البطل المغمور "شمس الغروب"

الجزء العشرون

💐..
"حطيلنا رسوم سارة"
سارة :باهي بروا قعمزوا قدام التلفزيون..
مشوا يجروا سبقوها للصاله..
وهي مشت وراهم..
في الوقت اللي طلع فيه هيثم من داره متوجه للكوجينه..وهو ماشيلها شاف البنات في الصاله..
قعد يمشي لين خش للكوجينه..شاف نسيبه توتي في الفطور..
تنهد بعدين وقف ع البار متاع المطبخ اللي كان مقابل الصاله...
كان يبانله منها بناته الزوز وهو مقعمزات ع الكنبه..
اتكى بإيديه ع الطاوله متاع البار وهو يتفرج عليهم..
....في الصاله..
سارة:اهي سبيستون..
ومشت قعمزت في نصهم..
هما ضحكوا وهي تضحك معاهم..
هيثم ابتسم ابتسامة خفيفه..
سارة:زعمه شن بيجيبوا توا؟
جنان وريحان:مانعرفش..
...في الكوجينه...
نسيبه:تبي شاهي هيثم.
هيثم التفتلها نص التفاته وقال:ايه..
بعدين رجع شبح لبناته..
وهما الثلاته يتفرجوا عرضت القناة رسوم متحركه مشهورة جدا من سنين طويله..."أنا وأخي"
الشارة الغنائيه ليها..جددت وجع...فتحت جرح اصلا مازال مااندملش..ومن الصعب واحيانا من المستحيل انه يبرا..
قعدوا البنات التلاته سرحانات في الأغنيه..
وتلقائيا دموعهم قعدت تنزل وحده ورا الثانيه..
وهيثم مركز عليهم وهو يسمع في كلمات في الأغنيه..
فهاللحظه التفتت نسيبه وهي تقول:تعالى افطر..
شويه ضيقت عيونها وقدمت وهي تشوف معاه في البنات وتسمع في الأغنيه..
سارة مررت نظرها ع خواتها لقتهم يبكوا بصمت..
تقطع قلبها عليهم برغم ان حالها من حالهم..وضمتهم الزوز ليها...وقعدت تبكي وهي تكتم في صوتها..
هيثم حط ايديه في جيوبه ودموعه معبيات عيونه وهو يشوفلهم...
ونسيبه اللي كانوا عيونها يدمعوا مررت نظرها عليه وعليهم..
بعدين مسحت دموعها وطلعتلهم بسرعه...
وصلت فيهم ومشت طفت التلفزيون وقالت:هيا حبيباتي تعالوا افطروا..خل نفطروا بسرعه بش بعدين نوتوا حوايجنا اللي بنمشوا بيهم للحفله..
الزوز بعدوا عن سارة وقالوا:حقه!..
نسيبه بضحكه وهي ترشف:ايه حقه..
هيثم بعد مسح دموعه عقد حواجبه وقال:حفلة شنو؟!
شبحوله البنات...ونظرات سارة ليه كانت نظرات قلق..
نسيبه بإبتسامة ربكه:جارتنا..عفاف عزمتنا ع حفلة عيد ميلاد دايرينها لوليد قريبهم في حوشهم...
هيثم مرر نظره عليهم وهو مازال عاقد حواجبه ويفكر..
ريحان:بابا نبوا نمشوا...
رفع حواجبه وهو يتنهد..بعدين هز راسه وقال:تمام تمام..تعالوا افطروا ومشي للطاوله..
البنات الزوز صفقوا من الفرحه..وسارة ونسيبه يشبحولهم ويضحكوا..
🍁🍁🍁
ع طاولة الفطور..
كانوا مقعمزين يفطروا في صمت..
وهو يشرب في الشاهي ويمرر في نظره عليهم..
الوجوه كان الحزن مسيطر ع ملامحها..زي مامسيطر عليه هو بكل مافيه..
مكان اسيمه اللي مقعمزة فيه قعد يشبحله هلبه ومش قادر يستوعب ان هالمكان خسر صاحبته نهائيا زي ماهما خسروها..
قام عيونه وشاف لوجه ساره..لقي اثار الدموع باين فيه..
بعدين مرر نظره ع التوأم..واذكر كيف كانوا يبكوا في حضن اختهم وهما يسمعوا في الأغنيه..
▪▪▪▪▪
◇لما نقعمز معاهم ع الطاوله..لازم يكون الصمت السائد لان مانحبكش الحركه والكلام هلبه ع الماكله...بس هالمرة حبيت اني نكسر بنفسي القوانين اللي حطتيها..جتني رغبه شديده في اني نخليهم يضحكوا..برغم اني مش خفيف الدم لكن قلت خل نجرب حظي...
▪▪▪▪▪
نزل فنجان الشاهي وقال:ايه ريحان جنان..
شبحوله كلهم..
هيثم:شن جو المدرسه؟.
سارة قعدت تشبحله بإنتباه..
جنان بحماس:حلوة بابا..ديما نطلعوا استراحه ونديروا خليطه مع البنات..ونلعبوا هلبه..
هيثم رفع حاجبه وقال:والقرايه؟
ريحان:الابله ديما اديرلنا في نجوم وتطلع فينا ع السبورة وكلهم يصفقولنا..
ابتسمت نسيبه..
هيثم؛كويس كويس..بعدين رفع حاجبه اليسار وقال:يفرقوا بيناتكم الابلات؟
ضحكت سارة..
ريحان:وواك يابابا ديما يقولولي جنان..وجنان يقولولها جنان وينسوا وحده اسمها ريحان..
هيثم ضحك من قلبه .
وسارة شبحتله وهي تتأمل في ضحكته اول مرة تشوفه يضحك هكي..
هيثم بضحكه:اكتبيه ع جبهتك اسمك مرة تانيه..
