اصعب انواع الفراق هو ذلك الذي يحدث قبل الاجتماع معا اصلا 💔💔💔 ( كلماتي )
لما تلقى نفسك مجبر تبتعد ع شخص تحسه اقرب الناس ليك بس هوا في الواقع أبعدهم عنك
لما تفارق شخص انت اصلا ما تلاقيتش معاه
الأرواح تلاقت والقلوب تألفت صح بس في الواقع لم يكتمل اللقاء
نرجعوا لأحداث الرواية
وصلنا للصالة
نزلنا وراء بعض
دخلنا الداخل كانت صالة راقية و كبيرة و مش بعيدة هلبة ع المكان اللي نسكنوا فيه
نحينا عباياتنا و نظمنا شكلنا و دخلنا تجنبت استقبال الناس ع شان نبعد ع نجوى مرة عمي
حناي يجردها الأزرق الملكي و معاه بلوزة شتوية باللون الأزرق والذهبي و الكحل اللي معبي عيونها و قصتها الحمراء زايدتها جاذبية
حناي نجية اللي كانت في استقبالنا وهالشيء اثار فضول نجوى بس لانها ما تكلم في حد من العيلة فاتت الموضوع
وحناي نجية كانت لابسة قفطان خليجي باللون الأزرق الداكن و فيه فصوص باللون الأحمر و حاطة شاربة باللون الأحمر وكانت راقية
واقفات جنب بعض و يستقبلوا في الضيوف ونجوى متجاهلتهم وكانت لابسة بدلة لونها فوشي قونتها لتحت الركبة بالشويا و قايمة شعرها فوق بطريقة حلوة وحاطة ميك اب حلو
مشينا لدار العروسة نستنوا في العرائس بس تلقينا صدمة قوية
رندة لابسة قفطان كبير لونه موف و مدايرة تسريحة فوق و ميك اب قوي و مقعمزة و تنفخ
انا مش مستوعبة اللي قدامي ولا متمنية اللي نفكر فيه صح لان وقتها ميرا ممكن تمشي فيها !! علاش يا اولاد عمي هكي بس تخصصكم كسر القلوب علاش
العنود همستلي: تي هادي مني؟
انا بشرود : هادي مصيبة و ربي يستر في عقابها خلينا نظلعو
رندة بغرور: شني ما فيش مبروك؟!
انا : مبروك
طلعنا من عندها مصدومين جريت ع ياسمين : ياسمين
ياسمين كانت سارحة و تشوف لوحدة جميلة و تضحك بصوت عالي
انا شديتها من ايدها: ياسمين نكلم فيك
ياسمين والدمعة في عينها شافتلي : نعم كلمتيني !!
أنا : خيرك ياسمين شن في؟
ياسمين مسحت الدمعة قبل ما تنزل : لا حبيبتي ما في شي غير هكي قلبي وجعني لاني خذيت ع جميلة معانا
انا ابتسمت: الله غالب ربي يهنيها
ياسمين : اي قولي علاش تنادي فيا؟
انا اشرت ع دار العروسة: مشيت لدار العروسة بنستنى العرائس القيت رندة بنت خال طيف فيها لابسة و مدايرة تسريحة وقالتلي مافيش مبروك ما فهمت شي معقولة طلال يديرها و تطلع خطوبتهم اليوم؟!
