الحاج مختار : انت تسمع في الكلام اللي تقول فيه؟!
صابر حاول يتمالك أعصابه: يا حاج انا نكلم فيك بالعقل و نبيكم معاي
الحاج مختار: لا انا و لا من يتبعني حيمشي معاك
صابر بعصبية: علاش يا بوي ؟ كيف تبيني نمشيلهم بروحي
الحاج مختار ضحك بهزوة: هههه ع اللي شفته يجيبوهالك لعندك من غير ما تطلبها
صابر انحرج: بالله يا
الحاج مختار بحدة : كلمتي قلتها و تم والحوش هذا حوش صغارك يقعد باسمهم والحمدلله اني ما سجلتهلكش قبل، حنسجله لصغارك و هديكا اللي تبي تأخذها ما تعفسلي حوش انت تبي تشوف امك تجي بروحك
صابر اتضايق هلبة: حرام عليك يا بوي !! وين تبيني نسكن ؟! تقدر تكتب نص الحوش للصغار لو خايف عليهم و انا النص الثاني و ما تنساش اني خاسر عليه هلبة
الحاج مختار ضم ايديه لبعض: مش ناسي بس انت شكلك ناسي انك خسرت عليه انت وجميلة مش بروحك معناها الحوش من حق الصغار
صابر وقف بيأس : خلاص معناها ما حد يلومني في الجديد لو ما جيتكم لأنكم انتم اللي ما تبوني وقفتوا مع جميلة ضدي
امه و هي تبكي : تعرف لو اني مش متاكدة ان حيجي اليوم اللي تبكي فيه بدل الدموع دم ع جميلة و ع صغارك كنت مشيت معاك و خطبتهالك حتى لو طلقني بوك !! بس انا عارفة انك ماشي للنار برجليك يا وليدي اللي تخرب حوش و تدير ميعاد و سريب لراجل متزوج و زيادة مخدمها خو مرته هادي ما تخاف ربي و لا تقدر تامنها ع حوش !! اللي تسلم في نفسها و في مكان خدمتها لأي حد هادي بلا شرف و سيورك واقف ع كلامنا هذا وقتها تعرف علاش وقفنا معاك !! اي اي احني واقفين معاك مش ضدك
صابر عيونه دموع حاس بصدقهم بس مازال يكابر طلع بدون ما يرد و مشي لحوشه ركب من الدروج و فتح داره و نزل الشناطي و بدّي يضم في حوايجه و يمسح في دموعه بكمه بكل قوته
اول ما كمل اتصل بصديقه هيثم: اهلًا يا هيثم
هيثم : كيف حالك يا صابر
صابر : الحمدلله . قلتلك لو فيها كيف تعطيني مفتاح الاستراحة محتاجها يومين لعند انظم أموري
هيثم حرك راْسه بأسف : تعالى تلقاني فيها جايب عمال يصينوا في حوض السباحة
صابر : تمام مسافة الطريق
و سكر
خذي شناطيه و تفحص الحوش بنظرات سريعة ماكانش حاب يركز في شي خوف من هداكا الشعور اللي يحارب فيه من لما سمعت جميلة كلامه مع ليلى
( الندم) 💔💔
لهالسبب غمض عيونه بقوة وهو نازل بشناطيه بسرعة بس ما قدرش يسكر وذانه !! و مش اي وذان وذان القلب
ضحكت سماهر: ههههههه غير ذوقها يا بابا و احكم اما احلى كيكتي انا والا كيكة ماما
جميلة شهقت: هييي صدق من قال علمناهم الشحاذة سبقونا ع الأبواب توا تبي روحك خير مني يا فالحة
