البطل المغمور "شمس الغروب"

الجزء الخامس عشر

💐..
انفتح باب الحوش وخش صكره وراه..
كان مروح من الخدمه تاعب بعد مااجهد نفسه اليوم في الخدمه ماكانش عنده يسوق السيارة ويقطع مسافه بش يوصل للمزرعه..فأختار مرغم يروح لحوشهم..
قبل بيخش لداره ماصارلاش..
قرر يشوف أمه قبل..وصل في وسط الحوش لقاها مقعمزة سرحانه..
خشلها وقال وهو منزل عيونه:السلام عليكم..
فزتله طول وجاته تلقائيا..ولما وصلت فيه ضماته..
هو غمض عيونه وحضنها..
عفاف بحزن:تهون عليك امك ماتشوفهاش الوقت هدا كله؟!
خليل باسها على راسها وقعد ساكت..
بعدت عفاف وهي شداته قالت:جعان..نحطلك تتغدا؟
خليل:لالا ماخاطريش..عقد حواجبه وقال..نحسابكم توتوا في ارواحكم!
عفاف بضيق:ايه مفروض..لكن مش عارفه اختك تهاني خيرها القايله مشت لحوش هيثم جارنا لبنته صاحبتها بتاخد منها قفطان بتلبسه الليله قبل لكن روحت من عندهم تبكي ع قد مانشدتها خيرك شن صار معاك..شي مابت تقول حاجه تبكي وخلاص..وقالتلي خليني بروحي..
هو شبح لأمه شويه بعدين مشي لدار اخته وامه وراه..
وصل في الباب وقعد يطق..
جاه صوت تهاني وهي تقول"خليني يما مش ماشيه"
فتح الباب وخش..
هي كانت متكيه لما شافت خوها قعمزت..
هو وقف حدا سريرها وقال:شن صار معاك!؟
تهاني قعدت تمسح في دموعها وهي تشبح القدام وماتبيش تتكلم..
خليل بحده:نكلم فيك قولي..شن دارولك؟!
شبحتله بحده وقالت:لزوني..
انصدمت عفاف...
وهو ارتسمت ع وجهه ملامح الغضب..
تهاني بنبرة باكيه:لزني عمي هيثم..ومعاش يبيني نولي صاحبة بنته..وانت تعرف علاش ولا؟!
خليل جروحه مازالت جديده..
جرح قلب...وجرح كرامه..وجرح كبرياء...
واللي صار مع اخته كان زي الملح اللي انحط ع الجرح..
طول مشي طلع من حداهم..
عفاف وراه:وين ماشي وين...تعالى جاي ياولد..خليل!
وخليل غضبه كان عاميه وصامه..
طلع من الحوش وتوجه لحوش هيثم..
وصل فيه..جاي بيطق ع الباب..لكن تراجع في اخر لحظه..
وحط يده بقوة ع الجرس....
بعدين نزلها وهي يشبح للباب بغضب شديد..
وامه تشبحله من فم باب حوشهم..
لحظات وانفتح الباب..
طلعتله اسيمه وهي لابسه اسدال الصلاه..
اسيمه:خليل!
خليل:وينه الدكتور!؟
اسيمه تنهدت وقالت:مهناش..
خليل:اممم..هز راسه وقال..تمام..لكن والله اللي داره لأختي ماهو معدي هكي..
اسيمه:شن بدير يعني؟
خليل قعد يشوفلها وهو ساكت..
عقدت اسيمه حواجبها بجديه وقالت:ترا خش شويه ولدي..
شبحلها خليل لحظات..بعدين نزل راسه وخش..
هي خلت الباب المفتوح..وقعدت واقفه حداه وقالت..
اسيمه:شوف ولدي..عند حق تحتج ع تصرف عمك هيثم..لكن بنقولك حط نفسك في مكانه..
شبحلها بحده..
اسيمه:اني نعرفكم..نعرفكم كناس وتعاملت معاكم يشهد الله اني ماريت منكم كان كل خير واحترام وتقدير..لكن مايدرقش الحقيقه التانيه ليكم ولدي..
غير عيونه عنها وهو مضايق هلبه..
اسيمه:لو حطيت نفسك مكان هيثم..او لو كنا حني في مكانكم وكنتوا انتم في مكانا درتوا نفس الشي ومن زمان مش توا..
خليل شبحلها وقال بإبتسامه ألم:لهالدرجه حني مانشرفوش؟!
تبدلت ملامح اسيمه للحزن وقال:ولدي..والله اني عارفه ان في داخلكم خير سوا انت ولاخوتك..لكن الواقع اللي انتم اخترتوا تعيشوه مايخلي حد يشوف لخيركم هدا..فاهم عليا ولدي...
خليل ابتسم بتهكم وهز راسه بإيجاب وقال:فاهم..اكيد فاهم..ع العموم ارتاحوا انتي والدكتور تهاني من هني وبرا غادي معاش تعرف بنتكم....وغير يتم هالعام العام الجاي مش حنخلوها تقرا في مدرسة وحده مع بنتكم...
اسيمه قعدت تشبحله بحزن وهي ساكته..
