البطل المغمور "شمس الغروب"

الجزء الثالث عشر

لما نتحمس ونجهز الحلقه في عقلي نكتبها ونزلها..المواعيد درتها بش لو في حالة تعبت نلتزم بيهم...
ماتقولوش تمشي فينا ع مزاجها ارجوكم والله ماهكي نهائيا..
بالنسبه لأمس خديت راحه لأني كتب يومين ورا بعض وتعبت..ونبهتكم اني الإثنين مش حنزل..
💕💕💕💕💕💕💕💕💕💕💕💕💕💕💕💕💕💐...
في وسط الحوش..
مقعمزة ع كرسي..حاطه مرافقها ع ركابها وراسها بين ايديها وتومي...كانوا دموعها يقطروا ع ارض دمعه ورا دمعه..وملامح الصدمه مرسومه ع وجهها..
لعند ماسمعت صوت باب انفتح..
مسحت بإيديها ع شعرها للخلف..وناضت وهي في قمة الغضب..
ومشت بسرعه طلعت من وسط الحوش لقاته يلبس في سبيدروه بسرعه..
هي جاته تجري..وصلت فيه وعزقاته ع ظهره وهي تقول بعصبيه ودموعها ينزلوا:وين ماشي ياكلب وين وين هارب يافاجر يافاسد..
وهو مش قادر يدير شي بروحه كان في حالة صدمه ودموعه ينزلوا منه بروحهم..
جبداته ولفاته ليها وقعدت تضرب فيه كفوف ع وجهه وتقول:ياريت متت ولاجبتكم..ياريتني ماريتكم..ياريتني ماريتكم..
وهو يتلقى في ضرب بدون حتى مايتقي ع روحه مصدوم ومش قادر يستوعب اللي صار واللي قاعد يصير بكل..
عفاف ببكي:هديتوني..قتلتوني قتلتوني..وقعد تخبط فيه ع صدره بقوة وتقول..يافجرة..يافساق..يامغضوبين..
هو جبد روحه ولف وطلع يجري من الحوش.
لحقاته تجري بسرعة..لين شداته وقالت:تعال ياكلب تعال..وين هارب..
رفيق بصوت منخفض ودموعه ينزلوا:يام خليني بالله خليني مش قادر نشبح في وجهك..
عطاته كف ع خده اليمين بعدين كف تاني ع يسار وقالت:كانك تتحشم ولافي عرق حشم ادير اللي درته يافاسد في عرضك ياكلب..وضرباته كف تاني وقال..اسمع هني غلطتك حتصلحها ورجليك فوق راسك ولا...وقعد تتحلف بإيديها وهي ترفع فيهم وتنزل..والله العظيم..والله العظيم والله العظيم يارفيق نغضب عليك دنيا وآخره نقعد ندعي عليك لأخر يوم في عمري..
رفيق نزل راسه وقعد يبكي بصمت..
هي خبطاته ع كتفه بعدين ضرباته كف تاني وقالت:ابكي ابكي ياخايب ياكلب..ابكي..ياقعادكم تبكوا انت وخوتك عمركم كله..لكن شن بنقول..كله منه هو الله لايسامحه..بعدين شبحتله وشدت شعره وهي تقول..تنتلف توا وتختفي نهارين وتولي بعد نهارين تولي ياكلب..وبتخطب بنت خالتك سامعني..
رفيق بصوت مخنوق:يام..ماتقتلنيش واني حي..
شحاته من شعره وقالت:انتم اللي قتلتوني انتم بعمايلكم السودا المغبرة ع روسكم..رشفت وكملت تقول..اسمع ياتاخدها ياتنساني وغضبي يحل عليك كيف حل ماعليك غضب ربي يافاجر..
رفيق يبكي وخلاص..
ضرباته كف وقالت:تسمع فيا..
رفيق ببكي:حاضر..حاضر..حاضر..
ضرباته ع ذراعه وقالت:برا انتلف تلفه..
مشي طول طلع من الحوش وصكر الباب..
هي مسحت وجهها..بعدين التفتت ومشت خشت للحوش تجري..
لفت بنت اختها قدامها واقفه ترعش..
عطتها زوز كفوف وقالت:قليلة ربايه مسخه..فاجره...كان نندري عليك حرمت عليك خشت حوشي يافاجره..
وسجى تبكي وترعش..
عفاف:امشي يافاجره اغسلي خليقتك..بنمشوا توا لحوشكم وتقولي لأمك طلعت معاي للحوش فاهمه يامسخه..
