البطل المغمور "شمس الغروب"

الجزء الحادي والثلاثين"القسم الثالث"

السلام عليكم اعزائي..
تشكوا من حكاية قصر الأجزاء الفتره الاخيره..اني لو بنكتب جزء طويل حنعطل عليكم في التنزيل لأني مش فاضيه 24ساعه بش نقعمز نكتب وغالبا نكون تعبانه وجوي ملخبط ومش قادرة نكتب...
وانتم تشكوا كذلك من التعطيل في التنزيل لهدا قررت ننزلكم اجزاء قصيرة بش مانعطلش هلبه في التنزيل...
حاولوا تقدروا شويه ان الكاتب مش آله راهو بنادم 😁
واخيرا والأهم...
اي حد فاتته صلاة او متأخر عن صلاة او دخل عليه وقت صلاة يصليها قبل بعدين يقرا 😊💕...
🍁🍁🍁🍁🍁🍁🍁🍁🍁🍁🍁🍁🍁🍁🍁🍁🍁
حاضنه ولدها وهي تقول في استغراب..
سدينه؛من قالك تعالى مني؟! دانيه ولا متصله بيك ترعش فيك هالفرخه..
هو باس راس امه بعدين بعد وقال:كان ماكلمتنيش اني في ظروف زي هادي من تكلم! مش كان بعيد يام تخلوني اخر من يعلم باللي يصير معاكم..
سدينه؛وليدي مافي شي كبير صار..عادي عاده بوك مايطولش مع مراة تانيه لازم يطلق بش يشوف غيرها..
مجاهد؛باهي تعالي قعمزي واحكيلي اللي صار بالزبط..
سدينه هزت راسها بإيجاب بعدين خشت هي وولدها للصاله...
•••••••°°°°°•••••••
لبستهم شناطيهم وهي تسمع فيهم كيف يسمعوا في سورة من القرآن مع بعض..
بعد كملوها قالت:ممتازات ياعمري انتي وياها..
شدت ايديهم وقربتهم ليها وقالت:اعطوا لعمو خليل هادي باهي..
خدت ريحان الشوكولا من عمتها وقالت بإبتسامه:باهي..
باست خد كل وحده منهم وقالت؛وخيتي سلمهم عصفوراتي..
وناضت ومشت طلعتهم...
وقعدت واقفه في الباب لين شافتهم طلعوا من الباب البراني بعدين ولت خشت...
جاها طول صوت خالتها وهس تقول..
"تعالي عاونيني يابايرة"..
نسيبه بضحكه:باهي جيتك..
•••••برا.•••••
ركبوا البنات في الكرسي الخلفي القدامي كان مقعمز فيه عرفه...
خليل؛شن جو ياحلوات..
الزوز ردوا مع بعض؛مليح..
مدتله ريحان طرف الشوكولا وقالت:من عمتو..
مد خليل يده وخداه وهو يضحك..حطه جنبه وتحرك...
عرفه:خليل..
خليل؛نعم..
عرفه:ملاك قالت تعالى لحوشنا تبي تكلمك في موضوع..
خليل عقد حواجبه وقال:موضوع شني؟
عرفه؛مانعرفش..
خليل هز راسه وقعد ساكت..
وجنان وريحان يشبحوله...
•••••°°°°°••••••°°°°°°•••••••
"ماتمارسش رياضه في اجهاد كبير..اكتفي بالمشي توا لين يستعيد جسمك صحته ودمك يولي كويس.."
=تمام دكتور...
هيثم:اسمع الكلام...مش باهي ليك الاجهاد الزايد...
ضحك وقال:حاضر يادكتور حاضر..
هيثم ابتسم ومشي قعمز ورا مكتبه..
والحاله اللي عنده مشي بيطلع وهو يقول:صحيت دكتور..
فتح الباب بيطلع لقي قدامه نائب المدير..
وسعله خش وهو طلع...
النائب:دكتور هيثم..
هيثم شبحله وقال؛اهلا دكتور..
النائب وهو مبتسم حط قدام هيثم ورقه..
هيثم عقد حواجبه بإستغراب..وخدي نظاراته ولبسهم بعدين قام الورقه وقعد يقرا فيها..
ارتخوا حواجبه وارتفعوا وارتسمت ع وجهه ملامح المفاجأة..قام عيونه وشبح للنائب..
النائب قال:جاني من الوزاره عاجل..
هيثم وهو متفاجئ:زكيتني انت دكتور؟
النائب:لا والله..لكن الحقيقه تستحقها الرجل المناسب في المكان المناسب..
هيثم رجع يشبح للورقه ويقرا في الكلام ومازال مش مستوعب..
▪▪▪▪▪
◇صح مش اول نمسك ادارة..وبتقولوا اني مسكت وزارة مش بس اداره شن الشي اللي مستوعبه توا؟
اللي مااستوعبتاش وقتها اني سيبت كل المسؤوليات العمليه في حياتي بش نتولى مسؤوليه وحده بس عيلتي..فيجيني توا قرار زي هدا في وقت زي هدا!!