حطت ريحان يدها ع فمها وهي تضحك بعد قالت مندهشه:حيي..يضحكوا عليا يابابا بعدين..
ضحكوا كلهم...
وهيثم قال بعد هدا ضحك:اممم..تو نديروا حل للقصه..لازم نخلوا المدرسه كلها تعرف ان في وحده حلوة ودمها خفيف اسمها ريحان..
ابتسمت ريحان بفرح..
وسارة تشوف لهيثم وخلاص..
جنان:واني بابا شني؟!
هيثم شبحلها وهو رافع حواجبه وقال:حتى انتي زيها...حلوة ودمك خفيف..الزوز زي بعض في كل شي..
جنان:لكن اني اشطر منها..
ريحان بغضب:عينك..
جنان:عينك انتي..
هيثم خبط ع الطاوله خبطه خفيفه هو يقول:هييه..هييه..صبايا..
سكتوا وشبحوله..
هيثم:جنان كان شفتي روحك اشطر من اختك ساعديها بش تولي شاطره زيك..انتم الزوز جيتوا مع بعض بش تساعدوا بعض..
جنان:صح زي ماقالت ماما..
ابتسم بحزن..
ونسيبه غيرت بسرعه السيره وقالت:هيا كملوا فطوركم معاش في وقت بش نختاروا اللبسه..
الزوز قالوا:حاضر..وولوا ياكلوا..
وهيثم يمرر في نظره عليهم..
وسارة مازال تشبحله..
هو شبحلها وقال:افطري بابا..
سارة :حاضر..ورجعت تاكل وهيثم يشوفلها بإبتسامه..
بعدين غير عيونه اتجاه كرسي زياد اللي كان فاضي..ارتسمت ع وجهه ملامح القلق وهو يفكر زعمه وين يكون موجود توا؟!
••••••°°°°°••••••°°°°••••
الساعه الحادية عشر صباحا..
نزل من الدروج وهو شاد راسه ويتوجع...
وصل لوطا وقعد يدور ع رفيقه في السكن..
بعدين قعد ينادي:ريقا..
عبدالملك طلع من داره وقال:زياد صباح الخير..تبي فطور؟
زياد وع وجهه ملامح الوجع:مش توا..راسي مصدع بينفجر عندك بنادول؟
عبدالملك بضيق:استنى لحظه..
ولف ومشي خش داره..
وزياد مشي انطرح ع الكنبه وهو شاد راسه..
شويه طلع عبدالملك وجاه بشيشة ميه وشريط بنادول:خود..
خداهم زياد..
بلع حبتين بنادول وشرب وراهم ميه...
وعبدالملك واقف يشبحله..
زياد بعد شرب ميه شبح لعبدالملك وقال:ااخ..شن صار امس؟!معاش نذكر شي بعد جابوا العشي..
عبدالملك بلع ريقه وقال:انت غلبك النوم رقدت نوضتك ورقيتك لدارك..
زياد غير عيونه عنه وهو يشبح للفراغ..
جي بين عيونه بعض المشاهد المتقطعه..
كأنه يشوف فى روحه..يرقص وكأنه في معاه بنت...
رجع شبح لعبدالملك وقال:مش عارف..
عبدالملك:شني اللي مش عارفه؟
زياد حرك راسه يمين ويسار وقال:شي شي..بعدين ناض وفيده شريط البنادول وقال..خليه عندي مرات نحتاجه..ومشي للدروج..
عبدالملك:ماتبيش تفطر؟
زياد وهو راكب:تس...
عبد الملك قعد معاه بعيونه لين ركب..بعدين تأفف ومشي ولى لداره..
••••••°°°°°•••••°°°°°•••••
الساعه الثانيه عشر والنصف قبل الظهر..
حط من عطر الشيشه ع رقبته من الجيهتين..
بعدين صكره وحطه ع الزيانه وقعد يمسح ع رقبته وهو مبتسم..
نزل ايديه وخدي نفس..بعدين لف ومشي طلع من الدار..
وهوطالع قابلاته ملاك جايه من الكوجينه..
لما شافت هيئته جمدت في مكانه وانستهت فيه..
هو غير عيونه عنها ومشي بطريقه للباب..وهي قعدت معاه بعيونه..
لين شافاته لبس الكندرة وطلع من الحوش..
ع جية عفاف من الصاله لقتها واقفه سرحانه في باب الحوش قالت..
عفاف:خيرك واقفه هني؟
ملاك شبحتلها وقالت:عمتي..خليل ماشي للصلاة!
ابتسمت عفاف وقالت:ايه عارفه..بري عاوينهم في الصاله بري..
تنهدت ملاك بهويام وقالت:حاضر..ومشت للصاله..
وعفاف تضحك وهي تحرك في راسها يمين ويسار..
...في حوش هيثم...
كانت نسيبه تصكر في روشن دارها..بعدين طلعت للبالكونه بش تصكرها..
شافت سيارة خوها هيثم طالعه من الحوش..بعدين شبحت جهة حوش خالد..
شافت خليل طالع لسيارته..
قعدت وافقه تشبحله وهي متفاجئه..
نسيبه"هذا ماشي لصلاة الجمعه! معناها الصبح كان في الجامع حق"..
هو كان واقف ع سيارته يشبح لسيارة هيثم وهي ماشيه..
بعدين ركب السيارة متاعه..
شغلها وتحرك طول..
هي قعدت مع السيارة بعيونها لين ادرقت..
بعدين خشت داخل وصكرت الباب..
•••••°°°°°•••••°°°°°••••••
في المسجد..
كانت هادي اول خطبة جمعه يحضرها خليل..
ناس هلبه من الموجودين كانوا مستغربين هلبه وبإعتبار هالمسجد مسجد المنطقه فأكيد كلهم يعرفوه..
وخليل غني عن التعريف..
