فجاة شفت قدامي طيف
طيف حطت ايدها ع قلبها : خلعتيني خاشة نتسحب خايفتهم يكبسوني حيه عليا لو تعرفي شن صار معاي يا دوجة
انا بانتباه : تصالحتوا؟!
طيف : اي .... (سكتت) هييي نهارك قصدك تعرفي ان جلال كان يستنى فيا
انا ابتسمت: ياسمين مرة عمي بعثتلي مسج ع شان نبعثك انت للمربوعة الداخلية لان جلال يستنى فيك غادي
طيف حضنتني : ربي يفرحكم زي ما فرحتوني كنت حاسة روحي اخي من غيره
و بدون سابق اندار
يبدوا مع بعض
سماهر و العنود و ميرا :
ياام خدود تقول وريدة ... مبروك الدنيا الجديدة
اليوم قرينا الفاتحة .. بالذرية الصالحة
طيف جرت و حضنتنهم و انا كذلك
طحنا كلنا ع سريري
انا نشوف فوق و مبتسمة: زي الحلم
طيف : قولي حلم
ميرا تلعب بشعرها : حلم الطفولة
العنود حطت ايدها ع قلبها و تنهدت : حلم تحقق بعد حرمان سنين
سماهر حطت ايديها في نصها و قعمزت ع ركابها : شن الجو هذا قعدت انا و بس وسطكم زي العزولة وانتو شادينها عالم الأحلام
طيف رقدت ع بطنها و بتفكير : اللي نشوف فيه حتى انت مش مطولة
ميرا رقصت حواجبها : زي ما نشبح فيك
انا ضحكت: هههههه و انا نتفق معاهم
العنود : يعني انا بس اللي مش فاهمة ؟
سماهر : و معاك انا لاني مش فاهمة شن يخرفوا
ميرا بدت تصفق : يا أحميدة و يا حمادي
سماهر فنصت عيونها : شن قصدك؟
طيف : دايرة فيها غبية وانت فاهمة كل شي
العنود شهقت : هيييي قصدك خوك يا ميرا؟!
ميرا باستفزاز لسماهر : ياعيني
سماهر عصبت : عينك و عين عينك تحلمي
انا ابتسمت : انا ملاحظة قداش مهتم بيك و يفرح وقت يشوفك ولما مرضتي قريب انجن عليك
ميرا : تي انت ما شفتيه يوم اللي كانت حتنخطف اقسم بالله قريب دارلنا العار وهو يعيط عليها و زيادة وقت شد في السيارة وهي تمشي و بأعلى صوت سماااااااااهر (قلدت صوته)
كلنا ضحكنا لانها جابت صوته بالضبط : ههههههههههههه
سماهر : خزي عليكم باردات
انفتح الباب و كانت عمتي جميلة : هيا بنات قعدتوا اهني و سيبتونا مكسدين و بعدين حتى زينب مرة عمي جت تبارك
