ساعات الصباح الاولى مِن يوم الثلاثاء
كانت ياسمين هي و جميلة في المطبخ يجهزوا في الفطور
شويا و دخلت عليهم سماهر و ميرا
سماهر : صباح الخير
ميرا : صباح الخير
ردوا : صباح الخير / صباح النور
جميلة : شفتوا طيف ؟
سماهر و عيونها مازال فيهم النوم : راقدة يا ماما
ياسمين بحزن : يا روحي طول الليل وهي تنوض مخلوعة من الكوابيس
ميرا بأسف : مش ساهل راهو تشوف امها وهي تموت الله لا تسامحهم
ياسمين : امين مش عارفة كيف بس الناس تقدر تخدعك بسهولة هكي يعني طه انحس فيه واعي و متعلم و يفهم في الامور هادي كيف فاتت عليه و غشوه البنت و بوها و الله ماني عارفة
جميلة تقصص في الخبزة : انت تحسابيهم ساهلين هادو؟ لا يا ماما تي هادو زي جماعة الموساد متدربين كيف يتلونوا و ينقلبوا مع كل شخص و دول باستخباراتها تنغش فيهم مش طه
ياسمين : واجعاته امه و واجعاته خديجة اللي خسرها بسبب اللي اسمه مصطفى
ميرا : الكارثة تعرفوا ان محمد قال كل شي مخططينله من البداية
سماهر : حسبي الله و نعم الوكيل والله يا ماما لين بديت نخاف
جميلة قربت منها باستها : لا حبيبتي مش للدرجة هادي خلي ذكر ربي ديما ع لسانك و باْذن الله ما يصيرلك شي
سماهر بخوف : ان شاء الله
ميرا : امتى توصل دوجة اليوم ؟
جميلة : تقريبا نفس وقت وصول رحلة طارق و العنود
سماهر : سبحان الله ع الصدفة
ياسمين بتبرير: تي ماهو قصة الترانزيت تقريبا قالي ناصر جايين ع نفس الرحلة من تركيا
ميرا : اي حقا نسيت
جتهم حناي : هيا انت وياها استعجلوا بفطور الرجالة وقت
ياسمين : حاضر عمتي اهو وإتي خلي انادي محمد و سامر و مؤيد يطلعوه
حناي : باهي و جيبولي فطوري انا وزينب و نجية و فاطمة حتى هي ناضت
جميلة : حاضر يا امي
مشت حناي
جميلة : ميرا بري شوفي خوك خلي يجي يأخذ الصفر للمربوعة
و انت سمورة مدي لحناك واللي معاها الفطور
ميرا وقفت : حاضر و طلعت برا بتكلم محمد
و سماهر خذت الغسيل و البخشة و مشت للصالة ع شان تحط الفطور
ميرا مشت للمربوعة اللي داخل و تتصل بمحمد ما ردش عليها
طقت ع الباب