سجى هزت راسها بآيجاب وهي تبكي وترعش...
ومشت تجري للحمام..
اما عفاف حطت ايديها ع خدودها وهي تقلب في عيونها مش قادره تستوعب اللي صار لتوا..بعدين رشفت ومشت طول لدارها...
••••••°°°°°°°•••••••°°°°°°•••••••
في أحد فنادق مدينة بنغازي..
في احدى غرف الفندق..
حطت صفرة القهوة لخوها وقالت..
لجين:ماتوقعتاش يكون راجل امين لهالدرجه وضميره حي..
خوها:ماهو من الفاسدين اللي خدمت عندهم المده اللي فاتت خلوك تستغربي الدكتور هيثم..
لجين:والله حق..تعرف حتى رئيس الحكومه الحالي راجل مستقيم ويبي يخدم البلاد هدا علاش دار التعديلات في حكومته بعد سنتين من توليها الحكم في البلاد..
خوها:الشعب كله يقول في نفس الكلام..لكن لجين بنبهك تردي بالك الفساد اللي تحاربوا فيه عنده انصار مش حيخلوكم في حالكم بالذات الناس اللي طيرها الوزير الجديد.
لجين ابتسمت وقالت:عارفه..اني والناس اللي معاي فايقين بيهم..
خوها:ردي بالك ع روحك..
لجين بإبتسامه:الله خير حافظا ياوخيي..
خوها ابتسم وقال:نعم المولى ونعم النصير..
•••••°°°°°•••••°°°°°°•••••
"يارب عيني ع مابليتني يارب واسترني يارب دنيا وآخره يارب..تعبت هلبه يارب تعبت والشكوى لغيرك مذله يارب ياالله..هون عليا وديرلي طريق يارب"
نزلت ايديها وغمضت عيونها بشده والدموع ينزلوا منهم..
بعدين مسحتهم وناضت..
حولت ملايه الصلاه ومشت لدار النوم بتاخد البطاطين..
فنصت عيونها لما شافت سجى واقفه قدام المرايه تمكيج قالت:شن ديري انتي!!؟
سجى التفتت وقالت:مانبي حد يلاحظ شي غريب عليا..
شبحتلها عفاف من فوق لتحت وقالت:حولي اللبز من يدك وتعالي قيمي معاي البطاطين..
سجى:حاضر..وجت تجري خدت جزء البطاطين وطلعت بيهم ورا خالتها وهي فرحانه بطير..
🥀ع بالها وصلت اللي تبيه بعد اللي صار..عقلها الملوث ونفس الخبيثه ماخلوها تشوف لقدام هلبه كيف حتكون شكل حياتها مع اللي تبيه بعد مابدتها بأكبر الكبائر..
الكبائر هادي اللي بدوا هلبه بنات في وقتنا الحالي يتهاونوا فيها ويشوفوا فيها حاجات عاديه..تصير عادي..ع اساس ان الحب هكي..وان حبيبها في النهايه حيولي راجلها حسب مارسلها خيالها المشوه..بدت هلبه محضورات مباحات..وللأسف كله في غياب الوازع الديني..في غياب الوالدين..الاب والأم اللي مسيبين الحبل ع الغارب لبناتهم المراهقات..ومخليين النت..وصحابات السو يربوهم...وفي الأخير ينتهي بيهم المطاف لفضايح يقعدوا يجروا ويلهدوا ع سترها....🥀
🍁🍁🍁🍁
وفاتت هديكا الليله ع عفاف وهي تحاول تبان عاديه قدام بنتها وخواتها وداخلها عالم بيه الله..
اما اختها سماح ماعرفت شي من سجى غير انها وهي ماشيه لحوش خالتها اتصل بيها بوها تجي للحوش بش اديرلهم عشي واضطرت تروح لحوشهم..
وطبعا كذبه زي هادي مافاتتش ع سماح اللي طاحت فيها هزايب وشتم لأن ع بالها سجى خابت في المهمه اللي وكلتها اديرها...
اما رفيق..
فمشي للحوازة متاعهم اللي قاعد فيها خوه خليل..
اول ماجي طول انطرح ورقد هربا من الواقع المرير والغلطه الفادحه اللي ارتكبها في حق نفسه..
وخليل مالاحظ عليه شي..لأنه اساسا مش قادر يركز في شي وهو يفكر في راجح وسبب جيته لحوش هيثم...