■فهالوقت..
درست نسيبه سيارتها حدا الحوش ونزلت منها..
استغربت لما لمحت الباب المفتوح..
ولما غيرت نظرها القدام شافت عفاف واقفه في باب حوشها ضيقت عيونها ورجعت شافت لحوش خوها وهي ماشيه بتخش..
مجرد وصلت فم الباب..كان خليل بيطلع..
جو عيونهم في بعض..
برغم كل شي...كل شي صار...جرحه وآذى قلبه منها هي ..
قاعد تأثيرها عليه لما يشوفها هو نفسه ماتغيرش..
بل بالعكس توا زاد اكثر...
اما هي فكانت كالعادع تقاوم في مشاعرها اللي تتحرك اتجاهه وين تشوف بقوة..
لكن هالمره..المكابرة كانت متبادله...
الزوز غيروا عيونهم عن بعض..
هي خشت..وهو مشي فات من حداها وطلع..
جتها اسيمه وقالت:شن داير زياد توا؟
نسيبه صكرت الباب وهي رافعه حاجبها بعدين شبحت لأسيمه وقالت:خليته راقد في الشقه بعد ماتغدا ماتخمميش عليه..المهم توا قوليلي هدا شن جابه؟
تنهدت اسيمه وقالت:جاي يقولي ان اختك حتقطع علاقته ببنتي حتى هي..
ولفت ومشت خشت داخل ونسيبه لحقتها..
••••••°°°°°°••••••°°°°°°°•••••
"عطانا اسماء اشخاص..والأوكار متاعهم "
:تأكدوا من صحة المعلومات..
راجح:اكيد سيدي..بس طبعا تحمل كل شي بروحه وطلع ولاده من الحكايه كلها..
:امم..متوقع...يعني هما ضحوا بخالد وكم راجل من رجالتهم بش يسكتونا..
راجح:ممكن..وخالد بالذات بإعتباره اقدم رجالتهم الباين انه بش قبل يكون كبش فدائه شري حرية ولاده من جميع النواحي..
:مزبوط...ع العموم طلعت اوامر القبض وبعتنا الوحدات حاليا للأماكن اللي قال عنها..لكن طبعا اللي يبوه مش حيوصلوله..
راجح بإبتسامه جانبيه:الباين ان اللي نفكر فيه هو نفس اللي تفكر فيه سيادة العقيد..
ابتسم وقال:خلينا نتأنوا شويه ومانستعجلوا على شي..وحده وحده وحنوصلوا اللي حني نبوه..
ضحك راجح وقال:ان شاء الله سيادتك..
وناض وقف...
العقيد:ايه حقه مش ع اساس اليوم عندك موضوع!؟
ضحك وقال:تأجل سيادتك ليوم تاني..
العقيد:امم..فيها خيره..كل تأخيره وفيها خيره..تقدر تتفضل..
حيا راجح رئيسه وانصرف..
والعقيد رجع يفكر في المستجدات المفاجئة بالنسبه ليه..
...والصادمه..
بالنسبه لولاد خالد اللي لما عرفوا اللي داره بوهم..زي المجانين مشوا يجروا لمديرية الأمن بش يعرفوا سبب هالمجازفه الكبيره اللي اقدم عليها بوهم...وشن مقابلها..
••••••°°°°°°°
"حريتكم"
جاوبهم بهالإجابه وهو واقف يكلم من ورا القبضان..
جهاد بصدمه:حرية شني هادي!!
رفيق:بوي معقوله اضحي بروحك ع خاطرنا!
خالد:ياجحش كان ماضحيتش بروحي ع خاطركم
نضحي ع خاطر مني!!؟
خليل بعيون معبيه دموع:والله ماني مسامح نفسي..
بوه وخوته شبحوله..
خليل قعد يشبحله بنظرات وجعت قلب خالد هلبه..
بعدين مشي بسرعه هارب بدموعه عن عيونهم..
خالد:خليكم مع خوكم..ماتخلوشي بروحه بروا..
شبحوله جهاد ورفيق..
خالد بعصبيه:تحرك انت وياه..
هما طول مشوا ..
وخالد معاهم بعيونه المرقرقات بالدموع..
بعدين التفت للعنصر اللي خداه وبيرده للحجز..
....الخبر هدا مازال ماوصلش لمسامع عفاف اللي مشت تحضر في حفلة بنت اختها..
وخلت تهاني في الحوش مع خوها خليل اللي روح للحوش بعد هام ع وجهه في الشوارع بروحه ورفض وجود خوته معاه وهما خلوه براحته..
كان مقعمز في داره...
ع سريره...عيونه ع صورة بوه...وفي يده الساعه..
ودموع عيونه ينزلوا براحه...هالدموع اللي ليهم وقت طويل ملازمينه بحزن طال امد وجوده في حياته..
ويله وجع الحب..
حبه لبوه...اللي ضحى بنفسه ع خاطره...
وحبه لإنسانه تمناه تكون زوجه ليه من دون بنات الدنيا كلها والباين انها حتكون نصيب غيره...
