البطل المغمور "شمس الغروب"

المقدمه

💐...
يوم جديد من ايام السيده الاربعينيه الفاضله "أسيمه"
المراة العامله وبرغم هكي مافي شي عندها اهم من عيلتها هي الأولويه وبعدها يجي كل شي..
اسيمه زي اغلب القائدات لبيوتهن...
تسقد راجلها وصغارها من الصبح للعمل والمدارس..
زوجها طبعا في حالة كان بايت في الحوش..وليلة امس كان بايت في الحوش..
سقداته للمستشفى زوجها مدير لمستشفى وطبيب في نفس الوقت..
والصغار للمدارس..
الكبار الزوز وليد وبنيه...
الولد في الثانويه...والبنت الإعداديه..
الزوز شهادة السنه هادي..
وعندها غيرهم زوز بنيات توأم صغيرات كذلك سقدتهم للحضانه..
وقعدت هي...
لادت ع حوشها...
وتممت ع الغدي..بعدين مشت لخدمتها..
هي زي هلبه نساء في مجتمعنا..تخدم مدرسه في مدرسه للبنات اعداديه..
طبعا في العالم الثالت مهنة التدريس تعتبر مهنه من الدرجة العاشره..
لكن هي كانت تحترم فيها..وتأدي في واجبها بضمير ومحلله قرشها..
أسيمه هلبه يطلقوا عليها لقب المراة المثاليه برغم ان اللي دير فيه مافيشي مثاليه هو واجبها مازادت عليه شي...
🌹
بعد ماعطت حصتها..
طلعت من الفصل وهي تمشي بسرعه ومرة مرة تشوف للساعه فرسغ يدها اليسار..
وبيدها اليمين حاطه تليفونها ع ودنها وتتصل بزوجها اللي خطه ينادي ومايردش..
اسيمه غمضت عيونها بتذمر بعدين فتحتهم وقالت:ربي يهديك ياهيثم ربي يهديك..
نزلت تليفونها..وهي تشبح القدام شافت بنتها واقفه مع صاحبتها وبنت جيرانهم في نفس الوقت تهاني...
وقفت عليها وقالت..
أسيمه بجديه:شن ديري برا فصلك؟
سارة بنتها برجاء:بالله عليك ماما خوديلي اذن نبي نمشي لمعرض مدرسة زياد..
اسيمه بحده :تحركي لفصلك..
كيف جت بتتكلم سارة تاني..قاطعتها امها وهي تأشر بسبابتها بإتجاه فصل بنتها..
تنهدت ساره بضيق وشبحت لصاحبتها تهاني وقالت:هيا تهاني..
تهاني هزت راسها وهي تشوف لأسيمه بعدين مشت هي وسارة..
قعدت اسيمه معاهم بعيونها لين خشوا للفصل..
بعدين زفرت بقوة..وشبحت القدام ومشت بسرعه كملت طريقها...
°°°°°°°°°°°°°°°°°••••••••••••••
في إحدي مدارس البنين في العاصمه..
في حجرة كبيرة جدا كانوا يستخدموا فيها كمخزن وحاليا معرض للرسم..
الرسم الموهبه اللي يتمتع بيها زياد..
زياد شخص حساس...طيب..حنون..
بس مشكلته انه فيسع ماياخد موقف من أي حد مايقدراش ولايقدر اي شي يحبه..
وبوه مع الأسف ديما مستسخف موهبته لأنها في نظره مافيش منها اي فايده لا ليه ولا للناس..يعني لاينفع بيها نفسه ولا غيره..
طبعا بوه ماعبرش عن رأيه بصراحه الا لزوجته..
وهو كان فاهم من تصرفات بوه معاه وتهكمه الغير مباشر ع موهبته..
اسيمه كانت حاسه ان الفجوة بين زياد وبوه كبيره..
وكل مايكبر زياده كل ماهالفجوة تزيد تكبر وهالشي خوفها هلبه..
لهدا قاعده تحاول تقرب المسافات..وتصغر هالفجوة..
اقعنت زوجها يجي ويحضر المعرض اللي فيه منافسه بين اعمال الطلبه من بينهم زياد..
لما اقتنع زوجها مشت طول فرحانه لولدها وقالتله ان بوه حيجي للمعرض وانه عطاها وعد..
وبوه لما يوعد مستحيل يخلف ولأنه يعرف هالشي كويس فرح من داخله هلبه لكن مابينش..
وهو توا يستنى فيه..يستنى فيه اكثر مايستنى في أمه..
"زيزو"
حطت ذراعها ع كتفه بقوة وهي تقول في الاسم اللي تعود تناديه بيه..
هو ضحك وقال:نوسه..
نسيبه بجديه مصطنعه:ابله نوسه ياولد..
زياد بضحكه:اسفين ابله نوسه..
نسيبه بإبتسامه:تشن هالحركات والابداعات والحاجات الحلوة..
زياد بضحكه:قصدك فهمتي منها حاجه!؟
فنصت فيه وقالت:شن قصدك!
زياد:ههههه لا والله نسأل عادي..
