في أوقات كثيرة ينقلب الحق باطل و الباطل حق و كله لان الباطل بايع روحه للشيطان لا مبادئ و لا اخلاق ولا حتى حاجة و عايش ع مبدأ الغاية تبرر الوسيلة
تفاجا عمي خليفة اللي كان ماشي بيشوف الوضع في المركز وإذا حيجو طلبة أو لا بعد اللي صار و في نفس الوقت ع شان قصة الصيانة اللي انا كلفت بيها شركة عن طريق المحامي مناعي في ليبيا
الي فاجأ عمي خليفة زحمة الناس قدام المركز و الاكيد طبعا أكرم كان معاه
نزل أكرم مستغرب
و كانوا الناس محتقنين و ينادوا بتسكير المركز نهائي و محاكمة صاحبته و حبسها اللي هي انا
و الأصوات تتعالى
سكروه و حاكموها
بنت ال#####
و غيرها من المسبات
عمي خليفة اتصل بجدي و بلغه
جدي يلبس بسرعة و طلع يا دوب يمشي ماعاد عنده جهد لشي
لاقاه عمي ناصر نازل بسرعة متصل بيه أكرم : شني يا بوي كلموك؟
جدي مرتبك : ايه يا ناصر ايه مش عارف الناس شن جاها باش تصدق هالكلام
طلال شافهم هو ومحمد و اصروا يمشوا معاهم شغلوا سياراتهم و طلعوا
و اتصلوا في الطريق بفوزي
فوزي كان مع عمي جمال في المستشفى جنب طه بس خارج غرفته
عمي جمال : خليك انت يا فوزي و انا نمشي نشوف الوضع
فوزي : خلاص توكل وانا نكلم جماعة ال### يتصرفوا مرات الامور تطلع ع السيطرة
عمي جمال : عين العقل لكن طه رد بالك تقوله
فوزي : ما توصي حريص
و انطلق عمي جمال
بدت قنوات الفتنة بالذات ببث احتقان الناس و مطالبتهم بتسكير المركز و محاكمتي
كان مصطفى يتفرج و مستمتع و في ايده التيليفون : اهم شي تديروا بث مباشر وخلي جماعتنا اللي مندسين بينهم يزيدوا يشحنوا الناس لين يكسروا اللي قعد فيه
: ان شاء الله
مصطفى حط التيليفون
واحد من حاشيته : لا أدري ما فايدة ما نقوم به
مصطفى : اذا أردنا الهروب من هنا بسلام علينا ان نلهيهم بشيء اخر وهذا الدي تراه افضل ما يمكن ان يلههم عنا
و ابتسم بخبث و كمل : لا تنسى المهمة التي أوكلت لك
: اطمئن قيد التنفيذ
مصطفى : ممتاز
و حاليا اللي شاغل باله حاجتين المهمة اللي كلّف بيها الشخص هذا و كيف يقدر يوصل في طه