شن اللي يفرح في حياته!!؟ مافي شي..
وهالسؤال قاعده تسأل فيه تهاني لنفسها بعد مارسمت الدموع ع خدودها مجرى من كثر ماذرفتهم..
وكلها خوف انها زي ماخسرت اعز صديقه ليها بسبب سمعة بوها وخوتها...تخسر حتى مستقبلها..
...وزياد..
اللي اختار يقعد في شقة عمته بعد طلع من حوشهم وعمته اللي خدت حوايجها مع حوش خوها وولت لحوش بوها بش تقعد معاه..
الزوز قاعدين يتفرجوا ع التلفزيون..
ع احدى البرامج الساخره..التافهه..لاحدي القنوات صاحبها يكون من احد المفسدين السياسين الكبار...هادم اللي يكرهوا يشوفوا اي حد نظيف ماسك منصب ويحارب في فسادهم..
هالقناة كانت جايبه خبر تتكلم فيه عن اللي داره زياد وطبعا تناولوا الموضوع بطريقه هجوميه مباشرة ع هيثم..
وقالوا انه يدعي النزاهه والإنضباط والإصلاح ومخلي ولده يدير مايبي...
نسيبه كانت تسمع وتسب فيهم وهي في قمة الغضب..
لكن زياد..كان في داخله شعور متناقض..
كان وكأنه مستحلي اللي صار في بوه من وراه...بس في نفس الوقت كان متحشم منه..
....وبوه...
▪▪▪▪▪
◇اني يومها كنت في اسوأ حالاتي مشي باقي يومي من سيء لأسوأ برغم اني نجحت في تفادي كارثه كبيره كانت ممكن تصيرلي في عملي...لكن الكارثه..اللي صارت في حوشي خلتني يومها نحس اني رجل فاشل ماقدرش يبني اسره قويه ولايحميها من التصدع...
▪▪▪▪▪
🍁ومرت الأيام...
بدي فيهم الأستعداد لرمضان...
كانت اسيمه زي كل عام تجهز لكل شي..في الوقت اللي فيه مقاطعه ساره وزياد ورافضه تكلمهم وهالشي متعب الزوز..
بالذات سارة..اللي انقطعت تماما علاقتها بتهاني..
كل وحده فيهم تتجنب حتى تشبح للتانيه..
وكل وحده فيهم واجع قلبها هالفراق...
...من جهة تانيه...
دانيه بدت تتعرف ع مرضها وتبحث عنه وتقرا...
تبي تعرف كيف تتعامل معاه وماتخليشي يعيقها عن اكثر شي متمسك بيه قرايتها..
بس كانت تتعرض لمواقف محرجه في المدرسه..
وابرزها اللي صار في حصة من حصص الفيزياء..
جمعه:تمام خشي..
خشت الطالبه بعد ماحلت تمرين في المراجعه..
جمعه وهو يشوف لقائمة الأسماء:خوله خليفه..
ناضت الطالبه بش تحل مسألة تانيه..
ودانيه فهالوقت كانت مضايقه ع الآخر..تبي الحمام..
هبه شبحتلها وقالت بهمس:تكلمي..
دانيه حركت راسها يمين ويسار بالرفض..
هبه:عليك عناد عندك..
جمعه سمع صوتها وقال:ياطالبه..
شبحتله هبه..
جمعه:تبي تطلعي!
هبه:لايااستاذ دانيه تبي تطلع..
هو شبح لدانيه..ودانيه فنصت في هبه..
هبه:تبي تمشي الحمام ياأستاذ..
جمعه شبح لللسبورة وقال وهو عاقد حواجبه:بري..
دانيه وهي في قمة الخجل..
ناضت بسرعه ومشت طلعت من الفصل..
هبه:الله غالب سكر حتى هو..
جمعه شبحلها..
وهبه نزلت عيونها لكتابها وهي تقلب في صفحاته..
تنهد بضيق بعدين شبح للسبورة وقال:هيا كملي..
•••••°°°°°••••°°°°°°•••••°°°°••••
في باحة الكليه..
تتمشى وتتكلم بالتليفون..
رتاج:والله فقدتك هلبه وينك عاد؟
جهاد:الامور ملخبطه الفترة هادي ومتعكرة عندي معليشي الايام هادي فوتيني لين تصفى اموري
رتاج وقفت وقالت:جهاد..انت بديت تتهرب
جهاد:تي غير من شني بنتهرب ربي يهديك!..اسمعي رتاج بالله عليك صكري مانبيش نغلط فيك ونخسرك..
رتاج بغضب:باهي زي ماتبي..وصكرت عليه وهي تفكر وتقول لنفسها"شكله كلام دانيه صح!؟..لالالا..جهاد يحبني ويبيني جديات واضح من صوته ان في شي صار معاه..معليشي يارتاج تحمليه البنادم يوم هكي ويوم هكي طبيعي"..
تنهدت بعدين مشت بطريقها للقاعه..
••••••°°°°°
في الورشه..
كانوا التلاته مع بعض يخدموا..
وكل واحد فيهم وهو يخدم يفكر في همومه..