وطبعا خليل توا في وضع محرج شويه..يعني الناس لما ربي يهدي من بينهم انسان كان ضال يقعدوا مستغربين فيه ويحسسوه انه دار شي مايمشيش معاه..
هو حاول يتجاهل نظراتهم وكان يحاول يركز مع الخطبه اللي كانت تتكلم موضوع...مش من محض الصدفه اختار الامام يتكلم عنه..بل هو تسخير من الله..الغفار..
يقول الشيخ في خطبته..
"من اعظم واجل اسماء الله وصفاته..الغفور الغفار الغافر..
الله يحب ان يغفر..وهو من قال عزوجل في الحديث القدسي..
《يابن آدم إنك مادعوتني ورجوتني غفرت لك على ماكان منك ولاأبالي》
سبحانك الله مااعظمك..ماأرحمك..واسمعوا ماقال ايضا..
《يابن آدم لو بلغت ذنوبك عنان السماء ثم استغفرتني غفرت لك..》
ياالله..والله انا لمحظوظون بهكذا دين..وبهدا الإله...لااله الاهو..
واسمعو ماقال ايضا..
《يابن آدم لو اتيتني بقراب الأرض خطايا ثم لقيتني لاتشرك بي شيئا》
اسمعوا بقلوبكم رحمكم الله..قال..
《يابن آدم لو اتيتني بقراب الأرض خطايا ثم لقيتني لاتشرك بي شيئا......لآتيتك بقرابها مغفره》
ماارحمك ربي ماأعظمك ربي....
نزلوا دموع خليل بعد ماوصل الكلام لروحه وقلبه...وحرك فيه هلبه حاجات كانت خامده..
كان يمر قدام عيونه كل ذنب ارتبكه..واعظمها تجارة المخدرات..
المخدرات اللي تذهب عقول البشر وتودي بحياة اكثرهم..
خليل مش مصدق ان ممكن ربي يغفرله هالذنوب العظيمه هادي!
الشيخ تابع يقول وكأنه يجاوب ع تساؤلاته..
"يعني الإنسان اللي عاش عمر وهو يرتكب في المعاصي والذنوب مهما كانت وقرر انه يعود لربه تائب لايدع ذنوبه وتاريخه الحافل بالمعاصي يمنعه من العوده..فمغفرة الله ورحمته اعظم واوسع من ذنوبك مهما كانت...ولو تعلموا..ان اليأس من رحمه الله كفر..القنوط من رحمة الله كفر...
لاتدع للشيطان عليك سبيلا..لاتجعله ينتصر عليه عندما يهول ذنوبك في عينك ليمنعك من التوبه...الشيطان كل همه ان يحشر جميع بني ادم في جهنم معه...فلا تنصت له وتتجاهل نداء الله الذي قال جل وعز..
¤نبيء عبادي اني انا الغفور الرحيم¤
واغلبكم يعرف قصة ذلك الذي قتل 99 نفس وذنب
القتل العمد يجي بعد الشرك بالله...
عندما استفتى عابد انه لوعاد الى الله هل سيغفر له..فقال له لا فقتله واتمها ب100نفس..
وتابع طريقه بحثا عن طريق التوبه والرجوع..الى ان وجد عالما استفتاه...
اجابه نعم..الله يقبل توبته...
وهنا تاب هذا الرجل...والله سبحانه وتعالى قبل توبته..
خليل نزل راسه لوطا وقعد يبكي بصمت..
واللي حواليه يشبحوله ومن ضمنهم هيثم..
وتابع الشيخ مستسرلا كلامه وهو يقول..
"ولكن للتوبة شروط...ان تكون نصوحا..لله...يعني توبه لأجل الله فقط لا لأجل امر دنيوي تزول بإنقضائه...وتكون نصوح..يعني ان يعقد العبد العزم على الايعود للذنب...
فكما قال الله سبحانه وتعالي
¤نبيء عبادي اني انا الغفور الرحيم¤ اتبعها قائلا...
¤وان عذابي هو العذاب الأليم¤
وكما قال ¤ان الله غفور رحيم¤ اتبع هذا القول ب..
¤وانه لشديد العقاب¤
علينا ان نعيش بين الخوف والرجاء..
خوفا من عقابه..ورجاءا وطمعا في غفرانه ورحمته...
جعلني واياكم من المغفور لهم في الحياة الدنيا والآخرة...
▪▪▪▪▪
◇ماكانش خليل بروحه التائب يومها...حتى اني اللي قصرت هلبه في الأمانه..واهملتها وبديت عليها حاجات تانيه ماهيش اولى منها...وغدوة ربي حيحاسبني عليها ...
مايجيش صيام النافله وترك صيام رمضان..مايجيش الالتزام بصلاة الليل وترك صلاة الفجر...مايجيش ندفع الصدقه ونسيب الزكاة لو حال على مالي الحول..
حتى في مسؤولياتي مايجيش نقعد نرعى الناس ونلبي احتياجتهم الصحيه نفسيا وجسديا..ونهمل صغاري..بيتي..اولى اولياتي...
ومن هداكا الوقت واني قاعد نفكر في اتخاد قرار..ماكانش ساهل بكل...
▪▪▪▪▪
انقضت صلاة الجمعه..
والناس بدت تطلع من الجامع ومن بينهم هيثم..
لكن خليل كان يدور بين الناس ع الشاب اللي شافه امس في الليل لكن مالقاشي..
تنهد وقال:مش مشكله نتلاقوا في صلاة تانيه ان شاء الله..ومشي طلع من الجامع وهو يفكر في موضوع الخطبه وفي عقله شي ناوي يديره...
•••••°°°°°•••••°°°°•••••
طق باب الدار..
لما سمع الإذن بالدخول..
فتح الباب وخش..
عبدالملك:زيزو هيا نوض تغدا..
زياد وهو حاط المخده ع راسه:مانبيش..