🌺هيثم اللي كان طول الليل يفكر في العمليه اللي بيديرها للحاله اللي جاته امها تشكي..وقعد يفكر كذلك الفساد المتجذر في القطاع اللي هو مسؤول عنه...القطاع اللي يبي الإصلاح من اسفل الهرم مش بس من اعلاه...
اما اسيمه فرقدت بعد ماكلمت ماجده واطمنت منها ع الصغار ..
•••••°°°°°•••••°°°°°°•••••••
تاني يوم...
هيثم واسيمه بعد ماصلوا الفجر وشربوا قهوة الصبح اللي طلبوها من الفندق..
مشوا الزوز للبحر بش يتمشوا قدامه..
ع البحر..
كانت اسيمه واقفه تتفرج ع منظر الشروق وهي تسبح..
وهيثم حتى هو بس كان مع التسبيح يفكر..
▪▪▪▪▪
◇عاده التسبيح بعد صلاة الفجر هادي لزمتها بعد زواجي لما شفت اسيمه ادير فيها..كنت نعرف انها امر رباني انذكر في القرآن كذا مرة..بس ولامرة التزمت بيه الا بعد ماتزوجت..ولاحظت ع اسيمه كيف ديما تبان هاديه ورايقه ونفسيتها حلوة بالذات بعد تسبح
قلت لنفسي خل نجرب ونشوف..خصوصا اني نخدم في خدمه فيها ضغط نفسي كبير..وفعلا بديت في الأول ماحسيتش براحه تامه..لعند مامرة اسيمه قالتلي جرب تسبح في مكان فاضي بروحك ويكون هادي والأفضل في الطبيعه..
ودرت زي ماقالت..ويوم عن يوم..ادمنت التسبيح فهالأوقات ادمان...حتى في الدوشه كنت نسبح عادي..وصدري ينشرح تلقائيا...خطرت عليا فالقرآن ايات التسبيح لما كانت تنزل ع الرسول..كان الهدف منها هي زيادة قوة صبره وتحمله للمسؤوليه الكبيرة اللي كان يواجه فيها ناس تشبه لحد ما الناس اللي يواجههم اي حد ينحط في مسؤوليه اصلاح ماأفسدوه...قلت لنفسي وقتها انت بأمس الحاجه للتمسك بالتسبيح توا ياهيثم..ويااه ع الإنسانه الرائعه اللي نعم عليا بيها ربي تقول كانت مقعمزة في عقلي وعرفت في شن نفكر..
▪▪▪▪▪
شبحتله لقاته يشبح للشمس ويسبح قالت
اسيمه:رد بالك تغفل عن التسبيح هيثم..كل ماتكبر المسؤوليه لازم تزيد اضاعفه اكثر واكثر
هيثم شبحلها وقال بإبتسامه:توا كنت نفكر في الحاجه هادي اذكرت المواضع اللي انذكر فيها التسبيح في القرآن...وجي في عقلي كلام سيدنا موسى لربي لما قال انه يبي خوه هارون معاه بش يذكروه ويسبحوه هلبه..يعني الشي هدا حيعينهم ع مسؤوليتهم الكبيرة اللي حملهالهم الله سبحانه وتعالى
أسيمه بإبتسامه:تعرف اني كنت نلزم فيه اكثر بعد ماجبت الصغار..لان مسؤوليتي كبرت اكثر وكنت نبي ربي يقوي صبري وتحملي بش نعرف نربيهم صح ..عندي مسؤولية التربيه اصعب مسؤوليه ممكن يتولاها البني آدم.
هيثم شبحلها شويه بعدين قال:فعلا..صعبه هلبه..وشبح القدام...
هي شبحتله وقالت:اللي يهونها بعد عون ربي هو الحب..
هيثم شبحلها
اسيمه بإبتسامه:لما تحب صغارك بمعنى الكلمه ادير كل شي ع خاطرهم والتعب معاهم كله يهون..حب الصغار طبعا مش بالدلال الزايد اللي يفسدهم ويضيعهم..هدا مش حب ابدا...
حب الصغار بالذات يكون في تربيتهم تربيه صح..تخليهم يقدروا يواجهوا الحياه ويتغلبوا ع كل مصاعبها ويقعدوا ثابتين ع اخلاقهم ومبادئهم مهما صار....
هيثم بإبتسامه:وانتي اهل لهالمهمه..
ضحكت ضحكه خفيفه وقالت:تقدر تشد وزارة الدفاع والصحه مع بعض!..
هو ضيق عيونه وقال بضحكه:ههههه..شن تقولي مستحيل طبعا...اللي نفهم فيه ان شاء الله نقدر نقده...
اسيمه قعدت تشبحله وهي ساكته..