جهاد..في بوه..
ورفيق..في زواجه من اكثر مخلوقه يكرهها ويشمئز منها بالذات وين يذكر سبب زواجه منها..وكذلك يفكر في وضع بوه..
اللي يفكر فيه خليل حتى هو...الى جانب جرح قلبه كبير..
خليل:صفينا امورنا كلها معاهم...
جهاد:خلاص يعني معاش في شي يربطنا بيهم..
رفيق:ايه خلاص..من اليوم بنعرقوا وناكلوا حلال صافي..
خليل بتهكم:ياريت في صابون ينطف السمعه..
ضحكوا الزوز ضحكه سخريه بدون صوت..
فجأة رن تليفون خليل..
طلعه من جيبه شاف المتصل..
فتح الخط ورد..
خليل:ايوه..
"خليل تعالى ياخليل تعالى"
خليل بخوف:خيرك شن في!!
شبحوله خوته..
ملاك ببكي:حوشنا ولعت في النار ياخليل...
خليل بفجعه:صكري صكري..
ونزل تليفونه ومشي يجري لسيارته بالقامجو متاع الخدمه..
طلعوا خوته في جرته ورفيق يسأل:شن في ياراجل..
خليل:حوش ملاك ولعت فيه النار..
رفيق:تس..
جهاد ضم شواربه القدام بأسف..
وخليل ركب سيارته وشغلها وتحرك طول...
°°°°°••••••°°°°°°
"ماعندهم غير القطاف سيورهم يسكتوا وينسوا"
اسيمه وهي ماشية لبوابه المدرسه:والله اخر همي ينسوا..مش شاغله بالي بيهم اساسا..لاهيه بتقويم ولدي اللي نعترف انه غلط..وهدا المهم..
زميلتها:والله صحه ليك..عندك حق..
ابتسمت اسيمه..
ولما وصلوا هي زميلتها للبوابه وطلعوا...
زميلتها؛معناها مش مروحه معاي اليوم؟!
اسيمه بضحكه:لامعاك ماعندي لمن تخليني.
زميلتها وهي تشبح قدامها:لاعندك..
استغربت اسيمه وشبحت وين ماتشبح..
تفاجئت..
لما شافت هيثم واقف ع سيارته قدام المدرسه وفيده شاد باقة ورد..
لما شبحتله رفع يده وحياها بيها..
هي انحرجت هلبه..مررت نظرها حواليها لكن العيون كلهم محاوطينها..
شدت ابتسامتها وقالت لزميلتها؛هي بالسلامه..وكل سنه وانتي طيبه..
زميلتها بضحكه:كل عام وانتي بخير..نشوفك ع خير..
مشت اسيمه بآتجاه هيثم..
وهو كان يشوفلها من ورا النظارات وابتسامته ع وجهه..
اسيمه وصلت فيه وقالت:كنت ادير هكي ايام المراهقه؟!
مدلها الباقه وقال:ابدا..والله اول مرة..ماعشتش مراهقتي الا معاك انتي بعد خديتك..اساسا اني عشت مراحل عمري كلها معاك بعد خديتك..مرة نحس اني ولدك..ومرة خوك..ومرة بوك..ومرة حبيبك..وفي كل الحالات..كنت ليك انتي وبس ومانقدرش نعيش من غيرك..
ابتسمت بخجل وخدت منه الباقه وقالت:شكرا..ومشت بتركب..
هو بسرعه خاطفه سبقها فتحلها الباب..
ضحكت..وركبت السيارة..
وهو ضحك وصكر الباب بعدين مشي بيركب..
ركب...وتحرك طول..
••••°°°°°•••••°°°°°•••••
"هويناه ياأبله"..
نسيبه ضيقت عيونها وشبحت وين ماأشرلها الغفير..
فنصت بصدمه وغضب بعدين قال:باهي ياعمي صالح صحيت..
مشي الغفير..
وهي طول مشيت للضيف الدبق...اللي مش ناوي يخليها في حالها..
وصلت فيه وقالت:شن دير هني انت!!؟
راجح بضحكه:جاي ندير دورة ع المكان اللي تخدم فيه زوجة المستقبل..
رفعت حواجبها وقالت تهكما:زوجة المستقبل!! العبد الواثق..
راجح حول نظاراتك وقال:اكيد بنكون واثق مافي شي فيا يخليك ترفضيني ويخليك ماتوافقيش..
استفزها بثقة الزايده بنفسه وقالتله وهي رافعه حاجبها:انت هكي! مالا لما تشوف شحمة وذنك نوافق عليه..
هو رفع حاجبه وقال:هكي بس! حاضر..
وقام تليفونه..
وهي تشبحله برفعة حاجب ومستغربه في نفس الوقت..
شافتها حط التليفون ورا وذنه وسمعت صوت الكاميرا لما تصور..بعدين شبح للتليفون وقال:اهي شحمة وذني وشفتها..قام عيونه فيها وقال..نديرلك بيان كبير في رمضان..والعرس بإذن الله قبل عيد الأضحى لين نتم حوشي من مجاميعه ع قولت المصاروة..تمام؟
هي غمضت عيونها بنفاد صبر وفتحتهم وقالت:غير غدوة رمضان بس بنضبط اعصابي..اسمع انت كلامك مش معاي عند ولي امر برا كلمه...اخر مرة نشبح وجهك هني..