عبدالملك:تي كيف هكي ياراجل معقوله لافطور ولاغدي!؟
زياد بألم:راسي ياعبدالملك راسي بينفجر..
عبدالملك بضيق:ماهداش حتى بعد خديت بنادول..
زياد:شريط كامل بلعته ياعبدالملك..شريط كامل..
عبدالملك قعد يشبحله شويه بعدين قال:عندي تاني للصداع لكن قوي شويه لازم تكون واكل قبله..
حول زياد المخده وناض قعمز وهو يقول بلهفه:تي خيرك ماتكلمتش بكري!؟
عبدالملك: غير نوض تغدا وبعدين نعطيهولك..
ناض زياد بسرعه وهو يقول:وينه الغدي..
عبدالملك :لوطا..
طلع طول زياد وعبدالملك لحقه..
•••••°°°°°••••••°°°°°••••••
"اليوم غدانا من تحت ايدين سارة"
هيثم رفع حواجبه وقال:شن درتي؟.
سارة :مكرونه مسقيه وطاجين..
هيثم:اووو...
ومشي خش للكوجينه...وهما وراه..
توزعوا كلهم ع الطاوله..
ونسيبه قعدت واقفه تصب وتفرق عليهم..
هيثم بدي ياكل..وسارة عيونها عليه..
هيثم:امم..كله معدل زي تطييب امك الله يرحمها...تعلمتي منها صح..
سارة :الله يرحمها..
نسيبه بإبتسامة حزن:حاولت تعلمني حتى اني لكن مافيش فايده..
ضحكوا..
بعدين قعدوا ياكلوا في صمت ماعدا بعض الكلمات اللي كانوا يتبادلوا فيهم نسيبه والتوأم..
شويه هيثم قال:سبحان الهادي..
شبحوله...
هيثم:خالد بعد ماانحبس حياة ولاده تغيرت..اليوم شفت ولده الكبير في الجامع..
نسيبه وقفت ماكله وقعدت تشبح لصونيتهاووجهها اكتسي باللون الأحمر..
وسارة لاحظتها..
هيثم:كان موضوع عن الخطبه يتكلم عن التوبه..قعد يبكي فوسط الجامع اثر في كل الموجودين واني اولهم..
ونسيبه تسمع وقلبها يدق بقوة..
هيثم:ربي يثبته ان شاء الله..الشاب هدا بالذات عاجبني هلبه..
ورجع ياكل مرة تانيه..
نسيبه تنهدت بعدين خديت كاشيكها وقعدت تاكل بالسيف..
وعيون سارة عليها وهي مستغربه..
ريحان:عمتي قصيلي اللحمه..
نسيبه كيف جت بتاخدها..
هيثم قال:شويه بابا..
وناض من مكانه ومشي قعمز جنب ريحان...
وخدي اللحمه منها وقعد يقسم فيها..
وسارة تشوفله..
وكذلك نسيبه بإبتسامه..
جنان:حتى اني بابا..
هيثم:هي لحظه بابا...كولي ريحان..
وشبح لجنان وخدي منها اللحمه وقعد يقسم فيها..
فجأة..رن تليفونه..
هو قام راسه والتفت وشبحله وين ماهو ع الطاوله..
وساره تشوف للتليفون..
جنان:هيا بابا..
شبحلها..قعد يتأمل في نظرات الانتظار في عيونها بعدين ابتسم وقال:حاضر..
ابتسمت سارة ابتسامه خفيفه وعيونها تعبوا دموع..
والتليفون مازال يرن..
وهيثم لأول مرة يتجاهله...لعند ماكمل تقسيم لحمة جنان..
هيثم:كولي حبيبتي..وناض من مكانه ولف ومشي للكوجينه..
خشلها وغسل ايديه...
بعدين مسحهم في الفوطه...وطلع بعدها متوجه لمكان التليفون..
وسارة مانزلتش عيونها من عليه..
هو قام تليفونه وشاف المكالمه لقاها من لجين..
اتصل بيها..
هيثم:السلام عليكم لجين..
لجين:وعليكم السلام الدكتور..كيف حالك..
هيثم:الحمدلله..كيف حالك انتي وحال خوك..
لجين:الحمد لله..دكتور حضرتك في الحوش؟..
هيثم:ايه..
لجين؛شن حال الصغار بالله؟
هيثم:الحمد لله...
لجين بإبتسامه:الحمد لله..دكتور حبيت نذكرك بس بالإجتماع في مقر الحكومه بعد العصر..
حط يده ع جبهته وهو مغمض عيونه بشده لأنه نسي الاجتماع..بعدين قال..تمام تمام..مشكورة لجين..
لجين:العفو هدا واجبي..سلم ع نسيبه والصغار..السلام عليكم..
هيثم:يوصل..وعليكم السلام..
حط تليفونه في جيبه..بعدين لف وشبحلهم..
لقاهم كلهم يشبحوله..
هيثم رفع حواجبه وقال:عندي اجتماع اليوم العشيه في مقر الحكومه..نحضره ونروح طول..نستناكم..لين تروحوا..
نسيبه بإبتسامه:تمام..
هيثم ابتسم نص ابتسامه ومشي بطريقه للدار..
سارة بضيق:ماسألتيشي عن زياد؟
نسيبه بحزن:تس..
سارة بقلق:قلبي قابضني عمتي..
نسيبه حاولت تخفي خوفها وهي تقول:مافي شي يخوف اكيد عند واحد من صحابه الجدد في الكليه..هارب مني ومن النفخ متاعي..
سارة تنهدت وقالت:ان شاء الله..
•••••°°°°°°•••••
"زياد..شن صار معاك!؟"
طلع زياد من الحمام وجهه اصفر وهو يمسح في فمه:معدتي تعبت من البنادول شكلها..