اكيد لربي حكمه من هالشي..حسيت انه يبي يستعملني ديما لكل شي فيه خير لعباده...وماأعظمه من شرف...
كنت قبل نخاف من المناصب..لكن توا حسيت روحي عندي رغبه شديده اني نتولى هالمركز في هالمصح بالذات...
ولأول مرة نوافق ع تولي مسؤولية ادراة مكان بدون مايكون في قلبي خوف او قلق...
▪▪▪▪▪
وانتشر الخبر بين موظفي المصح ونزلائه بسرعه...
وكان اكثر حد متفاجئ بالخبر زياد...بس مااستغرباش..
عارف ان مسؤوليه زي هادي مايقدرهاش غير بوه...
••••••°°°°°°°••••••
"كله من تحت راس الفرخ رشيد"
مجاهد اللي كانت عيونه تقدح شرار من الغضب ناض وقف وهو يقول:بوي وين توا؟
سدينه ناضت معاه وهي تقول؛طلع من الفجر معاش روح..
مجاهد هز راسه ومشي طلع من الصاله وامه لحقاته..
سدينه:وين ماشي ولدي..
مجاهد وهو يلبس في كندرته: لمشوار ضروري..
سدينه:باهي كول حاجه بعدين برا..
مجاهد:واكل يام..فتح الباب وطلع وسكره وراه..
سدينه تنهدت بألم وقالت:الله يسامحك يادانيه يابنتي..
🍁🍁🍁
ودانيه بعد ماانتهى الدوام في مدرستهم خافت هلبه تروح من الحوش...
لهدا طلبت من سارة طلب..
سارة؛ماعنديش مشكله بكل لكن لازم تقولي لحد من اماليك انك مروحه معاي..
دانيه وهي ترشف وتبكي قعدت تفكر..بعدين قالت..راجي شويه بس..
ومشت تجري خشت داخل..
وسارة  واقفه تراجي فيها..
ودانيه داخل كانت ادور ع ابله تعزها بش تطلب منها تليفونها..
ولقت ابلة ماده الأحياء عطتها التليفون دانيه خداته وكتبت رساله وبعتتها لتليفونها خوها مجاهد..
ولما تاكدت انه استلمها مسحتها وردت تليفون للأبله وشكرتها وطلعت تجري لسارة.
وهدا كله كان على عيون جمعه اللي كانوا يراقبوا فيها غصب عنه..
...برا...
دانيه:قلت لمجاهد..
سارة قلبها دق بقوة واحمر  وجهها وهي تقول؛قصدك روح؟
دانيه هزت راسها وهي تقول:ايه...هيا سارة..
وخدتها من يدها ومشوا لباص سارة...
..........
■فهالوقت
مجاهد قري الرساله اللي جاته من اخته..
(اني دانيه وهدا رقم ابله تقري فيا بنروح مع ساره تعالى بعدين العشيه روح بيا)
تنهد بضيق ولوح التليفون ع الكرسي اللي جنبه..
وزاد سرعه سيارته لين وصل لمدرسة خوه...
شاف الطلبه منصرفين...
وهو قعد من بعيد شويه يدور في خوه..
لين شافه طلع من المدرسه ومشي طول لنفس السيارة السودا...
ركبها..
تحركت السياره فإتجاه عكس اللي يرفع لحوشهم...
هو طول لحقهم وكان حريص انه اللي يسوق مايحسش بيه...
••••••••°°°°°°
نزلوا الزوز من الباص..
ومشوا مع بعض...
دانيه:ان شاء الله ماتضايقش مني خالتي ماجده..
سارة شدت يدها وقالت؛مايضايق منك حبيبتي غير بالله عليك معاش تبكي ياسر..
مسحت دانيه دموعها وهي تحاول تهدي بكي...
لما قربوا الزوز من الورشه...
عيون دانيه جو في عيون جهاد اللي كان مقعمز قدام الورشه..
هو انصدم وهي انصدمت وطول غيرت عيونها عنه..
ع طلعة رفيق..
قعد بعيونه يلحق في ساره وهو مستغرب في اللي جايه معاها..
ناض جهاد من مكانه ولحقهم بعد خشوا الزنقه..
ووراه رفيق...
قعدوا يشبحولهم الزوز لين وصلوا للحوش...
وخشوا من بعض..
رفيق:من هي اللي معاها اول مرة نشوفها؟
جهاد:بنت راجل خالتي ماجده..
رفيق شبحله وقال:من وين تعرفها؟
جهاد لف وفات من حداه من غير مايرد..
ورفيق لحقه وهو يشبحله بإستغراب...
.....في حوش الكاتب......
خشوا دانيه وسارة للحوش...
ع طلعة ماجده من الكوجينه وهي ماشيه للصاله شافتهم اتفاجئت..
ماجده بصدمه؛دانيه.!
دانيه ماقدرتش تشد روحها قعدت تبكي..