هو كذلك قعد يشبحلها لحظات بعدين غير عيونه عنها وقال:حاولت بس ماقدرتش..للأسف مافي حوار مشترك بيني وبينهم..هما مش قادرين يفهموني..وحتى اني ماقدرتش نفهمهم..
اسيمه:لأنك ماحاولتش ياهيثم..
هيثم قعد ساكت شويه بعدين قال:عندك علم اني كنت حاضر يوم مسابقة زياد..
اسيمه انصدمت..
هيثم:مشيت وشفت بعيني اني مهما نحاول مش حننجح معاهم..حتى قصة سارة قريتها..وطول فهمتها من اول ماقريتها..شبحلها وقال..متخيله شعوري شن كان في الحالتين...لما اكتشفت اني في نظر صغاري...مجرد غوله..ايه غوله..دخل لقلوبهم شعور الخوف وبس..الخوف فقط لاغير..
اسيمهتنهدت بضيق وقالت:عندك حق وفاهمه عليك..بعدين شبحتله وقالت...انت في حاجه وحده وافقه بينك وبينهم لو تحولها حيتغير كل شي..
هيثم:اللي هي!؟
اسيمه:التجاهل..تجاهلك ليهم لكل شي يحبوه ويهتموا بيه تجاهلك لشخصياتهم ياهيثم..وجهلك بيها...
هيثم شبح القدام وقعد ساكت..
اسيمه بإبتسامه:زي ماأنك دكتور عظيم قلبه كبير..مستعد يعطي بدون ماياخد مقابل لكل من احتاجه...زي مافي داخلك شعور ابوه عظيم ياهيثم لو عرفت كيف حطلعه صح حتخلي صغارك يعشقوك ياهيثم..
شبحلها..
وهي قعدت تشبحله بإبتسامه..بنظرة هيثم اول مرة يشوفها في عيونها..
تنهد بعدين جاها باسها ع راسها...معاك انتي مايقدروا يعشقوا حد تاني..
اسيمه ضحكت وقعدت ساكته...وهو يشوفلها ويفكر في كلامها.....
•••••°°°°°°••••••°°°°°°••••••
الساعه العاشرة صباحا..
"وووك عليا..ياناري عليها مسكينه!"
نسيبه كانت نازله من دارها لما سمعت الكلام اللي قالته خالتها خافت ومشت تجري للكوجينه خشتلها لقتها تتكلم بالتليفون..
نسيبه بقلق:مني؟!..
اشرتلها ماجده بيدها بمعنى شويه وقالت:باهي اني بعد الغدي ان شاء الله مروحه...لاباس عليها......بالسلامه...بالسلامه..
صكرت ماجده وهي تشبح للتليفون بضيق..
نسيبه:شن في؟!
ع خشة سارة..
ماجده شبحتلها وقالت بضيق:دانيه بنت مجيد جاها السكر ياناري..
سارة ونسيبه تأثروا بالخبر وقالوا:لاحول ولاقوة الابالله..ياااه ياربي!
سارة:كيف جاها!؟
ماجده:والله ماني عارفه يابنتي..شبحت لنسيبه وقالت..هيثم واسيمه بيروحوا العشيه واني بعد الغدي مروحه..
نسيبه:بعد العصر تو نلحقوك اني وسارة..شبحت لسارة وقالت..تمشي ولا؟
سارة هزت راسها بإيجاب..
ماجده: وريحان وجنان؟!
نسيبه:عادي نرفعوهم معانا؟!
ماجده:عادي..اصلا هما عويقلات مافيها شي كان مشوا..تنهدت وقالت..وجعتني البنيه هلبه..
نسيبه:ربي يشفيها مسكينه..
ماجده:آمين..بعدين شبحت لنوسه وضحكت فجأة..
نسيبه وسارة استغربوا..
نسيبه:خيرك اللطف!!؟
ماجده بضحكه:هم يضحك وهم يبكي..الشاب اللي جي امس لهيثم جاي يخطب فيك ياحنه..
نسيبه بلمت في خالتها..
سارة شهقت بفرحه..
نسيبه:جاي يخطب مني!؟
ماجده بضحكه:جاي يخطبك يااندر ديكر غير كان نعرف شن شايفين فيك بس..
شدت سارة ضحكتها..
نسيبه حطت شعرها ورا وذنها وهي رافعه حاجبها وقالت:مش راده عليك..لكن بنرد عليه دراه الكبد الوقح اللي يلعب ببنات الناس وكل يوم تزن في راسه يخطب وحده من بنات الشارع انه لما يشوف حلمة وذنه تو نوافق عليه..