عبدالملك:مايجيش هكي لازم تاكل..
زياد:مارجعتش اللي كليته كله..انت غير عطيني الدوا اللي قتلي بش يخف عليا هدا شويه..وقعد يخبط في راسه..
عبدالملك تنهد وقال:حاضر حاضر...ومشي طول لداره..
وزياد واقف وشاد راسه بقوة من الألم..
ع جيه عبدالملك بالحبه..وشيشة ميه..
خداها زياد طول بلعها وخدي شيشة الميه وشرب منها..
وعبدالملك يشوفله وهو يقول في نفسه"خلاص توا فات الفوت"
زياد مدله الشيشه وقال:بنركب نرقد شويه..
عبدالملك خدي الشيشه وقال:برا...
ومشي زياد من حداه..
وعبدالملك ولى وين مافي الماكله بش يكمل باقي غداه...
...وبعد ماعدت حوالي عشرة دقايق...
قعد يسمع في صوت اغاني قالبات الدنيا جايات من الدور التاني...
عبدالملك وهو ياكل:بدي يتكيف...
وزياد فوق يرقص ويغني زي المجانين وهو مش حاس بشي غير بشعور السعاده المفرط اللحظي اللي حتعقبه لحظات بل ساعات الم طويله...
•••••••°°°°°°°••••••••°°°°°°°°•••••••°°°°°°°••••••
الساعه الخامسه والنصف عصرا..
كان مقعمز في مكان الزيارة وهو يستنى في بوه امتى يجي ويشبح في اللي حواليه من الاهالي وهما يسلموا ع المحبوسين اللي عندهم في السجن بشوق شديد عارم..
جية بوه...ناضله ومشاله...
وين وصل فيه ضمه وهويقول:خلوده..
خالد قعد يطبطب ع ظهره ويقول:شن جو..
بعدوا عن بعض وخليل حاوط كتاف بوه وهو يقول:تمام الحمدلله..انت شن حالك خبرني..
مشوا الزوز لين وصلوا في طاولتهم..
قعمز خالد وخليل قعمز مقابله...
خالد:الحمد لله الامور ماشيه تمام..شبح لسوريته العربيه هو يقول..الريحه متاعها تقول انها جديده..
خليل بإبتسامه:اول مرة تشوفني نشري وحده جديده؟
خالد بنص ابتسامه:لا..لكن هادي فيها حاجه غريبه..ريحتها فكرتني بريحة خوي الكبير لما يمشي لصلاة الجمعه..
ابتسم خليل وقال:واني كنت في صلاة الجمعه اليوم..
ابتسم خالد ع جنب وقال:قصدك بديت تصلي..
خليل:ايه الحمدلله..وانت...امتى تبدا؟.
خالد ابتسم بتهكم:لا خلاص اني راحت عليا..
خليل:كيف راحت عليك؟!متت وقاعد في في قبرك توا؟!
خالد قعد ساكت وهو يشوفله..
خليل:ربي يطول في عمرك ويعطيك سنين زياده تعوض فيهم اللي فات..مازال في عندك فرصه بوي ماتريحهاش..ماتريحش الآخره حتى هي بوي..
خالد نزل عيونه وهو يشوف للطاوله وهو يفكر..
خليل ابتسم وقال:ياريتك تحس باللي نحس بيه توا احساس مش عارف كيف نوصفه..اقسم بالله تقول خشيت الجنه..تخيلت روحي فيها..وتخيلت معاي..نبي نشوفك فيها بوي بعدين ارجوك..
خالد شبح لخليل وعيونه معبيات دموع..
خليل بإبتسامه رجاء:وحق ربي فرصه يابوي اللي انت فيه توا ماتريحهاش..
ابتسم خالد ومد يده وطبطب ع يد ولده..وخليل خدي يده وباسها بعمق...
💎اول حاجه دارها خليل..توجه لبوه طول..حس انه من اول واجباته انه ينقد بوه زي ماهو ربي انقده..خليل كان بار ببوه في كل حالاته..وممكن هالبر كان سبب في هدايته..لاعجب فيقال ان بر فرعون بأمه هو اللي خلا ربي يعطيه فرص لاتحصى للهدايه...وممكن لان خليل كان في قلبه خير وصلاح مدفونين..وربي اراد انه يهديه بش يحي الميت فيه ويحيه بيه...وفعلا..الخير اللي في قلب خليل خلاه مايكتفيش بالهدايه لنفسه...وبدي بالأقربين ليه💎
••••••°°°°°°
■فهالوقت..
وصلت نسيبه هي وبنات خوها لحوش خالد..
بعد ماطقوا الباب..
فتحت تهاني..ولما شافتهم شهقت من فرحتها..
تهاني بضحكه فرح:تفضلوا خشوا خشوا..
نسيبه بضحكه:يزيد فضلك..
وخشوا داخل..
صكرت تهاني الباب وجت لساره وحضنتها بقوة..وسارة تحضن فيها وهي تضحك..
ع طلعة رفيق من الحوش لما شاف سارة ابتسم وقعد واقف يتفرج عليها..
نسيبه بضحكه:باهي خشوا عيطوا داخل..
ع طلعة عفاف وهي تضحك:مرحبتين مرحبتين..
قدمت نسيبه وسلمت عليها بالخد وهي تقول:مرحب بيك..
بعدوا سارة وتهاني عن بعض وهما يمسحوا في دموع الفرح والشوق..
طبست تهاني ع ريحان وجنان سلمت عليهم..
بعدين سلمت ع نسيبه.. وعفاف سلمت ع سارة وخواتها ودخلوهم..
ورفيق قعد مع سارة بعيونه لين خشوا داخل..
بعدين تنهد من قلبه ع وجهه ابتسامه حب ومشي طلع من الحوش..
.....داخل....
كانوا ملاك وسجى طارحات لبس ومكياج...
