عليك
مفيدة مش طايب ع خاطرها: و علاش ؟! واصلا خطيبها ما يرضاش
مودة في سرها و كان تعلمي وين شافها خطيبها: احم انا يا خالتي نبيها تقعد عندي لان غدوا جايتني مندوبة مبيعات جايبة بضاعة صح من فرنسا عطور ماركة و حاجات ثانية نبيها تاخد منهم لبتاتها
مفيدة بتفكير : اه اذا هكي مش مشكلة و خطيبها انا نتصرف معاه
مودة تنهدت براحة: ماشي اماله توا
مفيدة: باهي وينها اعطيني انكلمها
مودة تخبط ع وجهها وفي سرها تقول يا احليلي عليك عملة: احم في الحمام حاشاك
مفيدة: ماشي قوليلها تكلمني
مودة بربكة واضحة: اي اكيد لما تكمل تكلمك
مفيدة استغربتها بس ما ركزتش: ماشي بنتي بالسلامة و سلمي ع امك
مودة : ماشي و يوصل سلامك.. اوفف ما بعدها منك بنتك كل حاجة تبي تعرفها
واقف ع الدولاب و يطلع في حوايجه بسرعة و يلبس
هي واقفة وراه و معصبة ع الاخر: شن معنى تصرفك هذا يعني ماشي و مسيبني من ثاني يوم يا صابر