ماجده مشتلها طول وضمتها وهي تقول:خلاص بنتي خلاص..
ع جية نسيبه اللي سمعت صوت البكي..
تفاجئت لما شافت دانيه...
وسارة قعدت واقفه تشوف لدانيه بحزن ودموعها في عيونها...
■فهالوقت..
كان مازال مجاهد ماشي ورا السيارة..
اللي خشت لطريق حوايز...
قام تليفونه ودار مكالمه مااستمرتش اكثر من خمسة دقايق بعدين سكر...
عفس ع الفرامل بقوة..زاد في السرعه وفات السيارة واعترض طريقها..
السيارة وقفت...
نزل منها مجاهد...
ومشالها طول...
ع نزلة واحد منها منظره مايحويش ابدا انه شخص فاسد..
كان في منتصف العشرينات من عمره..
قال لمجاهد؛خير خوي..
مجاهد:نزل اللي معاك نزل..
:انت مني!؟
مشي مجاهد للباب الخلفي وفتحه..
لقي فيه متكمش مع بعضه ويرعش من الخوف..
جبده وطلعه..
جاه الشاب يجري:وقاله تي حول ياراجل..
مجاهد دفه بقوة وقال:حول انت ياوسخ..
وجبد خوه من يده...
الشاب طلع موس بوخوصه وجي بيه لمجاهد..
شافه رشيد وقال بصوت عالي:خوي خوي..
وقف الشاب في مكانه ووخر..
ومشي طول ركب لسيارته..
اما مجاهد وصل بخوه للسياره ركبه وسكر عليه الباب..
وركب هو...
وتحرك طول وبسرعه...
اما الشاب لما جي بيهرب باللي معاه...
اعترضوا طريقه من الخلف سيارات الشرطه اللي كلمهم مجاهد...
.....في السيارة......
مجاهد بحده:من امتى تعرفه هدا؟
رشيد كان مش قادر يتكلم من الخوف...
مجاهد بغضب:من امتى تعرف من امتى يجيب فيك هني تكلم..
رشيد وهو يرعش:من وقت..من لما بدت من المدرسه..
مجاهد:من وين تعرفه..
رشيد قعد ساكت..
مجاهد بصوت عالي:من وين تعرفه تكلم يازفت..
رشيد:من الفيس..في الفيس..
مجاهد خبط بيده ع الدومان وشده بإيديه الزوز...
رشيد وهو يرجف:بالله عليك ماتقولش لبوي..
مجاهد:بوي...خبط بيده ع الدومان وقال بقهر..الله يسامحه بوي وخلاص..
رشيد ودموعه في عيونه:ماتقولاش مجاهد..
مجاهد:انت تسكر فمك مانبيش نسمع صوتك بكل..
رشيد سكت ودموعه نزلوا..
ومجاهد كان حيبكي حتى معاه...اللي شافه وعرفه كارثه كبيره..ولو طلع للناس حيكون فضيحه كبيره....
بس تفكيره اكثر شي كان في خوه...كيف يقدر يعالجه من الحاله اللي هو فيها..
رشيد توا في سن حرج...والرذيله اللي تعلمها وكان ماشي فيها ولت عنده ادمان وشي ممكن مع الوقت يولي الطبيعي متاعه..
يعني مستقبلا حيأثر عليه هلبه من جميع النواحي...
....ياما منهم اللي زي رشيد...كانوا ضحايا الشبكه العنكبوتيه فريسه ساهله لكل ماتنشره هالشبكه ومافيش عليها رقابه ولافي ليها حدود..وضحيه اهمال اهله ليه كل حد لاهي في حياته وتاركينله الحبل الغارب...
والمصيبه ان الاطفال توا ولى عندهم موبايلات وحسابات ع مواقع التواصل اطفال اعمارهم ماتفوتش 12سنه..
ومخليين النت يستفرد بيهم ويصب فدماغاتهم اشكال والوان من القذارة والعفن...
اهمال الأهل مش بس من هالناحيه..
كذلك لما يخلوا صغارهم برواحهم يباتوا في حوش الجد وحوش الجده اللي يخشوله اشكال والوان...
وهدا واقع وصاير مع الأسف لايمكن انكاره احيانا الخطر يجي من العم والخال نفسهم....وكل يوم ياما نسمعوا وياما نشوفوا من فواجع وحوادث يندى لها الجبين...
والاهمال يستمر..
لما تبعت عيل صغير وبالذات البنات في وقت تكون فيه الحركه شبه معدومه للدكان...او صيدليه او كوشه...
البنت بالذات لازم يكون في عليها الحرص بزايد من هالناحيه..
برغم ان في وقتنا هدا لاعاد سلموا بنت ولاولد...
خلاصة الكلام..
صغاركم امانه فرقابكم...ديما حطوا في بالكم انكم حتوقفوا قدام ربي في يوم حتما حيجي ويسألكم عنهم...حتتحاسبوا عليهم وممكن الحساب يكون عسير...
فحاسبوا انفسكم قبل ان تحاسبوا..