وعرفه حتى هو لابس ومتشيك..
ريحان وجنان لما شافوه جوه يجروا..
ريحان:عيد ميلادك انت؟
عرفه:ايه عمري توا ولى 8سنين..
جنان:انت كبير..
عرفه:ايه ياذكيه اني تقرا ثالت وانتم اول..
ريحان ضحكت ع جنان..
وجنان بإحراج قالت:نعرف..
وفي عالم تاني بعيد عن عالم الطفوله اللي كلة براءة..
عالم الكبار الخالي من اي شي ليه علاقه بالبراءة..
كانوا ملاك وسجى يوزعوا في نظرهم ع نسيبه وساره اللي كانوا يهدرزوا ع تهاني وعفاف وكان يلقوا يطلقوا عليهم الموت..
سارة بضيق:مانعرفوا عنه شي..
تهاني بقلق تحاول تخفيه:اكيده عن خد من صحابه يغير جو يبي يبعد يعني بش ينسى شويه..
سارة بحزن:ان شاء الله يكون هكي..المهم يكون بخير هدا مانبي...
تهاني:ان شاء الله بخير..بإذن الله..
...عفاف:الحمد لله ان شاء الله ديما هكي..
نسيبه:يارب..المهم يلقى زياد توا..
عفاف:ان شاء الله يلقاه ويرده مايقدره حد بعد ربي كان بوه..
نسيبه هزت راسها وقالت:ايه..وشبحت لملاك..
ملاك شبحتله برفعة حاجب...
نسيبه قلبت عيونها وشبحت للصغار وهي تقول :تعالي جنونتي نساويلك التوكه...
ملاك شبحتلها بإزدراء..
اما سجى فعيونها ع ساره وهي تحول في عبابيتها والشاربه..
كانت لابسه تحتهم لبسه سروال انيقه..ودايره شعرها بتسريحه بسيطه وحلوة ومش حاطه مكياج..
قعد تساوي في شعرها وسجى تشبحلها بغيره كان تلقى تنتفه تنتيف...
🌹وبعد لحظات...
وصلوا زملاء عرفه اللي كان عازمهم مع وليات امرهم..
ماكانش عدد كبير كانوا اربعه بس..
بنتين وولدين..
البنات قعدوا مع بعض..والولاد طلعوا للجنان يلعبوا..
•••••°°°°°•••••°°°°°•••••
فهالأثناء كان هيثم في نقر الحكومه يحضر في اجتماع عادي..
كان مرة يشبح لوزير الداخليه ويذكر في قصة خوه..
ويزيد خوفه على زياد وعقله بدي يودي ويجيب..
وكان واضح انه مش مركز هلبه في الاجتماع والموجودين كانوا عاذرينه لإحاطتهم بظروفه..
بعد ماتم الاجتماع..
طلع طول من مقر الحكومه ودار اتصال يدور فيه عن رقم نعيم الصديق المقرب لزياد وحصله..
......
"والله ياعمي هيثم ليا فترة ماتلاقيتش اني وياه لكن حاضر تو نمشي غدوة للكليه ونشوفه ان شاء الله"
هيثم:وكلمني فورا لو لقيته وماتقولاش بوك يدور فيك..
"حاضر حاضر ان شاء الله"
هيثم:نعبى عليك يانعيم..
"كون هاني ياعمي هيثم"
هيثم:تمام..نستنى في اتصالك غدوة ان شاء الله..السلام عليكم..
"ان شاء الله..وعليكم السلام"
صكر هيثم ..
بعدين شغل السيارة وتحرك وسيارات المرافقه لحقوه..
••••••°°°°••••••°°°°°•••••
"لالا اني مهتم بوزني هلبه نبيه يكون مثالي ديما"
:صحه ليك..
:الحق انتي كلك ع بعضك ماشاء الله عليك يابخت راجلك بيك..
ملاك بضحكه:كلهم يقولوا فيها..انتي وخليل طنجرة ولقت مغطاها عاد هو بروحه ماشاء الله عليه ربي عاطيه الزين والهيبه ربي يحفظه من العين رويجلي..وضحكت..
وهما يضحكوا معاها مجامله..
نسيبه"كان نحصل عليك بس ننفضك نفض ونطيرك ياطنجرة"
:ماشاء الله حتى عرفه شاطر هلبه ولادي يقولوا ديما درجاته مسكرة...
:هدا غير كراساته تبارك الرحمن يومها ولدي خدي منه كراسه..
النظام والترتيب والخط الله يبارك..
ملاك بإبتسامه؛تسلموا يارب..
عفاف بإبتسامه:خطرتوا عليا ولدي خليل زمان كرموه ع خاطر نظافة ونظام كراسته..قاعدات عندي لتو داستهم..
وناضت مشت طلعت من الصاله..
ملاك:راجلي زمان محصل الترتيب الاول ع طرابلس في الشهاده التانويه ولولا الظروف راهو دكتور توا..
نسيبه سرحت وهي تسمع في كلام ملاك..
ع خشة عفاف وفيدها كراسه من كراسات خليل..
كانت مسفره بسفار ازرق نايلو..وعليها ورقة اسم..
عفاف جت بيها طول لنسيبه...
نسيبه تفاجئت من حركة عفاف..
رفعت عيونها وشبحتلها..
عفاف بإبتسامه:هاك تفرجي..
نزلت عيونها وخدت الكراسه..
وكلهم يشبحولها..وملاك بتموت من الغيظ بسبب عفاف اكثر من نسيبه..
شافت نسيبه ورقة الاسم..
مكتوب عليها..
الاسم..خليل خالد
الصف..رابع/أ
المادة..علوم
المدرسه..الصمود..
فتحتها وبدت تلقب في صفحتها..
شافت خط جميل ومنظم لدرجة تبهر العين..
والوراقي مسطره بنظام مافيش ولاغلطه...