رفعت حاجبها وقالت:طبعا نفهم ونفهم هلبه في الفن راهو مايغركش اللي تشوف فيه اني من داخل انسانه مرهفة المشاهر ورقيقة القلب..
زياد هز راسه وهو يشد في ضحكته ورفع حواجبه ونزلهم..
هي ضحكت وضرباته ع ظهره..
هو ضحك بصدمه..الخبطه قريب طلعت قلبه..
وزملائه يتفرجوا عليهم بالسرقه وهما يضحكوا بكتمان..
ع وصلة امه اللي كانت جايه تجري وهي داهشه..
لما وصلت فيهم قالت:السلام عليكم..
شبحولها الزوز..
زياد؛امي خيرك داهشه؟!
نسيبه:جايه تجري تحسابه فاتها..
زياد ابتسم وقال:راك جايه قبل الوقت..ومشي بيجيبلها ميه..
قربت اسيمه من نسيبه اللي تكون اخت زوجها يعني حماتها وسألتها:حصلتي هيثم؟
نسيبه:تي اسكتي من كثر ماعششت واني نرن حطني في الحظر..
تنهدت اسيمه بضيق وقالت:واني مايردش عليا..معناها مش جاي..مش حيجي..
ارتسمت ع وجه نسيبه ملامح الضيق بعدين التفتت شبحت لولد خوها وهو جاي جايب لأمه شيشة ميه..
°°°°°°°°°°°°°°°°°°°•••••••••••••••••
مع الساعه الواحده ظهرا..
باص سارة حطها هي وبنت جيرانهم بداية الشارع زي ماتعود..
نزلوا وكملوا طريقهم..
ساره:مش حيجي بابا ونعرفه..
تهاني:ياسارة لازم تفهمي ان بوك دكتور وقته مش ملكه..
سارة:كيف يعني الدكتور ماعنداش وقت لصغاره؟مالا علاش يتزوج من الأول ويجيب صغار!؟
تنهدت تهاني وقالت:احمدي ربي ياسارة..بالله عليك عاجبك بوي اني واللي يدير فيه والسمعه المعفنه اللي خلاها تلحقنا وين مانمشوا!؟ ياريته خلا فساده دابه خوتي التلاته ضيعهم معاه..
شبحت تهاني لورشه بوها وخوتها لتصليح السيارات نزلت عيونها وقالت لسارة:حي عليا خليل قاعد والنبي سرعي مشيتك سارة ونزلي عيونك..
شدت ساره ضحكتها ونزلت عيونها وسرعت مشيتها..
☆في الورشه..
التلاته كانوا لابسين قامجوات..
جهاد ورفيق زي بعض..لكن خليل بالحمالات وتحته كان لابس تيشرت رصاصي..كان واقف على سياره يعاند فيها..
وخوته كل واحد فيهم واقف ع سيارة ومرة مرة يشوفوله ويضحكوا بكتمان..
شويه جهاد شبح الساعه بعدين شبح لخوه رفيق وقال:الواحد وسبعة دقايق ياااا..
حط رفيق مفتاح تصليح ع تركينه..
ومشي للمرايه شبح روحه فيها..
وجهاد مشي غسل ايديه..بعدين جاه طول وقف عليه قعد يساويله فشعره..
خليل وهو غايص في السياره اللي واقف عليها:تي اطلع ياراجل وفوت الجو اللي ديرفيه بتعجبها هكي باهي يافوت عمها مرة وحده
رفيق شبح من المرايه وقال: شارون..تريس ع روحك..
وقف خليل ع حيله وشبحله من المرايه شبحه حاده..
جهاد وهو يشوف لخليل خبط رفيق ع صدره وقال تداركا للموقف:هيا اطلع قريب توصل..
قلب رفيق عيونه ومشي بإتجاه باب الورشه..
جهاد قعد يشبح لخليل..
وخليل ولى يشوف للسيارة وقعد يخدم بعصبيه..
💓وقف رفيق برا وحط ايديه فجيوبه..
ع خطمة اخته وسارة من قدام الورشه..
قلبه دار مهرجان بصخب النبضات المتسارعه..
وقعد بعيونه مع ساره اللي مايشوف في حد معاها اول مايشوفها..
فاتت من قدامه لين وصلت هي واخته لبداية الزنقه اللي ترفع لحياشهم وادرقت من قدامه..
تنهد من وسط قلبه..
بعدين كيف جاي بيولي للورشه عينه جت ع واحد واقف بسيارته قريب من الورشه..
تبدلت ملامح وجهه للحده دارله حركة بعيونه..
بعدين مشي خش داخل طول..
اول ماخش قال:شارون..
حط خليل العده اللي فيده والتفت لجهاد..
جهاد طول طلع ع خشة الراجل..
وقف جهاد برا وطلع دخان وبدي يدخن..
داخل..
الراجل:البضاعه توصل غدوة بوكم عنده بيها علم وبعتني نبلغكم ونقول لواحد منكم يستلمها..
خليل:باهي تو نزيد نكلمه ونفهم منه..
الراجل:دير رايك..هوينا..
