طلال بنبرة حادة و هو يفنص: علاش شن دارتلكم؟
انا ارتبكت و بصراحة لاني حسّيت ع ميرا و مشاعرها خفته يقسى عليها بالكلام : ما دارتلنا شي بس ع شان طيف حتزعل لو فيقناها من النوم و من امس هي توصي فينا ما يكلمها حد يعني كلامنا كله ع طيف
ميرا فمها تقوس و مستمرة تطرح في الفطيرة وأيديها يرعشوا
طلال عيونه ع ميرا: ما تبرريش يا خديجة انا اللي عارف سمهم هي و طيف مش طايقين رنده ، طيف ممكن نتوقع تصرفاتها بسبب غيرتها لانها أختنا الوحيدة و طبيعي اللي تدير فيه لكن انت آنسة ميرا ممكن نفهم علاش الغيرة و الحسد متاعك
ميرا دموعها ينزلوا و ساكتة مش قادرة تدافع ع نفسها
انا تعصبت: طلال مش هكي عاد اعرف شن تقول مش معقولة قاعد تلقي في الاتهامات عليها هكي
طلال : و علاش ما اتدافعش ع نفسها لو كان معاها حق !! علاش انت اللي تتكلمي بدالها
ميرا لاول مرة في حياتها تتشجع تتكلم و تواجه ومن؟ الانسان اللي تكون في اضعف حالاتها قدّامه مسحت دموعها بذراعها و وقفت: معاك حق مش قادرة ندافع ع روحي قدامك لاني تعودت انك انت اللي اتدافع عليا ! تعودت ديما نكون وراء ظهرك عرضك و عرق عينك مش هكي كنت تقوللنا انا وطيف ! شن صار اليوم اللي انقلبت عليا من طول عمرنا نتكلموا و نعلقوا ع بعض علاش توا مش متحمل كلامي 💔💔 لكن عهد عليا و قدام بنت عمي اللي ما تعرف شي ع حياتنا زمان و كيف عشنا و كيف تربينا مع بعض
لساني ما يخاطب لسانك ولا عيوني يجو في عيونك و لا نتكلم ع حد يخصك من اليوم حتكون سراب قدامي وانا يا ريت نكون شفافة في عيونك يعني وقت تشوفني وكانك ما شفتني و ربي يهنيك يا ولد عمي و غسلت ايديها و طلعت بسرعة
طلال حس روحه طاح في بير غريق كله سواد حواليه للحظة سال روحه شن درت انت شن درت معقولة نجرحها بهالشكل و انا حاس و عارف بمشاعرها ناحيتي غمض عيونه بضيق و ضرب الباب برجله و طلع معصب ركب سيارته شغلها و طلع
انا دموعي نزلن تأثرت بكلام ميرا هلبة و وجعتني ما فقتش غير لما شميت ريحة الشياط قمت الفطيرة و كملت ندير فيها و جت سماهر تساعد فيا و مازال كلام ميرا يتردد في وذاني.
ميرا فتحت حوشهم و خشت لدارها فتحت الحمام حاشاكم و خشت تحت الدوش و غمضت عيونها و اختلطوا دموعها بالميا الدافئة غير ان دموعها كانوا ساخنات و يحرقوا حرق من وجعهم و من شدة الالم اللي حسوه
طلال مشي قدام البحر و كاره روحه لين خلاص و ليش تصرف هكي طبعا هو دار هكي لان رنده مشت لداره في الليل و حكتله ان بنات عمه مستكردينها و حاسة انهم حاطين عليه العين و يهينوا فيها و من هالكلام
انا كملت لف الفطيرة بعد ما طابت ع نزلة ياسمين
ياسمين : صباح الخير ...