ورسمات متقنات...
كان في كل درس لازم يبدا..
بإسم الله الرحمن الرحيم...
وابله او استاذ الماده لما يصلحوا فيها يكتبوله..
بارك الله فيك يادكتور خليل..
عين الله ترعاك يادكتور خليل..
ومزيد من التقدم والابداع يادكتور خليل..
دكتور خليل..هالكلمه تكررت هلبه وحست ان خليل متكلم عن طموحه قدام مدرسينه في المدرسه وهما كانوا يشجعوا فيه..
نسيبه بإعجاب شديد:ماشاء الله...
عفاف:هدا غير تطبيقاته كلهم مسكرات..عندي كلهم وراقي وكراسات..كلهم داستهم عندي..
سارة لتهاني:لهالدرجه خوك كان شاطر!
تهاني بحزن:ايه..كل شي قالت عليه امه شفته بعيني وتحسرت عليه..
نسيبه سمعت شن قالت تهاني وقلبها وجعها..
شويه ناضت ملاك وجت لنسيبه جبدت منها الكراسه وقالت:كويس بكل عمتي اللي دستيهم بش بعدين نوريهم لصغارنا ونقوللهم شوفوا بوكم كيف كان..
ومشت قعمزت تتفرج هي والضيفات..
ونسيبه تحاول تضبط اعصابها بالسيف ع قد ماتقدر...
🌹وعدا الوقت ومع المغرب..
داروا احتفال ذكرى الميلاد وفرحوا الصغار بالأجواء الحلوة بالذات ريحان وجنان اللي كانت عفاف صاخفه عليهم هلبه لدرجة انها تعطي فيهم هما الاولين من كل شي..
وبعد ماصلوا المغرب..
بدوا يوتوا في العشي..
سجى وملاك ولا وحده فيهم تحركت من مكانها..
واللي يعول الضيوف..سارة ونسيبه..
سارة وتهاني وهما طالعات بصواني الحار من الكوجينه..
تهاني بصدمه؛حي عليها خدت راجل اكبر منها ب30 سنه هديكا الحلوة اني لما شفتها قعدت نتفرج عليها من جمالها معقوله دير في روحها هكي..
سارة:مش لاقيه مبرر مقنع..لكن قلت في عقلي اكيده في سبب قوي..
تهاني بتفكير:اكيد..اممم باهي..شبحت ع جنب وقالت..وخوها شن حاله...
سارة عضت ع شاربها وهي تفنص فيها..وتهاني تضحك..
وخشوا للصاله...
برا...
خش خليل للحوش..
ومشي طول لوراء الحوش بيقعمز تحت الكوجينه وين مافي طاوله وكراسي غادي...
وصل فيهم وقعمز وهو يقول:غير امتى يتم ضجيجهم جعان..
"ابله عفاف نحطوا من هادي"
فتح عيونه ع وسعهم وقلبه يدق بقوة..وقعد يسمع..
عفاف:ايه حطي منها دارتها ملاك..
نسيبه مطت شواربها بإزدراء..
عفاف شافتها وضحكت..
نسيبه قعدت تصب في السلاطه بعدين قالت بشي من التردد:ابله عفاف..امتى عرسهم؟
عفاف:مظنيش يديروا عرس..
نسيبه:علاش!؟
عفاف شبحتلها وقالت:ولدي ونعرفه هو قري الفاتحه مؤقتا وخلاص..
نسيبه:كيف هكي حرام..
عفاف:مادوريش كلام ملاك راهو غير دير في الجو قدام الناس لاهي تبيه ولاهو يبيها..
نسيبه قعدت تشبه لعفاف وهي ساكته.
عفاف:خليل ولدي توا ماينفعاش كان البنيه اللي يبيها..
نسيبه وجهها ولى احمر وهي تقول:من هي!؟
عفاف ابتسمت وهي تقول:تستعبطي يانوسه.!
خليل بصدمه:شن تقول امي!؟
نسيبه قعدت ساكته..
عفاف عيونها تعبوا دموع وهي تقول:نسيبه خليل حاله بدي ينصلح..وهو اصلا قلبه نظيف وليدي وكويس هلبه فوق ماتتصوري..نوسه..دموعها نزلوا وكملت تقول..ولدي يحبك فوق ماتتخيلي..والله يانوسه مافي وحدن تقدر تغير حاله للأحسن بعد ربي غيرك يابنتي..
نسيبه ودموعها ينزلوا:ابله عفاف..
قاطعتها عفاف وهي تقول:بالله عليك قولي الحق..انتي تبيه ولالا؟
خليل تلقائيا حط يده ع قلبه اللي كان يدق بقوة..
نسيبه قعدت تبلع في ريقها وهي ساكته..
عفاف:تكلمي يابنتي قولي..
نسيبه رشفت وقالت؛ولو قلت ايه شن حيتغير..
نزلت دمعه من عين خليل اليمين ومازالت يده ع قلبه..
عفاف:هلبه حاجات يابنتي..
نسيبه:مش بالساهل ياابله عفاف..مرته..وخوي..والدنيا الملخبطه في بعضها...اني نفسي مانعرفش اذا كان تغير حق ولاغير مرحله وتعدي..صعب ياأبله عفاف صدقيني صعب..
ارتسمت ع وجه عفاف ملامح الحده وهي تقول:معناها ماتحبيشي كان تحبيه حق تكسري انت وياه كل حاجز واقف بينك وبينه لكن انتي ماتبيش..ع العموم ولدي اني ربي يحبه وتو يسخرله ويبعتله اللي تحبه حق وتستاهله..وسامحيني ثقلت عليك..
مسحت دموعها ورشفت..بعدين خدت الصونيه ومشت طلعت.
حطت نسيبه يدها ع صدرها اللي كان ضايق هلبه ورشفت وهي تقول:والله نحبه الله..لكن خايفه..خايفه بعد نتعلق بيه نخسره..