ولفت ومشت بعدين وقفت والتفتت وهي تقول..ولما تطلع النجوم في القايله نوافق عليك..
ولفت ومشت بسرعه وهي مبتسمه بمكر..
اما هو فقعد يضحك وخلاص...
بعدين تنهد ولف ومشي بيطلع وهو يقول:وانتي هكي تخلي فيا نشد فيك اكثر واكثر..
••••••°°°°°°••••••
"خشي امي صالحه خشي..خشوا"
خشوا ملاك وخوها وحناها وهما في حاله يرثى لها..
جايين ومافي معاهم شي كل شي عندهم انحرق في الشقه..
دخلهم خليل داخل...
واستقبلتهم عفاف..
ودخلتهم لوسط الحوش..
.....
صالحه:كنت طالعه نجيب قضية الفطور يابنتي..مانندري ع شي لين جاني واحد قالي شقتكم والعه فيها النار..
ملاك ببكي:اني طلعت مع خوي بمعجزة ياخالتي عفاف..
خليل:انتي بالذات اسكتي طايرتلي منك واصل حدي..معقولك يقطعوا عليكم الضي وماتقوليش!
عفاف:معقوله!
صالحه:قالت نبوا نعبوا ع ارواحنا معاش بنتعبوا حد معانا..
خليل:غبيه اقسم بالله..تحسابي الخدمه اللي خدمتها بتفتح عليك شيشمة فلوس..غير حالتك توا حاله كان هدا شفتي شن درت معاك..
عفاف:خلاص خليل اسكت...نوض نوض..برا للورشه..
تنهد بغضب وناض وهو يقول:تمام...
ومشي من حداهم..
عفاف:سلامتكم كبيرة..الحمد لله اللي ماصار في حد منكم شي..
صالحه بحزن:ايه الحمد لله..الحمد لله..
وملاك تبكي بصمت..وخوها قاعد مفجوع من اللي صار معاهم..
••••°°°°°•••••°°°°°•••••°°°°••••
قدام السرايا الحمراء...
في السيارة..
هيثم:قاعد غادي..
اسيمه:امم..وعمته معاه..
هيثم:خليه غادي..
اسيمه سكتت..
هيثم؛وهديكا ؟
اسيمه:ساره...قطعت علاقتها بتهاني نهائيا ارتاح..
هيثم تنهد وقال:مش عارف علاش معتبريني عدوهم..كره فيهم اني ندير هكي!؟ ماهو من خوفي عليهم وعلى مصلحتهم...
اسيمه قعدت ساكته..
هيثم:تكلمي علاش ساكته..
اسيمه:تم الكلام...ماعندي شي نقوله بهالخصوص..
هيثم شبحلها شويه بعدين ابتسم وقال:وين خاطرك تتغدي..
اسيمه ابتسمت وقالت:في الحوش..
هيثم:تحت امرك..
وشغل السيارة وتحرك طول...
••••••°°°°°°••••••°°°°°••••••
الساعه الثامنه والنصف مساءا..
في السجن...
في وقت الزيارة..
خالد:لاحول ولاقوة الا بالله..
خليل:خليتهم الفترة عادي عندنا في الحوش لين نلقالهم مكان باهي..
جهاد:وحني نقعدوا مشردين..
فنصوا فيه خالد وخليل..
خالد بعصيبه:اللي يسمع يقول ديما وانت في الحوش.!
جهاد بضيق:يابوي..
قاطعه وقال:اسمع دبر لروحك..خوك رفيق بيتزوج الحوش حتى هو..يااقعد في الدار اللي فوق يااجر شقه..
جهاد بصدمه:كيف!
رفيق:اني درت جناح مستخطي يابوي..
خالد:اني حتى ع ملاك وماليها..
رفيق:شن بيقعدوا العمر كله؟!
خالد؛ايه..كان ربي يبي...
شبحوله ولاده بإستغراب..
خالد:هادم امانة في رقبتي واني مسؤول عنهم..هدا علاش طلبت نشوفكم اليوم..بعد بلغني خليل باللي صار في الهاتف..
خليل قعد مركز مع بوه..
خالد وهو يشبح في الفراغ:خليل...نبيك تاخد..
رفيق وجهاد شبحوا لخليل وهي مذهولين..
وخليل اللي ماخداش وقت بش يفكر قال وعيونه تعبوا دموع:اللي تبيه نديره...
شبحله خالد وابتسم وهو يقول:ربي يشبحلك بعين راضيه ياولدي زي ماديما ترضي فيا..
خليل ابتسم بمرارة وقال:كل عام وانت بخير ياغالي..
ضحك وقال:كل سنه وانت طيب..
ورفيق وجهاد مازالوا في حالة عدم استيعاب..
•••••°°°°°•••••°°°°°•••••
"كم مرة كلمتها وهي ردتني قولي "
نسيبه:امك هادي يابني ادم امك..
