وانا طالعة خبطت في شخص قمت عيوني نشوف مني
وكان هو نظراته كانت حزينة و مليانة اعتذارات تستنى مني إشارة ع شان تبدأ تصرح بيهم بس انا مش مستعدة اني نفتح باب زي هذا حاليا و لا عادراته من اصله
هربت من قدّامه و جريت للحوش
جدي بحدة: تفضل شن تبي
طه تنهد و تعود من الشيطان : السلام عليكم كيف حالك يا جدي ؟
جدي ضم ايديه لبعض : من ربي بخير
طه خش للمربوعة و باس ع راْسه : سامحني يا غالي انا غالط من ساسي لرأسي واللي تبيه انا فيه
جدي باعد عنه: لازم نعرف علاش درت هكي
طه : حاضر بس نبي عمي ناصر يكون موجود لاني غلطت في حقه حتى هو و لازم نعتذر منه
جدي : أماله خليها لغدوا الصبح لان حتى ناصر قاعد غدوا مروح جدك مختار و منمشوله للمطار يعني قبل ما نمشوا نتكلموا لان توا طالع بعد العشاء انا و خديجة
طه شافله و كان ع وشك ان يسال مش قادر يقاوم فضوله في اي شي يخصني
جدي : مش من حقك تعرف !! البنت منديرلها سيارة و بتقضي اشغالها بروحها وانت ماليكش اي حق انك تسألها او تحاسبها
طه بانت عليه ملامح الضيق بس فعلا هوا ما ليشي اي حق يحاسبني سكت زي اللي بالع الموس ع الحدين : عارف يا جدي ما عنديش الحق ! نبي نسألك ع موضوع جلال
جدي مستغرب : كيف ما قالكش ؟! قبل شويا بلغته موافقتنا و موافقة البنت وقلتله شوف روحك امتى يناسبك و جيب اهلك
طه فرح اقل شي اخته تعيش سعيدة و تحت جناح راجل يصونها: لا والله معناها بعد طلعت من عنده باهي ربي يهنيهم ان شاء الله ، هيا تصبح ع خير
جدي ما قدرش يقاوم اكثر : باهي اقعد تعشا معانا و حتى طلال اهني كان بتشوفه
طه باستغراب : علاش خيرا طلال؟
جدي : طاح ع ايده و انكسرت هونا داخل جنب حناك
طه طول وهو يشوف جهة الباب بحسرة مش قادر يتواجه مع حد : لا توا لما يروح نشوفه
جدي حرك راْسه بأسف : متحشم تقابلهم داخل صح؟!
طه انحرج و ما قدرش يجاوب جده
جدي : استنى توا نخلي الشباب يجوك اهني
طه وقف ع طول : لا يا جدي خليهم اكيد حناي (وصوته انخنق) تبي طلال يكون جنبها و لحوشنا مش حتمشي عارفها
جدي قلبه حن عليه: باهي تقعد نتعشوا جميع انا وياك
طه ابتسم و عيونه دموع: لو تمشي تصلي معاي العشاء في المسجد عادي
جدي ابتسم : خلاص معناها نمشوا نصلوا و نكلمهم داخل يحطولنا عشانا جميع
طه فرح ان قدر يقرب من جدي اقل شي هادي خطوة كويسة و لما يعرف غدوا سبب تصرفه اكيد حيسامحه