غمضت عيونهت بشده..بعدين خدت نفس عميق..ومسحت دموعها وهي تزفر بعدين قالت..يارب..فتحت عيونها وقالت..يارب..اخترلي ولاتخيرني يارب..
ورفعت صواني السلايط ومشت طلعت من الكوجينه...
وماتندريش ع اللي دارته فيه..
قلبه في وسط في صدره كان يرقص من الفرحه من اللي سمعه ...لدرجة انه قعد يبكي من الفرح..
خليل بضحكه ودموعها ينزلوا:يارب..اااه..هههه..يارب..شبح فوق وقال بتوسل...اول حاجه نطلبها منك يارب..واغلى مانطلب بعد رضاك..يارب..طالبها منك يارب..اعطيهالي...اعطيهالي يارب..
وحط يده ع وجهه وهو يبكي ويقول "اعطيهالي.."
...وداخل نسيبه في وسط الزحمه تفكر في كلام عفاف وهي تشوف لملاك..اللي كان يبان عليها من عيونها انها تحب خليل..
وهادي في نظرها اكبر عقبه قاعده بينها وبين خليل...
زي ماملاك حتى هي شايفتها اكبر عقبه بينها وبين قلب خليل وتتمنى الخلاص في اقرب وقت...
وسجى كذلك وهي تراقب في سارة حطت يدها ع بطنها وهي تقول في نفسها"مستحيل ياخدها ولاهي ترضى بيه ولابوها يرضى يعطيها"..
ومن بينهم كلهم كانت عفاف مكسورة الخاطر تفكر وتخمم في ولدها الكبير اغلى صغارها ع قلبها..
تبي ربي يثبته..وتبيه يتزوج المراة الصح اللي تعينه وتقويه وتوقف في ظهره بش ينصلح حاله وممكن يحقق احلام بعيده هلبه..
وبإعتباره هو القدوة اكيد خوته حيتأثروا بيه ويلحقوه..
هدا كله ولى ضرب من المستحيل عندها بعد رفض نسيبه..
🥀تقعد ام والام ديما همها الأول مصلحة وسعادة صغارها🥀
••••°°°°°••••••°°°°°°•••••
مقعمز في الصاله وهو يسمع في سورة طه بصوت القارئ ناصر القطامى..
كانت زوجته تحب تسمع القرآن بصوته وخلاته حتى هو يحب صوته...
ويرتاح ويستكين لما يسمع القرآن بتلاوته..
فجأة..سمع باب الحوش انفتح..
ناض ومشي صكر المنظومه...بعدها مشي للباب فتحه..
جو قدامه التوأم..والزوز قالوا مع بعض..
"بابا"..
وجوه حضنوه من رجليه..
هو تفاجئ وضحك بعدين نزللهم وقال:شن جو الحفله..
ريحان:حلوة هلبه..
جنان:جو بناويت يقروا معانا في المدرسه لكن اكبر منا..
سارة بضحكه:باهي خلونا نخشوا.
وقف هيثم وبعد وهو شاد ايدين البنات..
خشت نسيبه وهي تقول:تصبحوا على خير..
ومشت طول بإتجاه الدروج..
شبح هيثم لسارة بإستغراب وقال:خيرها؟
سارة:قالت ناعسني النوم وبنرقد نضت بكري وماقيلتش..
هيثم هز راسه وقال:خودي خواتك وارفعيهم لدارهم..
شدت ريحان يده وقالت:ترقد معانا بابا زي امس..
شبحلهم...
وهما الزوز يشبحولها بنظرات رجاء..
هيثم مط شواربه لداخل وهويقول:امم باهي..بروا توا بدلوا حوايجكم وبعد تكملوا نادوني..
جنان وريحان ضحكوا بفرح ومشوا يجروا بإتجاه الدار..
ابتسمت سارة..
شبحلها بوها...اختفت ابتسامتها وقالت:تصبح ع خير..
هيثم:لحظه شويه..
وقفت وشبحتله..
هيثم:ماتعرفيش اذا كان في عند زياد صديق مقرب تعرف عليه جديد بإعتبار انك مقربه ليه هلبه واسراركم عن بعض..
سارة:كل اللي نعرفهم قلت عليهم لعمتي..
هيثم تنهد وقال:تمام..بري ارقدي بابا..تصبحي على خير..
سارة:وانت من اهله..
ومشت لدارها وهي تخمم في خوها..
هيثم مسح ع شعره للخلف بإيديه..بعدين خبط كفوفه ببعض ومشي لدار التوأم..
••••••°°°°°•••••°°°°••••••
في حوش خالد..
كانوا الولاد مقعمزين في الصاله يتعشوا..
وعفاف وتهاني ونساوينهم يضموا في الحوسه..
رفيق:تاكلوا في كله ع بعضه مااصح بطونكم..
سجى ضحكت..
عفاف:كول واسكت..وشبحت لخليل لقاته يدوب ياكل..
وجهاد ياكل بإيديه ورجليه..
تهاني وهي اضم:ايه حقه بنقولك..سارة اليوم حكتلي حاجه صدمتني..
عفاف:شن هي!..
ورفيق مركز معاهم وسجى تشبحله..
تهاني:ريتها ضرة خالتي ماجده..
جهاد وقف ماكله ومضغ...
عفاف:ايه خيرها؟.
تهاني:ريتي بنتها الكبيره..
عفاف بإنتباه:خيرها هي التانيه؟
جهاد خدي طاسه ميه بيشرب..
تهاني:امس انقرت فاتحتها ع واحد اكبر منها ب 30عام..
فجأه...
بفجعه كلهم شبحوا لجهاد..
بعد سمعوا صوت الطاسه اللي طاحت من يده وانكسرت...

...يتبع...