وطبعا المقصد الحرص والمراقبة مش الحبس والتكتيف وجعل الطفل معدوم شخصيه منطوي مايعرف شي..
بالعكس تماما..
بل ونمشي لأبعد من هكي...لازم تتكلموا مع صغاركم في كل شي علموهم اللي لازم يتعلموه في سنهم هدا..علموهم كيف يحموا انفسهم ومايخلوا حد يقرب المحظور الاقتراب منه فيهم...
علموا صغاركم يحكولكم كل شي يصير معاهم ومايدرقوش عليكم...لو ريتوهم يديروا في شي غلط ابتعدوا عن العنف في التعامل معاهم...علموهم ان هدا غلط...وعلموهم شن هو الصح...بش بعدين بروحهم يبعدوا عن الغلط ويديروا الصح...
واخيرا...اهتموا بهواياتهم..أواصنعولهم هوايات حلوة ومفيده بش يملوا بيها اوقات فراغهم...
ولازم يكون للدين اكبر حيز في حياتهم...
اهم شي اعرفوا كيف تعلموهم ...واحرصوا عليهم..
واذكروا ديما حديث الرسول الكريم...
"كلكم راع وكلكن مسؤول عن رعيته"....
🍁🍁🍁🍁
وراعي هالعيله...
كان في حوشه قالب الدنيا ع راس مرته بسبب تأخر بنته دانيه عن المرواح..
مجيد بغضب شديد:غير تروح الكلبه ورب العزة ماعاد تحلم تقصها خطوه برا الحوش الحيوانه هادي..
وسدينه ترعش مع بعضها خوفا منه وخوف على دانيه...
ع خشة مجاهد ورشيد معاه..
رشيد طول خش يجري لداره..
وبوه وامه ماركزوش عليه بكل همهم كله في دانيه..
مجيد:اختك الكلبه لتوا ماروحتش من المدرسه حسام قالي ليها مده يلحق فيها واحد وين تروح والصبح يراجي فيها قبل تطلع..
مجاهد بحده:كذاب..
مجيد:عيي وهو يحلف يامجاهد..
مجاهد:واني نقولك كذاب وارجوك يابوي مرة تانيه معاش تعطي ودانك لحد..دانيه توا في حوش الدكتور هيثم روحت مع بنته وخدت مني اذن..
مجيد:وين!!
سدينه:وخيرك ماخبرتني ياولدي..
مجاهد:اسف يام لهيت..
مجيد:برا توا روح بيها..
مجاهد:بنروح بيها العشيه..
مجيد مشي للباب وقال:عشية شني هادي تروح توا..
شده مجاهد من ذراعه..
وشبحله بحزم وقال:قتلك بنروح بيها العشيه...
مجيد قعد يشبح لنظرات مجاهد اللي اول مرة يشوفها في عيونه..
مجاهد استاقظ لنفسه وحاول يهدا وهو يقوله؛تعال معاي للجامع نلحقوا على صلاة الظهر..
وطلق ذراعه بالشويه...وشد يده وقال:هيا البس في رجليك..
مجيد ارتخي شويه وماقدر يعارض مجاهد..
لبس بلغته وطلع هو وياه من الحوش..
شويه وولى مجاهد قال لأمه:ماتخليش رشيد يطلع من الحوش بكل يام..ردي بالك..
سدينه:علاش..
مجاهد:بعدين نقولك..المهم ماتخليش يطلع افتحي عيونك يام..
سدينه هزت راسها وقالت:باهي ولدي باهي..
طلع مجاهد وسكر الباب..
وسدينه مسحت وجهها ومشت للكوجينه وهي تقول:زعما دانيه بتحاول مع ماجده؟...ان شاء الله تقدر عليها ياربي...
🍁🍁🍁
ودانيه فهالوقت كانت فعلا مع ماجده لكن مش لتقنعها ترجع بوها...
...في دار سارة....
دانيه؛طول قتله هو..
ماجده:احسن مادرتي..اني كنت ناويه نقول لبوك لكن صار اللي صار يومها..وامك ماقدرتش نقوللها خفت عليها الحق خفت تصيرلها حاجه..وخوك مانقدرش نتكلم معاه في حاجه زي هادي..
دانيه رشفت وهي تمسح في دموعها بعدين قالت؛مايقدر يحلها حد من بعد ربي غيره هو..
ماجده؛ان شاء الله يارب...هي توا نوضي البسي الحوايج هادم واغسلي وجهك واطلعي هي..
دانيه؛سامحوني ضايقتكم..
ماجده ضربتها على يدها وقالت:نوضي نوضي..
وناضت ومشت للباب وهي تقول...هي بدلي وساوي روحك المراة اللي بتجي عندها وليد زي العسل مرات تخطفك ليه..
وفتحت الباب وقبل تطلع غمزت لدانيه..
ضحكت دانيه..
ضحكت ماجده وسكرت الباب..
ودانيه ناضت وهي تضحك بش تلبس الحوايج اللي عطتهولها سارة...
