امينة خشت للمطبخ و شافت سالم مسهم فيا : هييي سالم شن تبي ؟
سالم ارتبك و مدلها تيليفونه : شحني يبي تيليفون
انا ابتسمت رغم كنت متحشمة منه
امينة ضحكت: هههههه قصدك تيليفونك يبي شحن هاته و (همستله) اطلع عيب البنت
سالم وجهه احمر: ماشي انا أسف ما نحسابش في حد امينة جيبيلي توب من الدولاب و طلع
امينة رجعت: حاضر و بعدها شافتلي وتكلمت سامحيني دوجة ما سد حصلتي بروحك ماسد خش عليك خوي بدون مقدمات
انا وجهي احمر : لا عادي مش مشكلة تصير عادي (كنت متلخبطة ع الاخر)
امينة ابتسمتلي و مشت حطت التيليفون في الشحن وجابت توب لسالم و خطمت من جنبي و طلعت
ألقت سالم مقعمز ع الكرسي و سارح و مبتسم
امينة طبست عليه: الدنيا ربيع و الجو بديع قفلي ع كل المواضيع !!
سالم استاقض و شحها من ايدها ومشي بيها مسافة
امينة مستغربة تصرفه: سالم وخيي شن جاك؟!
سالم من جهة متحشم و من جهة مش قادر يسيطر ع مشاعره: مني البنت هادي؟
امينة ضحكت وحطت ايدها ع فمها: قصدك الجرية هادي ع خاطرها
سالم طلق ايدها و حط ايده في وسطه و بدّي ينفخ بقوة وحط ايده الثانية ع قلبه: شفتي اهني زي الجمرة طاحت في قلبي ولعت فيا نار عمري ما حسيتها قبل امينة بالله عليك قوليلي مني هادي
امينة مش مستوعبة كلامه: حي ع سالم معش تتحشم خيرك لا البنت طيرت عقلك رسمي هي صح جميلة لكن ما توقعتش تأثيرها يكون للدرجة هادي وعليك انت بالذات
سالم : امينة بتقولي مني والا والله العظيم نولي نخش عليها ونسالها هي
امينة : لا رسمي هبلت
سالم : خلاص انا ما علياش لوم توا انا ماشيلها و مشي
جرت امينة و شداته من ايديه: تي تعالى يا مهبول توا نقولك هادي بنت عبدالمهيمن ولد عمي محمد واسمها خديجة
سالم ابتسم و يردد: خديجة !خديجة! و فجاة تغيرت ملامحه للحزن ااااه يا صابر مستحيل جدها يعطيهالي صح؟!
امينة وجعها خوها هلبة لان ما عمره حب وتعلق ببنت قبل هكي: مش عارفة يا خوي بس معقولة انت شفتها توا و تفكر تتزوجها طول
سالم بهيام: مهما نشرحلك مش حنقدر نوصفلك البنت هادي شن دارت فيا تي انا مش قادر نتعرف ع روحي يا امينة باهي هدرزي معاها وافهميلي وضعها شني مخطوبة متكلم عليها حد اي حاجة
امينة شافت وراها: اسمع توا مش وقتها الدوة هادي انت تعرف بنات العيلة ما في وحدة تعاون حتى بمدان والله لولا هالبنت راني حاصلة بروحي و جميلة عندها مدرسة لذلك عيب خليني نمشي نعاونها واللي تبي تعرفه نقولهولك في الليل
