كل يوم يبدا لحظاته بشروق الشمس اللي تبعث فينا طاقة إيجابية رغم اي ظروف ثانية
هاليوم كان غير يوم مشمس وممكن هلبة زيه مروا علينا بس عليا لا هذا يوم حنكون فيه مع نصفي الثاني اللي حيكملني في كل شي في فرحي و زعلي و راحتي و تعبي
فتحت عيوني جو ع العنود مقعمزة و ضاغطة بايدها ع بطنها و كأنها تتألم استغربت قعمزت و قربت منها: صباح الخير سلامتك العنود
العنود بصوت مرتبك و يرجف : صباح النور !! خايفة مش عارفة شن جاني من لما نضت وانا بطني مغص قوي هلبة و مش قادرة
انا عقدت حواجبي : خايفة من الليلة؟! والا لانك بتسيبي بوك وخوك؟
العنود بدت تبكي : الاثنين يا دوجة مش عارفة مش متخيلة اني بنسافر و منقعد بالسنين مش حنشوفهم
انا حضنتها: اول شي تعوذي من الشيطان و اوقفي توضي و صلي ركعتين و بعدها اقري سورة يس و باْذن الله حالة الارتباك وأعصاب المعدة يخفوا عليك و ثاني شي هذه سنة الحياة و طارق وعدك وباذن الله مش حيخلف وعده ليك و حياخذ عمي خليفة اول ما يرتبله اموره و يدير عمليته و يرجع يمشي و وقتها ما في داعي تخممي عليهم اما بالنسبة لوقت انت مسافرة باْذن الله العيلة ما يقصروش وانا نعاهدك اني نهتم بيهم و باكلهم
العنود : ربي يحفظك بجد حاساتك اختي مش صاحبتي بس
انا بحب: نفس احساسي يالله ديري زي ما قلتلك
وقفت العنود و مشت للحمام اكرمكم الله
انا تفقدت هاتفي وين والقيته ع الزيانة شفته و تصبحت ع احلى كلام من يوم قرينا الفاتحة وهًو يصبح عليا برسالة احلى من الثانية
( يمر الوقت و نرجى في الميعاد اللي تكوني فيه بين ايديا و ليا رسمي صباحك حب و دلال يا زها عيني )
انا تنهدت : اه منك بس يا مهجة القلب ❤️
( الناس صبحها بعد شروق الشمس و انا صبحي بعد نقرا رسالتك ليا صباحك فرح و هناء و ربي يجمعنا ع خير ❤️)
حطيت الهاتف و مشطت شعري
طلعت العنود و بدت تلبس في ملاية الصلاة
انا خذيت بجامة لونها وردي فاتح و دخلت للحمام دوشت و غيرت و طلعت نجفف في شعري
العنود كملت قراءة قران وسكَّرت المصحف و باساته : الحمدلله مشكورة دوجة فعلا كلامك حاسة براحة غير عادية
انا نجفف في شعري : العفو حياتي ما في كيف كلام ربي يبعث الطمأنينة في النفوس
طق الباب و دخلوا طيف و ميرا و سماهر يدربكو ع الباب
إيدك يا مزينة... نبوا عروستنا قنينة
وعروستنا غالية.. كيف ذهب إيطاليا
موش خسارة دفع الليرة ..في مولاة العين كبيرة
كيف الصقر يحوم وراها.. سكر راْسه لين خذاها