•••••°°°°•••••
وقبل الغدي بشويه...
روح هيثم ..وبعد ماروح بشويه جوا عيلة خالد...
الولاد وامهم واختهم والكنه...
استقبلتهم نسيبه اللي كانت بكامل اناقتها استقبال حافل..
وكانت مهتمه بيهم اهتمام مبالغ فيه..
وعفاف فرحانه بيها...وسجى مش طايقتها..
وطايقه وجودها في حوش فيه غريمتها..
.....في المربوعه......
هيثم:الوالد شن حاله بالله..
رفيق وخليل حاولوا يحافظوا ع ابتسامتهم بالسيف وهما يقولوا:الحمد لله كويس...اموره تمام..
جهاد؛بنزوره غدوة ان شاء الله..
شبحوله خوته...
هيثم؛قالوا نقلوهم لأبوسليم..
جهاد:ايه..قالوا اوضاع السجن هداكا مليحه..
هيثم:ايه صح غيروه كله...ليهم عامين يخدموا عليه...حتى الضباط اللي فيه دربوهم برا خصيصا لادارة السجن هدا..حيكون فيه اخصاء نفسيين..ودعاة...المحكوم يطلع من غادي انسان تاني..
رفيق بضحكه:لكن معليشي دكتور في ناس قاطعه ايديها من ربي بكل..رووس كبار عاشوا عمر مجرمين ومستفحلين في الاجرام زي مايقولوا مايغيرهم شي..
ابتسم هيثم وقال:اللي تتكلم عليهم انت بين حكم الاعدام والمؤبد اللي يقعد منهم القبضه الأمنيه
تردعه..قتلك الضباط اللي حيشدوا السجن كفاءات ومدربين برا سنين..
رفيق هز راسه وقال:كويس كان هكي..
وخليل يسمع في حديثهم ويفكر فيه بعد سكتوا قال:ايه دكتور...بنخبرك بشي ان شاء الله يفرحك..
هيثم ضيق عيونه وهومبتسم قال؛قول فرحني..
خليل مرر نظره عليهم بعدين قال بإبتسامه؛بنعاود امتحانات الشهاده الثانويه السنه هادي..
خوته قعدوا يشبحوله بصدمه..
هيثم ابتسم بفرح وقال:والله جديات!
خليل هز راسه وهو يضحك..
هيثم ضحك وقال:بالتوفيق ان شاء الله..
خليل بإبتسامه:ان شاء الله..
وخوته مازال يشبحوله وهما مش مصدقين..
شويه رن الجرس في المربوعه..
هيثم ناض وهو يقول:نستأذن شويه..
ومشي طلع من المربوعه..
رفيق وجهاد قعدوا معاه بعيونهم لين طلع...
شبحوا لخوهم هو شبحلهم كيف يشبحوله...
وفجاه..هبطت عليه ايديهم عليه بضربات وكل واحد فيهم يقول..
من ورانا....اخر من يعلم....
وهو يتقي على روحه ويقول بصوت منخفض:عيب انت وياه...عيب..تي يا....تي ااه....
شد ايديهم هما الزوز بقوة وقعد يمرر في نظره عليهم وقال:هي خلاص عاد..خلاص..
هما شبحوله شويه بعدين ضحكوا ..
جهاد:قول لتهاني تقريك..
رفيق بضحكه:نسجلك معاها في الباص..
جبدهم الزوز ولف ذرعانه ع روسهم وقال:خففوا دمكم زيدوا..
وهما الزوز يضحكوا بكتمان ويضربوا فيه على ايديه بش يطلقهم..
ع خشة هيثم بالسفرة..
لما شافهم هكي وقف وهو رافع حواجبه..
خليل طلقهم طول..
وهما الزوز قعدوا يساووا في ارواحهم وهما منحرجين..
هيثم ابتسم وقال؛آنستوا شباب...
وقدملهم وحط قدامهم السفره..
وهما الثلاثه يردوا عليه بصوت واحد وهما منحرجين..
"الله يأنسك دكتور"
••••••°°°°°•••••••°°°°°°•••••
مقعمز قدام التليفزيون..
لكن ماكانش يتفرج.....كان سرحان...يفكر...
ع جية ولده شافه بهالحاله..
قعمز جنبه وقال:بوي..
استاقظ من سرحانه وشبحله ..
الولد ضحك وقال:وين كنت مسافر؟
ضحك نص ضحكه وقال:كالعاده نفكر في الخدمه..
رد عليه ولده وهو يقول:باهي اليوم الخميس وغدوة جمعه خود بريك والهى بينا اني وحناي..طلعنا زرده مثلا..ولا ارفعنا للحوازة نغيروا جو نبي نطلع من مود القرايه شويه..
ع خشة امه وهي تقول:والله حتى اني خاطري نغير جو وبلاش منها الحوازة نبي نمشي للبلاد..
الولد قال:ياريت..