ماجده:شن قصدك كل يوم يخطب وحده من بنات الشارع!؟
نسيبه:قصدي شارعنا..من فترة تلاقيت اني وياه قدام المحل اللي هني نشدني ع تهاني بنت خالد قال يبي يخطبها..
تفاجئت سارة..
ماجده:الله ! كيف ضابط شرطه يخطب بنت خالد وكلنا عارفين شنو خالد..
نسيبه فنصت عيونها وهي تقول:ضابط شرطه!!؟
ماجده:ايه ضابط..وقالت اسيمه كان يراقب في المنطقه متاعنا..
نسيبه سكتت وهي تفكر في الكلام اللي سمعاته من خالتها وقعدت تربط في الأحداث ببعض..
سارة:حسني خفت..
نسيبه شبحتلها وقالت:حتى اني..
ماجده:ماتخوفنيش معاكم هو راجل جاي يخطب وخلاص بتوافقي وافقي ماتبيش رديه وتمت..
نسيبه:اكيد بنرده..
ولفت ومشت طلعت من الكوجينه..
تنهدت ماجده وقالت:تعالي سارونه حبيبتي وتي معاي الفطور..
سارة وهي تفكر في اللي سمعاته قالت:حاضر...
🌺اما نسيبه.
ولت ركبت لدارها..ووقفت ورا باب البالكونه وهي تشبح لحوش خالد..وتفكر في راجح وطلبه...وقلبها موجوع وخايف..
•••••°°°°°°•••••°°°°°°••••••
في جنان الحوش..
في واحد من التراكين..
سماح:اسمعي يابنت انتي كان ماقلتيش الحق..
قاطعتها وهي تقول:شن بديرلي قولي..قولي..شن بديري!؟
سماح قعدت تشبحلها بغل وهي ساكته..
سجى :اسمعي انتي اني من هاللحظه معاش دخلي بيك خليك في حالك وخليني فحالي..
وجت بتمشي شدتها سماح من مرفقها وقالت:فرخة سجى تندمي بعدين..
سجى ابتسمت بتهكم وجبدت يدها ومشت وخلتها وخشت داخل..
وسماح تشبحلها بحقد..
بعدين غيرت عيونها وشبحت القدام وقفت في مكانها لما لفت عفاف واقفه تشبحلها..
رسمت ع وجهه ابتسامه تحاول تخفي بيها ارتباكها بعدين مشتلها وقالت:شنو عفوفه مروحه..
عفاف شبحتلها شويه بعدين قالت:ايه مروحه..
سماح:خلاص تو نجيك العشيه نهدرز عليك..
عفاف:لالا اليوم ماتجيش مش قاعده بنطلع..
سماح رفعت حاجبها بعدين نزلاته وقالت:باهي يوم تاني ان شاء الله..
عفاف ابتسمت وقالت:نتلاقوا في العرس..
سماح رفعت حواجبها وهي تشبحلها..
ع جية تهاني:هيا يما..
عفاف لفت ومشت لبنتها...ومشوا طلعوا مع بعض..
وسماح واقفه تشوفلهم بتضييقة عيون...
•••••°°°°°•••••••°°°°°°••••••
بعد العصر..
في العمارة اللي يسكن فيها مجيد..
ماجده ونسيبه وبنات هيثم كانوا راكبات من الدروج..
وصلوا في شقة سدينه..
كيف جت بطق ماجده..انفتح الباب وطلع مجاهد..
سارة لما شبحاته طول نزلت عيونها لوطا وقلبها قعد يدق بقوة..
اما هو نزل عيونه وقال:خالتي ماجده...شن حالك اليوم..
ماجده:الحمد لله ولدي..شن حالك انت..
مجاهد:الحمدلله..هي تفضلوا تفضلوا..
وخشوا داخل وماجده تقول:روحتوا بدانيه؟.
مجاهد:ايه بعد صلاة الجمعه..
وخشت نسيبه وبعدها سارة وبعدين التوأم اللي لفتوا انتباه مجاهد..
شبحوله وهو شبحلهم بإبتسامه ودرالهم حركة مداعبه بخشمه..
هما الزوز ضحكوا وسارة شافتهم..
هو رفع عيونه بيكلم ماجده جو فعيون ساره..ارتبك وغيرهم طول وهو يقول..ماتبي شي خالتي..
ماجده:لاولدي سلامتك بس..
مجاهد هز راسه وقال:السلام عليكم..