زياد:امي..امي مفروض تلقالي العذر وتسامح..
نسيبه:ع عملتك السودا مفروض ذبحاتك ذبح..
عكرش وجهه وقال:اسمعي راسي يوجع وماعنديش خلوق للنقاشات والعراكات..بنمشي نرقد..
ومشي طول للدار وخشلها وصكره الباب وراه بقوة..
نسيبه بصدمه:الولد هدا عاصي عاصي..لمن طالع حتى بوه مش هكي!!!
•••••°°°°°•••••°°°°°°•••••
في الكوجينه...
واقفه ع التلاجه ادس في البضاعه اللي خدوها لفطور غدوة..
بعد ماكملت صكرت باب الثلاجه..
شافت قدامها بعد صكراته بنتها واقفه تشبحلها..
اسيمه:خيرك؟
جتها بنتها طول خدت يدها وقعدت تبوس فيها وتقول؛سامحيني ماما..ارجوك..
ابتسمت اسيمه وضمتها بقوة...
بعدين باستها من خدها وبعدت وهي تقول:مش اني بس المفروض نسامحك..
سارة:عارفاته حيردني..
اسيمه:عادي يردك..المهم كسبتي اجر المحاوله..
شدت وجه بنتها بإيديها وقالت..ماما حبيبتي زي ماغطيتي شعرك الحلو ووسعتي حوايجك اللي تلبسي فيهم ع خاطر ربي..حتى ادبك مع بوك وبرك بيه ع خاطر ربي...حتى لو كان بوك كافر..مشرك..ريتي الشرك اللي مافيش اعظم منه ذنب..قال ربي صاحبهما في الدنيا معروفا...برغم ان بوكم راجل مؤمن ويخاف ربي ويحبكم يموت فيكم..بس بطريقته هو..
سارة تنهدت وقعدت ساكته وهي تفكر في كلام امها اللي كان ثقيل ع نفسها..
مع هدا...ع خاطر ربي...
مشت لبوها اللي كان مقعمز يخدم في الصاله..
سارة:احمم..كل عام وانت بخير..
هو قام عيونه وشبحلها شويه بعدين قال؛كل عام وانتي بخير..
بعدين رجع شاف للملف اللي قدامه...
هي لفت بتمشي..
وقفها لما قال:وين ماشيه..
التفتت شبحتله..
لقاته يأشر بصبعه ع راسه..
هي بلعت ريقها..وقدمتله وعلى مضض باست ع راسه..
بعدين لفت ومشت بسرعه..
وهو قعد معاها بعيونه لين ادرقت..بعدها حرك راسه يمين ويسار..
ورجع لهي بالملف اللي يخص الخدمه...
••••••°°°°°•••••°°°°°°°••••••°°°°°••••••
ويجي اليوم اللي بعده..
اول يوم رمضان..
وجابت نسيبه زياد غصب عنه لحوش اهله بش يفطر معاهم..
كان موطي عينه عن امه..وامه كذلك مجافياته..
اما بوه ماحضرش معاهم لأنه كان مشغول هلبه...
مجرد اذن العشاء...طلع زياد للجامع...
والنساوين..بعد كملوا حوستهم وصلوا صلاتهم..
دارو قهوة وقعمزوا يشربوا فيها وهما يهدرزوا..
اسيمه:نديروا نهار ونعزموهم..
نسيبه:اختاري يوم هيثم يكون فيه فاضي..
اسيمه:تمام..
فجأة..
سمعوا اصوات زغاريد..
شبحوا لبعض بإستغراب..
اسيمه:من حوش خالد..
سارة وهي تاكل في تاكل في العسله:امم بالك هدا رفيق بيرفع بيان..
نسيبه:بيان اول يوم رمضان!
اسيمه مطت شواربها للأسفل بعدم معرفه..
بعدين رجعوا يشربوا في القهوة ويهدرزوا...
لعند ماخش عليهم زياد مروح من الجامع..
زياد:السلام عليكم..
ردوا عليه السلام..
مشي قعمز جنب امه وحاوط كتفها بذراعه وقال:تصدقوا الجامع كانت فاتحه اول يوم رمضان وقبل التروايح..
امه وعمته واخته شبحوا لبعض..
زياد شبح لأمه وقال:فاتحه ولد خالد الكبير..وقربلها وباسها ع راسها..
اسيمه مفروض تركز مع ولدها اللي يصالح فيها..
لكن تركيزها كله فهاللحظه بعد اللي سمعاته كان ع تعابير وجه نسيبه..
اللي كانت تشبح لفنجان القهوة متاعها بصدمه وعيونها تعبوا بالدموع..
سارة:شكلها حبسة بوهم جت في صالحهم..اللي هدا خطب..
اسيمه شبحت لسارة وقالت:نبرتك فيها استهزاء..
سارة فنصت وقالت:لا والله ماما نتكلم عادي..
زياد:وين القطوسات الزوز..
اسيمه:راقدات..
ضحك وباسها ع راسها..
