أنا متوترة ع الاخر: عمتي انا مش حنمشي اعتذريلي منهم
جميلة فنصت عيونها و شهقت: 😱😱😱 هيئ نهاري خيرك؟ بري سلم بنتي البسي و تعالي بسرعة من غير هبال الراجل بيهدرز عليك في حضوري ع شان تتفقي معاه و يكون كل شي واضح بيناتكم
انا نحس في روحي مندوخ نحرك في راسي بنفي و خلاص
ياسمين حضنتني بايد وحدة: دوجة شن جاك ؟! عادي الموضوع و عمتك معاك اسمعي منه اللي بيقوله و قولي اللي في خاطرك كله
طيف ببصارة: والله طه صح رزين و صعب في التعامل لكن عمره قبل ما كلي حد راهو
انا ضحكت ع كلامها: ههههه ضحكتيني
طيف بمزح: باهي اللي شفنا سنونك هيا خفي روحك عن يتحول طه راهو ما يحبش يستنى
انا بخوف : حاق؟!
جميلة دفتني : هيا ما تسمعيلهاش
انا جريت لداري و خذيت البالطو متاعي لونه بزاري و لبسته فوق فانيليا سوداء فيها حزام بزاري و قونة واسعة لونها اسود و لبست بوت بزاري و الشاربة لونها ع البيج و طلعت لعمتي : هيا عمتي واتية انا
عمتي ابتسمت: ربي يحفظك غزالة
انا ارتبكت: قصدك يعني اوفر
جميلة قرصتلي خدي : تي اي اوفر وانت مش دايرة شي يا بنتي ، هيا خلينا نمشوا عيب طه و جدك ليهم هلبة يستنوا
انا خذيت نفس عميق : هيا
طلعت وراء عمتي و لابدة وراها يا دوب نبدل خطواتي و مع كل خطوة دقات قلبي تزيد
طه كان يهدرز مع جدي في السيارة: يعني نتوكلوا ع الله
جدي : يا ولدي انا حكيتلك بالتفصيل بنت عمك شن مفكرة بالنسبة للخدمة وانت تصرف
طه قام عيونه: خير خير ان شاء الله ... صارله استك لما لمحني نمشي وراء عمتي يا دوب بنت عليه و ابتسم لان عرفني متحشمة
فتحت عمتي الباب اللي وراء جدي و استغربت لان يومها قالي ان فيه مشكلة
شفتله و هو كانه فهم عليا اول ما ركبت وراه: السلام عليكم
طه و جدي : و عليكم السلام
طه بارتباك: امس بس صلحته الباب
انا نزلت راسي و وجهي احمر خلاص و استغربت كيف فهم اللي نفكر فيه
جدي و عمتي مع بعض : اين باب؟
طه توتر و حط ايده ع فمه: اها الباب اللي من جهتك يا عمتي ليه فترة ما ينفتحش
جميلة باستغراب : بس انا ما سالتكش؟! هذا علاش ما عرفتش انت ع شني تحكي بالضبط !!!
جدي : هذا حالهم السيارات