وطلع وصكر الباب..
وسارة ابتسمت وجهها مولي احمر..
نسيبه:الحوش هادي..
ماجده:سدينه..
شويه جتهم سدينه وهي تقول:ماجده مرحبتين مرحبتين خشوا خشوا..
ماجده جتها وسلمت عليها وهي تقول:لاباس ع دانيه..
سدينه بحزن:لايوريك باس ياوخيتي..
وسلمت بعدها ع نسيبه وسارة والبنات صغيرات ودخلتهم داخل..
قعمزوا هدرزوا شويه بعدين قالت سارة:خالتي نقدر نشوف دانيه..
ناضت سدينه وهي تقول:ايه حبيبتي نوضي معاي..
ناضت سارة ومشت مع سدينه..
نسيبه راجتها لين مشت وقالت:فرق كبير بين شقتك وشقتهم..
ماجده ارتسمت ع وجهها ملامح الضيق وقعدت ساكته..
🌸وصلوا سدينه وسارة لدار البنات..
طقت سدينه وقالت:رتاج...
شويه وفتحت رتاج الباب..لما شافت سارة ابتسمت مجامله وقالت:هلا..
وقدمت لسارة وسلموا ع بعض..
سارة:لاباس ع دانيه..
رتاج:لايوريك باس..
سدينه:تبي تشوف دانيه..
رتاج بإبتسامه:خشي حبيبتي..
سدينه مشت ولت لماجده ونسيبه..
وسارة خشت مع رتاج..
لقت دانيه مقعمزة وشاده كتاب..
سارة:دانيه..
دانيه حطت الكتاب وجت بتنوض..
سارة:والله مانك نايضه..
وجتها وسلموا ع بعض بالخد:لاباس عليك حبيبتي..
دانيه:لايوريك باس..
قعمزت سارة وهي تقول:صحه ليك شاده كتاباتك وتقري..
دانيه برفعة حاجب:مالا تبيني نطيح ونشمتهم فيا..
سارة بإستغراب:من هما..
رتاج:قصة طويله..
دانيه:لا مش طويله تبي نحكيلك..
سارة:احكي..نسمع فيك..
وحكت دانيه لسارة القصه كامله..
سارة بكره:هدا واحد متغطرس..
دانيه بحقد:ومتكبر..وتو يشوف كيف نكسرهوله خشمه اللي رافعه هدا..
سارة:حرقتلي دمي خطيبته..
دانيه:حسبي الله ونعم الوكيل فيها...ودموعها نزلوا..
شدت سارة يدها وقالت:كله مقدر ومكتوب دنو ان الله اذا يحب عبدا ابتلاه..
مسحت دموعها وقالت:الحمد لله على كل حال..
ورتاج تشبح لأختها بحزن..
طبطت سارة ع يد دانيه..بعدين حولتها وشبحت للحيط اللي وراها شافت صورة مجاهد معلقه..
قعدت تشبحلها ونست نفسها..
رتاج شبحتلها وركزت عليها..بعدين شبحت لدانيه وغمزتلها دانيه ابتسمت والتفتت شبحت لصورة مجاهد وقالت:خوي الكبير..
رتاج:خونا وبونا وصاحبنا وكل شي في حياتنا..
سارة وخرت شعرها ورا وذنها وهي تقول بإحراج:ربي يخليهولكم..
دانيه بإبتسامه:ويخليك خوتك..
سارة ابتسمت وقالت:آمين..
•••••°°°°°••••••°°°°°°••••••
خشت ع امها في وسط الحوش لقتها متكيه وسرحانه..
تهاني:امي..
عفاف:امم..
تهاني:بنمشي لسارة نقرا معاها..
عفاف:بري وقبل المغرب تكوني هني.
تهاني:حاضر..
بعدين لفت ومشت للممر اللي يرفع للباب وصلت في الباب لبست في رجليها وفتحاته وطلعت..
■في نفس الوقت..
في حوش هيثم..
في الجنان..
اسيمه:حطني ومشي للوزارة..
زياد لبس نظاراته وقال:امم..ايه..عمتي وسارة وتوامه مشوا مع خالتي ماجده الحوش..
اسيمه:علاش!؟
زياد:مانعرفش قالتلي عمتي بنمشوا مع خالتك لحوشها وخلاص..
اسيمه مطت شواربها للأسفل بإستغراب..
فجأة رن الجرس..
مشي زياد للباب بيفتح..
فتحه ولما شاف اللي واقف قدامه رفع حاجبه..