ومشي طول طلع من الورشه..
شبح خليل لباب المحل وقال:تو نمشي بروحي..
رفيق:مستحيل نطلقك بروحك..
شبحله خليل ع جنب بنظرة حاده..
رفيق بشي من الغضب:خاطري نكسرلك راسك..
ضربه خليل ع مؤخرة راسه..
بعدين كيف جاي بيمشي للسيارة..
خش جهاد وهو يضحك قال:الانتر تيكر جت فتاكسي.
خليل بضحكه:جاه شقاه جاه شقاه جاه شقاه..
جهاد قعد يضحك بدون صوت..
وهو ابتسم ع جنب ومشي للسيارة...
•••••••°°°•••••••
خليل..رفيق...جهاد..
التلات خوت...
خليل اكبرهم....ورفيق الأوسط..وجهاد الصغير..
ومن غيرهم في عندهم اخت وحده اسمها تهاني..
وامهم حامل تاني ببنيه...
🥀واقفه ع طنجرة الغدي اطيب وتبكي وهي تقول؛يارب ماتمملي حملي بيها يارب..يارب رحمة بهالبنيه ماتخليها تجي الدنيا وتاخد سمعة بوها وخوتها ويضيع مستقبلها كيف مابيصير لوخيتها..يارب وحده اهون من زوز ياربي...
فجأة سمعت باب الحوش انفتح..
مسحت دموعها طول بعدين دارت روحها لاهيه بالغدي..
ع خشة تهاني عليها وهي تقول:فيفي"اسم امها عفاف"..
عفاف رشفت وقالت:باهي كويس اللي روحتي فيسع فيسع بنتي بري بدلي حوايجك وصلي وتعالي كملي عليا نبي نرقد طشه..
تهاني:حاضر..
ومشت طلعت من حداها..
امها رفعت راسها فوق ودعت وهي تتوسل بهمس:يارب..
بعدين نزلت راسها وهي ادمع ومشت طلعت من الكوجينه...
••••••••°°°••••°°°••••••
ماشي في الممر ووراه موظف ودكتور يسمعوله شن يقول..
هيثم:تو ماشي نكلم استاذ عادل ونبلغه عن المعدات اللي وصلت وانت يابشر نبه اللي عندك يردوا بالهم مايحركوا شي لين يجي يشوفهم بروحه ويتأكد..
بشر:حاضر..ماتبي مني شي..
وقف قدام مكتبه وهو يحرك فراسه نافيا..
بشر:باهي..ومشي طول..
وهو فتح الباب وخش لمكتبه ووراه دكتور يخدم عنده..
وصل ورا مكتبه ووقف وراه..طلع هاتفه من جيب البالطو..
شاف مكالمات زوجته..
مط شواربه لداخل بضيق بعدين شبح للدكتور وقال:تقدر تتفضل توا دكتور وائل بعدين نهدرزوا..
وائل:ان شاء الله..
ولف ومشي طلع من المكتب وصكر الباب..
اما هيثم بشي من التوتر اتصل بمرته وحط التليفون ع وذنه غمض عيونه بشده وعد:واحد..تنين..تلاته..اربعه..خمسه..
انفتح الخط..
هو فتح عيونه وبدي يقول:اسف اسف اسف حبيبتي اسف نعتذر بكل عبارات الإعتذار ماقدرتش نخلي المستشفى في معدات جايه من برا ضروري جدا نوقف عليها بروحي ونشوفها ياروحي..المستشفى مسؤوليتي ياسيما..
ردت عليه بكل هدوء وهي تقول:وصغارك مسؤولية مني ياهيثم؟
سكت وهو ضام شواربه لداخل
اسيمه بلوم:تعرف اني قلت لزياد بوك عطاني وعد انك تحضر..تعرف شن معنى انك تعطي وعد ليه ولأمه وتخلفه؟! شوف كيف خليت شكلك قدام ولدك ياهيثم!؟
غمض عيونه وفتحهم بعدين قال بحزم:حبيبتي اللي ندير فيه اني والمسؤول عنه اني اهم مليون مرة من نظرة ولدك المراهق لبوه..نظرة قاصره ماتهمنيش لما ينضج ويكبر ويعقل ويحط يده في شي نافع وقتها فعلا حندير جهدي بش نبان في عين ولدي كبير..نعتذرلك حبيبتي سامحيني واخر مرة نعطي وعد مانيش قده..
سلام...ونزل التليفون وبالسيف صكر عليها وهو مضايق..
اما هي..
غمضت عيونها بأسف بعدين فتحتهم وقالت بتهكم:نظرتك انت اللي قاصرة ياهيثم مش زياد...تنهدت بعدين وقالت..ربي يهديك ياهيثم..ربي يهديك..
•••••••••••••••••••••••••••••••••••••••••••••••••
هيثم ..طبيب جراح مشهور ومعروف ع صعيد كبير مدير لأحدي اكبر واهم المستشفيات في العاصمه..
في اواخر الأربعينات من العمر...
ناجح برا حوشه وفي حوشه فاشل يإمتياز....

◇◇◇◇◇◇◇