ضحكت الجده وقالت:هاه حسونه شن قلت نوتوا ارواحنا ونتحركوا العشيه.؟
احسان شبح لولده وقال:المثنى باشا حكم علينا خلاص..
المثني ضحك وقال:حكمت عليكم! ياإلهي خدمته لازم تخش في كل شي..
ضحكوا بوه وحناه..
المتنى ناض وهو يقول:خل نمشي نوتي روحي قبل ليدير طعن في الحكم...
جداه  لحقاته وهي تقول:عندك حق وليدي..
واحسان يشبحلهم وهو يضحك ويحرك في راسه يمين ويسار...
•••••°°°°°°••••••°°°°°••••••
"مش عارفه منو...مش عارفه ياشذى...شكله واحد من عيلته..اني معاش بنمشي للمستشفى خلاص"
هادي رنيم تحكي لصاحبتها اللي صار معاها هاتفيا وهي منهاره..
ردت عليه صاحبتها وهي تقول..
"لاياغبيه ردي بالك ديريها معاش دسي روحك"
رنيم:وكان جاني مرة تانيه وفضح بيا وسمع بيه الدكتور رياض وهو طول يوصلها لسفيان شن يصير بعدين!؟
"لو سفيان ع سبله احسن فوتيه انتي بروحك تراجي فيها من ربي"
رنيم رشفت وقالت:ايه لكن انتي تعرفي حقارته تعرفيه شن بيجي يقول لبابا والله اعلم شن بيألف عليها من قصص..واطي هدا واطي اوطى من الحقير جلال..ااه ياربي غير شن خلاتي نوافق عليه بس كيف كنت نشوف قبل مش عارفه..
"من زمان حذرتك منه وقتلك واحد مش مزبوط ياما داير وخايف اللي داره يولي عليه تو يقتلك بشكه وتحكمه فيك لكن انتي ماتسمعيش.."
رنيم ببكي:مش ناقصه ياشذى راهو..من غير شي ضميري يقتل فيا ع خاطر الوليد..اقسم بالله بديت نحلم بيه حتى الحلم ياشذى...
"لاحول ولاقوة الابالله..شن بنقولك..ربي يكون في عونك وخلاص"...
رنيم ببكي:حسبي الله ونعم الوكيل...
••••••°°°°°•••••••°°°°°°••••••
بعد العصر...
مقعمزين في الصاله يهدرزوا ويشربوا في نسكافيه ويعدوا بالحلو...
عفاف:شن حالها اختك الكبيره..
ابتسمت دانيه وقالت:الحمدلله..
عفاف:انتي عندك زوز وخيين غيرها ولا؟
دانيه:ايه واحد منهم اكبر واحد فينا والتاني اصغر واحد..
ماجده:امم...عليك وليد وخيها الكبير عليك اخلاق عليك احترام..عليك التزام..هدا اللي يقولوا عليه زين ورضى والدين ربي يحفظه ويحميه...
سارة تسمع في كلام ماجده وقلبها يدق بقوة وهي تحاول تشد ابتسامتها..
وسجى اللي كانت مركزة عليها بالنظر انتبهت لحالتها كيف ولت بعد انجابت سيرة مجاهد..
عفاف:ماشاء الله تبارك الله..
ماجده مدت يدها وقالت:الحديده هادي فضه جابهالي في عيد الام ربي يحفظه قداش فرحني يومها..
عفاف وهي تشوف للحديده:ماشاءالله ماشاء الله..ربي يحفظه..
دانيه:تستاهلي كل خير خالتي..
ماجده:وخيتي سلمها ياربي..
ضحكت دانيه...
ومازال سجى مركزة بالنظر ع سارة وشبهت فهمت اللي فيها..
واللي فهماته فرحها هلبه..
■فهالوقت ..
كانت نسيبه تمد لخوها في سفرة القهوة والحلو اللي جهزتهالهم بروحها بعد روحوا من الصلاه...
....وهما يشربوا في القهوة...
درست قدام الحوش سيارة مجاهد..
نزل منها وجي للجرس وضغط ع الزر متاعه...
............
هيثم:ان شاء الله خير...ناض وهو يقول..عن اذنكم..
ومشي طلع من حداهم..
خليل:نشربوا القهوة ونتوكلوا..
رفيق:بالك بنباتوا..!
ضحك جهاد..
وخليل ارتسمت ع وجهه ملامح الامتعاض ورجع يشرب في القهوة...
لحظات..
وخش هيثم وهو يقول:اهلا وسهلا تفضل ولدي..
شبحوا للباب..
لقوا هيثم خاش ومعاه واحد..
يعرفه رفيق كويس....مجرد ماشافه حس بدمه يغلي في عروقه...
مجاهد:السلام عليكم..
وقدم صافحهم....
وهما سلموا عليه عادي....بس عيون رفيق نظراته ليه كانت تخوف..
قعمز هيثم مجاهد في جنبه وقال:كيف خليت الشرق..
مجاهد ابتسم وقال:في احسن حال..لكن شكلي بنفارقهم..
هيثم:علاش ان شاء الله خير!