تهاني رفعت حاجبها وغيرت عيونها عنه وقالت بحده:ناديلي سارة..
زياد:مهناش..
تهاني شبحتله بحده.
هو رفع حواجبه..
ع جية اسيمه:مني يازياد..شافت تهاني وقالت..اهلا تهاني حبيبتي شن حالك..
سلمت عليها تهاني وهي مبتسمه:الحمد لله...شن حالك انتي خالتي..
اسيمه بإبتسامه:تمام الحمد لله..
زياد:ماشي ماتبي شي؟
شداته من يده وقالت:ايه نبي..
شبحلها..
اسيمه شبحتله بعدين شبحت لتهاني وقالت:زياد عنده ليك اعتذار..
زياد فنص في امه من ورا النظارات..
تهاني نزلت عيونها وهي عاقده حواجبها وقالت:لالاخالتي مش لازم..
اسيمه:لا لازم ونص..شبحت لزياد وقالت...هيا..
زياد ضم شواربه لداخل بغضب..
اسيمه:زياد!..
زياد غمض عيونه وهو يحاول يكبت غضبه بعدين قال من فوق نفسه:انتي..اسف..
وجبد يده من امه ومشي طول ومن كثر ماكان معصب عتر في رشاده قدامه قريب طاح..
اسيمه:بسم الله..
هو سوا وقفته والتفت..
لقي تهاني شاده ضحكتها..
وامه تضحك..
هو ساوا نظاراته ولف ومشي وهو معصب بزياده..
اسيمه شبحت لتهاني وقالت:معليشي حبيبتي زياد طبعه جاف شويه..
تهاني:ولايهمك خالتي..خالتي سارة داخل..
اسيمه:لا والله حبيبتي سارة طلعت مع عمتها..
تهاني:حي عليها! هي قالتلي تعالي اليوم..
اسيمه:اكيد نست..
تهاني سكتت شويه بعدين قالت:مش مشكله..هي مالا مانعطلش عليك سلام..
اسيمه:سلمي ع ماما..بالسلامه..
تهاني:يوصل..ومشت طول لحوشهم..
واسيمه خشت وصكرت الباب..
••••••°°°°°••••••°°°°°°••••••
"نبي الاسماء هادي كلها تتحول ع التحقيق"
:حاضر معاليك..
هيثم:مدير مستشفى******
استدعوه فورا..
:حالا معاليك.
هيثم:برا شوف شغلك..
:حاضر..
ولف السكرتير وطلع من المكتب..
وهيثم قعد يشوف قدامه ملف خاص بإحدي المستشفيات العامه في طرابلس اللي صاير فيه هلبه اختراقات وكوارث ترتقي لدرجة الجريمه...
•••••°°°°•••••°°°°°••••••
"خالتك اسيمه قاعده بروحها في الحوش"
تهاني:ايه..
عفاف بلعت ريقها بعدين ناضت وقفت وهي تقول:بنمشي مشوار وجايه راك تطلعي ولاتفتحي الباب لحد..
تهاني بقلق:علاش ماما؟
عفاف ناضت وقفت وهي تقول:هكي وخلاص..
ومشت طول لدارها خدت عبايه ووشاح..لبستهم بسرعه ومشت بإتجاه الباب وتهاني تشبحلها بإستغراب..
•••••°°°°°••••••°°°°°•••••
في الطريق..
نسيبه:العيله كلها ماشاء الله عليها ماعدا المنظر اللي واخداته خالتي..
سارة ضحكت..
نسيبه :والله جديات مش عارفه وين كان عقلها لما تعرفت عليه..
سارة:نصيبها..
نسيبه:ربي يبعده علينا نصيب زي هكي تخيلي اني هكي ندير عقاب عمري ناخد واحد زي مجيد!!
سارة:جاك ضابط شرطه شخصيه ووسامه ماترفسيش النعمه ياعمتو..
نسيبه اضايقت وهي تقول:فكينا من سيرته..شن رايك تاخدوا وجبه للعشي امك مروحه من السفر وماعندهاش حيل للتطييب..
سارة ابتسمت وقالت:راي كويس..
نسيبه:تمام...ومشت درست قدام وحده من المطاعم...
•••••°°°°°•••••°°°°°••••
"هيا هيا...لحظه"..
وصلت اسيمه في الباب اللي كان يطق وهي تلبس في حجابها..بعدين قالت:منو..
"اني عفاف"
فتحت اسيمه الباب..
عفاف ودموعها ينزلوا:فاضيه وخيتي..
اسيمه بقلق:ايه...خشي خشي..