وهي شدت ضحكتها اللي كانت تتعارك مع ملامح الزعل ع وجهها..وسارة تشبحلهم وتضحك..
اما نسيبه..كانت في مكان تاني..مش معاهم مهم..
حاسه قلبها غاص في احشائها...حست روحها وصلت لحنجرتها..
حاسه بألم فضيع في صدرها...
تبي تفرغ احاسيسها هادي كلها في دموعها..
نسيبه:احمم..وحطت الفنجان ع الطاوله وناضت وهي تقول..هيا زياد نوض الوقت تأخر..
اسيمه شبحتلها..
زياد:نتسحروا ونطلعوا..
نسيبه:احم..لالا توا معاش في وقت هيا..
ناضت اسيمه وقالت:خل عمتك ع راحتها..خل نمشي نجيبلكم حصتكم من السحور...
...وبعد عطتهم اسيمه حصتهم..
طلعوا من الحوش..
ومازالت نسيبه حاسه بشعور الألم وكل ماله يشتد..
لما طلعت بالسيارة برا..
ومن سوء الحظ...
كان خليل مروح مع خوته للحوش..
لابس عربي وقتها...وكان انيق هلبه.
هي بلعت ريقها وغيرت عيونها عنه..
وهو تجاهل وجودها تمام وخوته حداه يهدرزوا ويضحكوا مع بعض..
تحركت بالسيارة لما فاتوا من حداها..
شدت دموعها بقوة...
وزادت سرعتها...
لين وصلت في اول الزنقه وطلعت منها..
وهما مجرد ماوصلوا لحوشهم خشوا..
وخليل كان اخر من خش..شبح لسيارتها وهي طالعه من الزنقه..
مسح دموعها قبل ماينزلوا براحات ايديه..وخش للحوش وصكر الباب بقوة...
🍁🍁🍁🍁
وبعد ماروحت للشقه..
خشت دارها ومعاش طلعت منها بكل ودموعها مابطلوش نزول..
كانت ضامه ليها مخدتها بقوه وهي عاضه ع طرفها بسنونها بقهر...
طق عليها زياد الدار اكثر مرة بش تطلع تتسحر لكن تحججب برغبتها في النوم...
وقعدت ع هالحاله لقبل الفجر بربع ساعه..
طلعت من دارها..ومشت للحمام..توضت..
بعدين ولت للدار...لبست اسدال الصلاه..
واستقبلت القبله وصلت ركعتين...ماخلت فيهم حاجه في قلبها الا وطلعتها لله في السجود...
واكثر دعاء تردد فيه.."يارب ريح قلبي"
وأذن عليها الفجر..
صلاته....
وقعدت في مصلاها...تذكر في الله وتفكر....لعند ماطلع الصبح..
لما شافت ضي الشمس خاش لدارها..
مسحت بإيديها ع وجهها...وناضت ومشت لتليفونها اللي كان محطوط ع السرير..
خداته..وخدت نفس..وقعمزت ..ودورت ع رقم معين واتصلت بيه..
........
¤وإذ قال ربك للملائكة اني جاعل في الأرض خليفه..¤
سكت لما سمع تليفونه يرن..
ناض من قدام المصحف ومشي لوين مافي تليفونه..
خداه من ع الطاوله..قدام مرته اللي كانت تسبح ع صوابعها..
شاف الرقم خاف..
وفتح الخط ورد طول..
هيثم بخوف:ايوه نسيبه..
وقفت اسيمه تسبيح وقعدت تشبحله بخوف..
نسيبه حطت يدها ع نص وجهها وقالت:احمم.هيثم ماتخافش مافي شي..بس يعني..نزلت يدها وقالت..كلمتك توا لأني مانقدرش نحصلك في وقت تاني..بخصوص هداكا الموضوع..
هيثم عقد حواجبه وقال:اي موضوع!؟
نسيبه:هداكا الموضوع..متاع الضابط..
هيثم:اهاا..موضوع الخطبه..
اسيمه شبحت القدام وضمت شواربها لداخل بأسف وكملت تسبيح..
نسيبه:ايه..حدد معاه موعد..كان ربي عطانا عمر عاشر يوم رمضان لو كنت فاضي..
هيثم:ياستي نفضي نفسي هي كلها اخت وحده اللي عندي..
نسيبه ابتسمت بحزن..
هيثم ابتسم وقال:تمام تو نكلمه ونرد عليك..
نسيبه:خلاص..تمام مانعطلش عليك..مع السلامه...
هيثم:تمام..سلام..
ونزل تليفونه وصكر..
بعدين حطه في مكانه...
وولى للمصحف..
واسيمه تسبح وهي تشوف للروشن وتفكر في نسيبه وردة فعلها اللي تتمنى من قلبها انها ماتندمش عليها بعدين...
🍁🍁🍁
ومروا التسعة أيام...
كان فيهم خليل الوحيد اللي يخش لحوش اهله بعد ماجوا قعدوا فيه ملاك واهلها..وبما ان قاري فيها الفاتحه مافيش حرج يخش ويطلع عليهم..
لكن خوته التانيين لا شادين الحوازة بس...