مجاهد:قدم طلب نقل للزاويه.
هيثم:اها حتى هكي كويس..شبح لولاد خالد وقاللهم...نعرفهم مجاهد قريب للعيله بوه يكون زوج خالتي...مهندس نفط..
خليل:بالجوده..
مجاهد:بيك اجود..
ورفيق يشبحله بنظرات حاده...
🍁🍁
قعدوا ولاد خالد دقايق..
بعدين ناضوا بيطلعوا...
ورفيق ناض باالسيف...سقدهم هيثم ورجع بعدين لضيفه...
وكذلك النساوين سقدوا عفاف وكنتها..
وقعدت تهاني مع سارة ودانيه...
....في دار سارة.....
سارة:قال بابا بيديروا معرض غادي بينظمه زيزو وكلنا بنمشوله..
دانيه بإعجاب:حلو هلبه ماتوقعتش الوضع في مصحة الادمان يكون هكي..
سارة؛ولا اني...بابا قال نفسية زياد متحسنه هلبه وحتى صحته..
دانيه:باهي الحمد لله ربي يكمل عليه بالخير ويفك اسره ويطلع برائته..
سارة:يارب...وكلناله محامي جديد بابا قال متفائل بيه هلبه...
تهاني:كويس..
دانيه:ربي يفرحكم بفك اسره ياربي عن قريب..
سارة:يارب...
تنهدت تهاني وقالت:سارة..
شبحولها..
تهاني بضيق:في واحد حقير مدرهلي ديما يبعتلي ويلحق فيا في المرواح نبي نخبر فيه خوتي لكن خايفه من المشاكل..
سارة:ماتخافيش حبيبتي خبريهم طول اصلا اكبر غلط انك تسكتي مادام يضايق فيك هكي..
دانيه تشبح لسارة وهي تتكلم وعقلها رفعها صوب المجهول اللي يلحق فيها حتى هي...
...........
"ماعندي مانقول غير عندك حق في كل شي قلته..لكن خسارتكم انتم هي الخسارة"
هيثم:مافيش خسارة ولدي انت بالذات مكسب نبي نحافظ عليه..
مجاهد ابتسم وقال:تسلم وبارك الله فيك..معليشي دكتور تقوللهم ينادولي اختي..
..........
دانيه؛وعلاش ماتكتبيش رواية في العطله؟
سارة:لالا مانبيش نكتب توا روايه بكل بنكتفي بالقصص القصيرة..حنفتح صفحة ع الفيس وننشر فيها قصص قصيره باللغه العربيه الفصحى والعامه بش نوصل لكل الناس مانبيش نكون حكر ع فئة معينه..
تهاني:حلوة الحركه هادي..اني خفت الحق تقعدي تكتبي فصحى بس مش هلبه اللي يفهموا مفرداتك بصراحه صعبه شويه..
سارة ضحكت وقالت؛مازال القدام حتولي اصعب...
ع طقة الباب...
بعده انفتح وخشت نسيبه وهي تقول:دنونه خوك جي..
تهاني شبحت لسارة..
اللي وجهها غطاته حمرة الخجل وباين عليها تسارع دقات قلبها من حركة انفاسها...
ناضت دانيه وهي تقول:شويه نلبس شاربتي..
مشت لبست شاربتها ع المرايه..
بعدين خدت شنطتها وسلمت ع البنات ونسيبه..
وبعدها طلعت حضنت ماجده حضن مايخلاش من دموع الحزن...
وطلعت...
وسارة قلبها رفعها لروشن الصاله اللي وقفت ورا ستاره وقعدت تتفرج...
شافاته...وهو يسلم ع بوها لما شاف اخته طالعه..
بعدين حاوطها من كتافها وطلع هو وياها...
حطت يدها ع قلبها وتنهدت..
جاها صوت تهاني وهي تقول..
"بالشويه على قلبك"..
شبحتلها وفنصت فيها...وتهاني تضحك....
....لحظات....
وخش هيثم....
هيثم:والله الغدي ماشاء الله خالتي ربي يعطيك الصحه..
ماجده:سلمك ولدي لكن هاه..راهو سارونه هي اللي دارت العصبان...قرضت خضرته وخلطاته وحشاته معاي..
هيثم شبح لسارة وقال:ماشاء الله...الله يبارك..
ابتسمت سارة وهي متحشمه..
ماجده:وبعض الناس اكبر منها بمية سنه ضوئيه فنجان القهوة مايعرفوش يديروه..
حرك هيثم عيونه لنسيبه..
هي ابتسمت ابتسامه عريضه وقال:شن جو يادكترة..
ضحكوا سارة وتهاني..
ماجده خبطت كفوفها في بعض وقالت؛مافيش..انعدام امل...انعدام مشاعر واحاسيس..
وهيثم يضحك وهو يحرك في راسه يمين ويسار..
ع جية البنات الزوز يجروا بعد مابدلوا حوايجهم وصلوا..
ريحان:كان نحكيلك عمتو شن صار في المدرسه..