طول خشت عفاف واسيمه صكرت الباب...
●●●●●●●●●●●●●●●●●●●●●
تاني يوم....
الساعه الثامنه صباحا..
خش وهو شاد يد اخته للمدرسه..
وصلوا في الطابور...
مشت وقفت في طابور فصلها..
اما خوها قعد واقف في مكانه...
شافاته المديرة مشتله طول...
في طابور دانيه..
كريمه:خوك هدا!!
دانيه:قولي شن حالك قبل قولي لاباس!!
كريمه بضحكه:سامحيني ياوخيتي مش مني..
وسلموا ع بعض بالأحضان...
اما باقي بنات المدرسه عيونهم على مجاهد..
مجاهد:ماجاش ولا؟.
المديرة:استغربت في تأخيره..
وجيهان واقفه حدا الأبلات تشبح لدانيه بغيظ..
ع جية جمعه...
لما جي شبح لطابور فصل دانيه شافها وهي تهدرز مع البنات وكالعاده ضحكتها ع وجهها...
المديرة:اهو جي..
المديرة مشت طول لجمعه..
وقفت عليه وقعدت تكلم فيه..
في الطابور..
:جي استاذ جمعه..
شبحتله دانيه مع البنات بنظرات حقد وقالت:حسبي الله ونعم الوكيل..
شويه وشافته مشي وين مافي العلم..
ركبت الدروج..ومشي وقف قدام الطالبات خدي المايك الخاص اذاعة المدرسه...
حول نظاراته وقال:السلام عليكم صباح الخير..
كلهم قعدوا يشبحوله..وجيهان انفتحوا عيونهم وسعهم..
جمعه:قديما قالوا...الإعتذار من شيم الكبار...واني انسان متعود لما نغلط في حد نعتذرله ماعنديش مشكله...واني اليوم قدام الكل..طلبه واعضاء هيئة تدريس..شبح لدانيه وقال..نعتذر من الطالبه دانيه عبدالمجيد المجذوب..اتهمتها بأنها ساعدت ع الغش وهي بريئة ..اني اسف جدا..شبح لمجاهد وقال...اسف ع اللي تسببتلها فيه ولو ان كلمة اسف ماتغير شي..شبح لدانيه وقال..وهي ليه حرية الاختيار في انها تعاود الاختبار او نعطيها الدرجه كامله..
كلهم شبحوا لدانيه..ومجاهد كذلك..
دانيه شبحت للمديرة وقالت:نعاود الاختبار...
المديرة شبحت لجمعه وقالت:تبي تعاود الإختبار..
ابتسم مجاهد..
جمعه:خلاص زي ماتبي اليوم نعاوده..
هزت راسها بإيجاب وهي تشبح للمديرة..
جمعه:تمام.....
ومشي حط المايك في مكانه ومشي نزل من الدروج..
ووقف ورا المديرة..
بعدين مشت ابلة التربيه البدنيه بش ادير التمارين الصباحيه..
مجاهد شبح لدانيه ودانيه شبحتله..ابتسملها ورفع يده يحي فيها...وهي ردتله الإبتسامه والتحيه..
بعدين هو لف ومشي طلع من المدرسه..
"مدوا ايديكم للأمام"
مدت دانيه ايديها للأمام..وشبحت بطرف عينها لجمعه..
هو كان يشبحلها ولما شبحتله طول غير عيونه..
دانيه"متعجرف"..
وهدا كله وجيهان كانت تتفرج ومن داخل تسحن وبتنفجر من الغيظ...
•••••°••••••°••••••°•••••
"بوك وزير ياراجل ولتوا مش داير سيارة"
زياد:السن القانونيه مازال ماوصلنهاش يامان..
:ههههههه..اهو حني عندنا سيارات ونهيج بيهم وكل يوم نعيم يرفع فيك ويجيب فيك..من كلمه!؟
زياد:تبيني نزور رخصه زيكم!!
:هههههه..فوتها السبل هيا وقول الحق الحاج مايبيش ولا خايف عليك يابلول..
زياد خبط المقعد بقوة من الغضب...
نعيم:خلاص ياشباب هدوا الوضع...الاستاذ جي..
وخش استاد الماده اللي عندهم فيها حصه..
وزياد مازال يغلي من داخله مش ع زملائه اللي كانوا يتسهوكوا عليه..بل على بوه اللي حارمه يسوق سيارة قبل يطق السن القانونيه...
والخوف كل الخوف ان استفزاز زملائه ليه يخليه يتمرد...

.....يتبع....