في الوقت اللي فيه هيثم حدد موعد مع راجح بش يجي ويجيب اهله لخطبة نسيبه رسمي..
وراجح طار من فرحته...وخلا اهله يوتوا روحهم من قبل الموعد بتسعه ايام...
وهما فضولهم زاد بش يشوفوا البنت اللي خلت راجح بهالحاله...
...وفي مكان تاني...
كان في وحده يتقرر مصيرها للمرة تانيه بدون علمها وهالمرة بصورة اسوأ من السابقه..
"غبارتي غبارة!"
عبدالمجيد؛نقصي حسك نقصي...
سدينه بصوت واطي:حرام عليك ياراجل حرام..تبي البنت تقتل روحها..
عبدالمجيد:لاتقتل روحها ولاصايرة فيها حاجه..اسمعي جاي تطلع منك حاجه لحد بالذات ماجده..راك طالق..
انصدمت سدينه وخافت..
عبدالمجيد:تبي تخربي حوشك تكلمي باهي!
سدينه نزلوا دموعها وهي تقول:حرام عليك بنيتك صغيره تعطيها لواحد في عمرك..حرام عليك..
عبدالمجيد:عمرها 21 سنه معاش صغيره..وياما منهم في عمرها واخدات اكبر مني وعايشات..اسمعي مانبيش نزيد ناقش في الموضوع هي كلمه وقلتها وتمت..
ومشي طلع من حداها..
وخلاها في الدار بروحها تبكي وتندب بصمت وقلبها قبل عيونها يبكي ع حال بناتها وحظهم..
•••••°°°°°••••••°°°°°°•••••
العاشر من رمضان..
الساعه العاشرة ليلا..
واقفه قدام مراية المدخل تشوف لأنعكاس صورتها في المرايه...وملامح الحزن ع وجهها..
"هالنهار اشي عليه..فرحانه ونراجي فيه"
ضحكت نص ضحكه والتفتت لخالتها وهي تقول:منين تجيبي فيهم الأغاني هادم..
ماجده بضحكه:من فرحتي..
ع جية اسيمه:قال هيثم وصلوا..
ماجده جبدت نسيبه وهي تقول:بري نواسه لدار سارة بسرعه..
نسيبه مشت طول لدار سارة وهي مضايقه..
واسيمه وماجده مشوا للباب بش يستقبلوهم..
■في هالوقت..
في جنان حوش خالد..
كان خليل واقف يراجي في النساوين يطلعوا ناوي يرفعهم لوحده من الجرادين..
طلعت ملاك..
جاته وهي تقول:خيلو..
وجت بتشد يده بعدها..
ملاك:خليل خيرك راهو مرتك اني!
خليل:بعد العرس ساهل..توا اضبطي روحك قدامي امي احسلك..
ملاك ربعت ايديها وهي تشوفله برفعة حاجب..
وهو غير عيونه عنها وشبح امه وتهاني وصالحه والولد الصغير طالعين مع بعض..
عفاف:ياريتك جبت السيارة هلبه ع خالتك صالحه تمشي هالمسافه ع رجليها..
صالحه:لالا بنيتي واخده عليها المسافه الطويله..
خليل:هيا بالله بسرعه معاش في وقت..
ومشي للباب وهما لحقوه...
وصل فيه وفتحه وطلع..
شاف القدام...
شاف سيارة راجح قدام حوش هيثم..
نزلوا منها تلاته نساوين..
بعدين هو نزل والتليفون ع وذنه..
نزله وهو ماشي للباب..
انفتح الباب...
خشوا النساوين..
بعدين طلع هيثم وسلم ع راجح ودخله..
هدا كله ع عيون خليل واللي معاه..
تهاني بحزن:شكلهم جايين يخطبوا ابله نوسه..
عفاف شبحت لخليل..
وملاك كذلك..
هو حك حاجبه وقال:احمم..هيا تحركوا..
مشوا..
وامه وهي تمشي ربعت ايديها وقعدت تشبح لحوش هيثم بألم..
بعدين التفتت لولدها لقاته يشوف لسيارة راجح..
وخرت خطوه وجاته حضنت ذراعه..
هو شبح القدام وقال:مافي شي يام تريحي..
مسحت ع ذراعه وهي تشوفله بعدين شبحت القدام..وقلبها موجوع عليه...
🌺وصلوا للسيارة..
ركبوا..
ورفعهم للجردينه..
قعمزوا ع طاوله معينه..
وهو بعد عليهم بمسافه بش بيدير مكالمه هاتفيه..
خليل:خلوها رابش..مانبيش فيها حاجه سليمه....منور.......منوؤ بالهلبه ياغالي.........سلام..
وصكر..
وهو يشوف للتليفون ويقول بمكر:مانبداش خليل خالد عبدالناصر كان خليتك تاخدها يانسناس..
بعدين التفت ومشي للعيله وصل فيهم وقعمز حدا امه وقال بضحكه:هاه شن جو؟
امه ابتسمت...
ملاك:يجنن..
هو هز راسه وهو مبتسم ع جنب وقال..
كويس

....يتبع...