ناضت نسيبه خدتهم من ايديهم ومشت بيهم للكوجينه وهيز تقول:احكولي وانتم تتغدوا بالتفضيل..
وعيون تهاني معاها وهي مبتسمه...
شبحلها هيثم وقال:شن حالك تهاني بنتي وشن حال القرايه؟
تهاني ابتسمت وقالت:الحمد لله عمي...
هيثم هز راسه ومرر نظره عليهم وقال:حطوني مدير عالم للمصحه...
سارة ناضت وهي تصفق بفرح وجت لبوها وضماته بفرحة تلقائيه وهي تقول:تستاهل حبيبي تستاهل ياعمري..
ماجده بضحكه:ايه والله تستاهل ولدي ديما ربي معليك وين ماتحط انت..
نسيبه وهي متكيه ع رخامة البار قالت بإبتسامه؛قلبي كان حاسني مش عارفه علاش من لما قتلي حولوا المدير الاول ع ع التحقيق..
قعمزت سارة جنب بوها وهو ضمها لحضنه وقال:اني ماكنتش متوقع هالمرة حتى في الخيال...تعرفي حاس ان في حد زكاني في الوزاره..
ترا بالله اتصلي بلجين وافتحي المايك..
نسيبه قامت تليفونها وقالت:ok.
تهاني وهي مبتسمه وعيونها معبيات دموع:مبارك عمو وربي يقدرك يارب..
هيثم:ايه والله يابنتي هادي الدعوة اللي نبيها ربي يقدرني..
نسيبه:السلام عليكم لوجي..
"وعليكم السلام هلا نوسه"
نسيبه:شن جو؟
"الحمد لله تمام التمام...شن جوك انتي وشن اخباركم.."
نسيبه:اخبارنا عندك...
ضحكت لجين وقالت..
"الرجل المناسب في المكان مناسب"
هيثم علا صوته وقال:معناها انتي يالجين..
قعدت لجين تضحك..
وماجده تشبح لهيثم بربع عين وهي مبتسمه..
نسيبه بضحكه:لجين ليك علاقه بالموضوع
هدت لجين ضحك وقالت..
"مش بالزبط اني زكيته للوزيرة وبس وهي طول طلعت القرار"..
نسيبه:شكلها تسمع في كلامك هلبه..
"احسن حاجه فيها انها ماتاخدش قرار قبل تستشير "
هيثم:كويس بكل وباين عليها تخدم..
"ايه هي كويسه فعلا..بس مازال ماوصلتش لمستواك دكتور"
نسيبه:ولا حتوصل..
هيثم رفع حواجبه وهو يشوف لنسيبه..ويسمع في لجين تضحك..
هيثم :اما اختي هادي..
وسارة وتهاني يشبحوا لبعض ويضحكوا..
ماجده وهي مبتسمه قالت بصوت مسموع لهيثم؛ماشاء الله عليها لجين..
هو شاف لشبحات خالته ارتبك وقال:ايه ربي يخليها لماليها..
ماجده بإبتسامه "ولصاحب النصيب":يارب...
•••••°°°°°•••••°°°°°•••••
"تدوي جديات ياولد!"
خليل بضحكه:وجد الجديات..
ضماته امه وقالت بفرح:يارب تنجح ونشوفك دكتور يارب..
خليل:زعمه يصير يام؟
عفاف:اللي عند ربك مش بعيد وليدي..
خليل ابتسم وقال:صدقتي اللي عند ربي مش بعيد..
بعد عنها وباس راسها بعدين قال:يام..
عفاف:نعم ولدي..
خليل:نبيك تمشي للحوش اللي فيه الحاجه صالحه قالي عرفه ملاك تبيك.
عفاف:شن تبي فيك؟
خليل:مش عارف قال موضوع ضروري..
عفاف سكتت شويه بعدين قالت:راجيني نلبس عبايتي..
ومشت من حداه...
وهو قعد واقف يستناه ويفكر لو يقول لنسيبه توا ولابعد يروح منها...وقرر يقوللها بعد افضل...
...........
بس في اللي مايستناش ياخليل...
نسيبه:كملي لحمتك ريحونه..
ريحان:باهي...ايه حقه عمتو..
نسيبه:شنو؟
ريحان:اليوم وحني ماشيين المدرسه ولا..عرفه مشي معانا..
نسيبه ابتسمت وقالت؛عارفه..
ريحان:ايه..وقال لعمو خليل قالتلك ملاك هديكا الشريره تعالى للحوش نبيك ضروري..
اختفت ابتسامة نسيبه...
ريحان:وهو قال باهي واسألي جنان..
جنان؛ايه عمتو صح..
رفعت نسيبه حاجبها وناضت وهي تقول:بعد تكلموا اغسلوا ايديكم..
ومشت طلعت من الكوجينه..
وهما معاها بعيونهم..بعدين شبحوا لبعض...
وبعدها رجعوا يكلموا في مكالتهم بصمت...

....يتبع.....