جدي يتكلم و قلبه معصور ع خوه بس كان لازم يتخذ هالخطوة: اسمعني يا طه كويس و نفذ اللي نقولك عليه بالحرف الواحد
طه بانتباه كامل : تكلم يا جدي نسمع فيك
جدي تنهد: فاتحتك نقرأها الخميس زي ما تفاهمنا و رد بالك يا طه تأجل لأي سبب الا اذا لا قدر الله (سكت لما خنقاته العبرة) يعني لو صارت في خوي حاجة وقتها اجل غير هكي لا
طه بزعل : بس يا جدي كيف تبينا نفرحوا وانت متكدر و زيادة مش معانا
جدي : قلبي معاكم يا ولدي و بعدين نبي نطمن ع خديجة انا هي بادية في خدمة و عاطية مواعيد وانا مرات نعطل في تونس يعني من حيمشي معاها ؟! عمك ناصر مش فاضي اقل شي انت تقدر تاخذ اجازة و تتفرغلها و تقعد انت المحرم ليها حتى في الحوش سلم ولدي هنيني
طه اقتنع نوعا ما: حاضر يا جدي بس حتكون فاتحة في الجامع بدون اي شي ثاني راهو و ما تجبرنيش ندير لمة و عشاء وانت غائب والله ما نقدر ولا بنت عمي ترضاها
جدي ابتسم : حاضر زي ما تبي بس نرجع و نقولك بنت عمك وصيتي ليك يا طه حافظ عليها و أحميها يا ولدي من القريب قبل البعيد فاهم عليا
طه دمعوا عيونه لان فاهم جدي من يقصد بكلامه: حاضر يا جدي و ربي يرجعكم سالمين و يكون جدي مختار راد صحته بادن الله
جدي بأمل في الله: ان شاء الله يا ولدي
و فعلا سرعان ما تموا الإجراءات و ركبوا فوزي و جدي في سيارة و معاهم سالم و جدي مختار مشي في الإسعاف و معاه ممرض و طارق اللي اصر يكون معاه
ودعوهم و رجعوا للمزرعة
انا مقعمزة و جنبي ياسمين مرة عمي و عمتي جميلة اللي كيف روحت و البنات
رِن تيليفوني و كان جدي : السلام عليكم
جدي: و عليكم السلام كيف حالك بنتي؟
انا: الحمدلله انت طمني عنك يا جدي و ع جدي مختار
جدي : الحمدلله ان شاء الله خير انا طالعين بيه لتونس
انا: توصلوا سالمين و تروحوا مجبورين باْذن الله
جدي : امين .. خديجة!!
انا خفت من طريقة كيف قال اسمي : نعم يا جدي
جدي : يا بنتي فاتحتك حتنقرا يوم الخميس و ردي بالك تأجيلها ع شأني لو تبيني مرتاح و متهني خليها في وقتها و راني انا كلمت طه قبلك و عطيته قلة السماح لو ياجلها
انا بديت نبكي : بس يا جدي ما نقدرش انت في مقام بابا رحمة الله عليه و ليك طول العمر باْذن الله كيف تبيني نكون بروحي في يوم زي هذا
جدي تاثر : يا بنتي معاك عمامك و عمتك وحناك والعيلة كلها اللي يحبوك و بعدين انا نبي نكون مرتاح و متهني من تالاك يا دوجة سلم بنتي هنيني
